Portal:Wikinews/Platt op Gut Knoop mit Ines Barber

24. März 2008: De Autorenlesungen Platt op Gut Knoop gaht wieder. An’ 10. April leest Ines Barber ut ehr nieges Book Geiht dat ok’n beten fixer? Los geiht dat Klock söben.

Bekannt is Ines Barber dörch ehr Arbeit bi’n NDR – Welle Nord, wo se af un an bi Hör mol’n beten to to hören is un faken ok bi Vun Binnenland un Waterkant. Eegentlich kümmt se ut Rendsborg, leeft nu in Eckernför. Plattdüütsch hett se al as Kind in ehr Familie lehrt un as de NDR Journalisten söökt hett, de platt schnacken kunn’, hett se sik mellt un arbeit nu al siet söben Johr in de Kultur-un Heimatredaktion bi’n NDR in Kiel.

Bether hett se twee plattdüütsche Böker un een Höörbook ’rutbröcht. Mit veel Plie hett se den Alldag vun sik sülben un anner Lüüd achtersinnig op de Schüpp nohmen un to Papier bröcht.

Korten gifft dat ünner Telefon: 04322/552031 or an de Avendkass’. Gut Knoop liggt bi Kiel in de Gemeen Klausdörp/Olenholt direkt an’ Noord-Oostsee-Kanal.