Portal:Wikinews/Kampagnen för Spraakdomääns wüllt tohooparbeiden

22. August 2007: De ICANN plaant för 2008 dat Inrichten vun ne’e Topplevel-Domääns. Bi de letzte Runn 2004 hebbt se de Domään .cat nee inricht. Disse Domään is extra för Websteden, de sik mit de Katalaansche Spraak uteneensetten doot oder in ehr schreven sünd. Dat weer en Signal för annere lüttjere Spraken, de nu ok op egene Domääns luurt, de helpen schöölt Spraak un Kultur in’t Internett beter sichtbor to maken. För dat Katalaansche harr dat ok en groten Sprung bedüüdt un dit Johr gifft dat al 33 Perzent mehr katalaansche Sieden in’t Internett as verleden Johr. Mehr as 22.000 Websteden gifft dat nu ünner de Domääns .cat. In verschedene Kuntreien hebbt sik Kampagnen grünnt, de sik för sone Domääns för ehr Spraak un Kultur insetten doot. De Kampagnen för de Domääns .bzh (Bretoonsch), .cym (Walisisch), .gal (Galizisch) un för de basksche Spraak wüllt nu tohooparbeiden un draapt sik in’n September in Santiago de Compostela (Galizien). Dor wüllt se besnacken, wie dat nu wiedergahn schall un wat se sik bi de ICANN as Packet präsenteren wüllt.