Portal:Wikinews/Ne’e Regeren in Wales will .cym-Domään ünnerstütten

28. Juni 2007: De ne’e Regeren in Wales will ene .cym-Domään ünnerstütten. Na de Wahlen vun’n 3. Mai för de Natschonaalversammeln vun Wales hebbt sik Labour un de Wales-Partei tohoopfunnen. Deel vun jem Koalitschoonsverdrag, dat Een-Wales-Övereenkamen, is, dat de Walis’sche Spraak offiziellen Status binnen Wales un ok binnen de Europääsche Union kriegen schall. Schall ok mehr daan warrn, dat dat en Daagblatt op Walis’sch geven schall. Un denn hebbt se ok beslaten, dat Wales den Versöök stütten will, ene .cym-Topplevel-Domään för dat Internett intorichten. De schall för Websteden dor wesen, de walis’sche Spraak un Kultur vöranbringen oder bruken doot. De ICANN plaant för 2008 dat Inrichten vun ne’e Topplevel-Domääns. .cym kunn denn de twete Domään na .cat för Katalaansch wesen, de extra för ene enkelte Spraak dor is.