Portal:Wikinews/Ruumsond Phoenix lannt op’n Mars
De Ruumsond Phoenix is an’n 25. Mai 2008 an sien Teel ankamen un is kort vör Middernacht (UTC) op de Bavenflach vun’n Mars daalgahn. De Misschoonsbasen harrn vör de Lannen teemlich Bammel, wieldat in de Historie vun de Marsmisschonen faken al Sonden bi de Lannen tweigahn sünd. Lannt is Phoenix nipp un nau 23:38 UTC, man dat Funksignal bruuk vun’n Mars ruchweg ’n Veerdel Stünn, bit ok de Lüüd op de Eer Bescheed harrn, dat de Lannen mit Spood to Enn gahn is. Üm un bi een Stünn later sünd al de eersten Biller vun de Marsbavenflach na de Eer sennt worrn.
De Ruumsond weer an’n 4. August 2007 in’n Rahmen vun dat Mars Scout Programm vun de NASA losflagen. An Boord hett de Sond meist 55 kg Bruuklast, de sik ut verscheden wetenschopplich Redschoppen un Meetinstrumenten tohopen sett. Lannt is se in’t Polarrebeet, woneem Wateries in’n Ünnergrund vermoodt warrt. Dat künn de Grundlaag för dat Entwickeln vun Leven wesen. Phoenix schall mit en Roboterarm den Ünnergrund bit in den Deep vun’n halven Meter op de Tosamensetten un de physikaalschen un cheemschen Egenschoppen ünnersöken.