Portal:Wikinews/Scholen in Sleswig-Holsteen kriegt wedder Plattdüütsch-Segel

Dunnersdag, 17. Juli 2008: De Präsident vun’n Landdag in Sleswig-Holsteen, Martin Kayenburg un Bildungsministerin Ute Erdsiek-Rave hebbt dit Johr an’n 17. Juli in Kiel jüst as vergangen Johr wedder Scholen in dat Bundsland mit dat Plattdüütsch-Schoolsegel uttekent. Dat Segel kriegt de teihn Scholen dor för, dat disse Scholen dat Plattdüütsche fördern un plegen doot.

Dat Segel kregen hebbt de Grundschool Oelixdörp, de Grundschool Fleckeby, de Gertrud-Lege-School in Reinbek, de Grundschool Wewelsfleth, de Albinus-Realschool in Launborg, de Grundschool Enge-Sande, de Theodor-Mommsen-School in Garn, de Grundschool Landkarken op Fehmarn, de Realschool Niebüll un de Grundschool Büchen. Utwählt hebbt disse Scholen de Lüüd vun’e AG Bildung vun’n Biraat Plattdüütsch bi’n Sleswig-Holsteenschen Landdag ünner Vörsitt vun Frauke Tengler.