Portal:Wikinews/Heinrich-Schmidt-Barrien-Pries för Jürgen Ludwigs

23. Januar 2008: De Frünneskreis „Dat Huus op’n Bulten“ in Lelendaal hett nu bekannt geven, dat dit Johr de Heinrich-Schmidt-Barrien-Pries an Jürgen Ludwigs gahn schall.

De Frünneskreis „Dat Huus op’n Bulten“ hett dat Vergeven vun’n Barrien-Pries 2006 vun’n Bremer Kulturvereen Freizeit 2000 övernahmen. Dit Johr schall de Frünneskreis den Pries dat eerste Maal in egen Regie vergeven.

Ludwigs kriggt den Pries för sien Insetten för de plattdüütsche Spraak. He hett lang för dat Ansehn vun de plattdüütsche Spraak worven. He hett ünner annern as Schriever vun Schoolböker för Plattdüütsch un dör dat Mitopstellen vun Lehrplään för dat Vermiddeln vun Plattdüütsch in de School in Bremen Kinner mit de Spraak bekannt maakt. Ok hüüt is he noch as Rezitator vun egene Texten un Texten vun annere plattdüütsche Schrievers aktiv.

Jürgen Ludwigs schall den Pries, ene gollene Büst vun Heinrich Schmidt-Barrien, an’n 9. Februar, Klock 11 morgens in de St.-Jürgen Kark in Lelendaal in’e Hand kriegen.