Portal:Wikinews/Tweesprakige Oortsschiller in Polen

22. September 2008: In Polen sünd nu dat eerste Maal, nadem en groten Deel vun de Düütschen ut de fröheren düütschen Oostrebeden verdreven worrn is, wedder Oortsschiller opstellt worrn, op de ok de hoochdüütschen Naams vun de Öörd opschreven staht. In Radlau (Radlów) hebbt se an’n 12. September dat tweesprakige Schild opstellt. Ok in Lubowitz (poolsch Lubowice), Czissek (poolsch Cisek) un Friedrichswille (Kolonii Biskupskiej) staht nu Schiller in Poolsch un Hoochdüütsch. Un in noch en Dutz annere Öörd in de Region Oppeln un Slesien, in de ok na’n Tweten Weltkrieg noch wiederhen Düütsche leevt hebbt, schöölt nu Oortsschiller mit Naams in beide Spraken opstellt warrn. Al 2005 harr dat poolsche Parlament dor de Gesettsgrundlaag för schapen, aver eerst nu harrn de Möhlen vun de Verwalten allens sowied dörmahlt, dat dat losgahn kunn. Öörd dröfft nu Andrääg op Schiller mit twee Naams stellen, wenn opminnst 20 % vun de Inwahners to de goodkennten Minnerheiten vun Düütsche, Kaschuben, Litauers, Wittrussen oder Ukrainers höört. In sien Reed dee Norbert Rasch, Vörsitter vun de Organisatschoon vun de Düütschen in Polen un Afornter in dat lokale Parlament, seggen, dat disse Schritt för jem en Trüchkehren to de Normalität bedüden deit.

Ok Leschnitz (poolsch Lesnica), Tarnau im Oppelnerland (poolsch Tarnów Opolski), Chronstau (poolsch Chrzastowice), Stubendorf (poolsch Izbicko) un Guttentag (poolsch Dobrodzien) hebbt all al Andrääg stellt, de nu vun dat poolsche Binnenministerium goodkennt warrn mööt. Kolonnowska (poolsch Kolonowskie), Klein Strehlitz (poolsch Strzeleczki), Zülz (poolsch Biala) un Zembowitz (poolsch Zebowice) wüllt ok Andrääg stellen.

Ok bi de Kaschuben hebbt se inn Juli in Stezyca/Stãzëca (Stendsitz) un Chmielno/Chmielno (Hoppenbarg) Schiller in twee Spraken opstellt.