Portal:Wikinews/Bund gifft Geld för INS!

12. Juni 2008: Teihn Johr is dat her, dat de Bundsrepubliek Düütschland 1998 dat Plattdüütsche ünner de Europääsche Sprakencharta offiziell goodkennt hett un dormit toseggt hett, de Pleeg un dat Bewohren vun dat Plattdüütsche to ünnerstütten. Lang weer dor man kuum wat vun to marken. Allens, wat wat kösten dee, güng nich. Nu gifft dat dat eerste Maal wedder en lütten Lichtblick. Dat INS hett bekannt geven, dat de Düütsche Bundsdag dat Institut 2008 tosätzlich mit 50.000 Euro för Projekten ünnerstütten deit. Ünner annern schall dorvun en Plattdüütsch-Kurs op DVD rutbröcht warrn.

Dat is man noch jümmer en lütten Druppen op en hitten Steen, besünners vergleken mit dat Geld, dat annere Spraakgruppen in Europa för de Pleeg un dat Bewohren vun jemehr Spraken kriegt. Liekers is dat doch en positiv Signaal un verschafft dat INS, dat al länger ünner dat knappe Geld lieden deit, nu wedder en beten Speelruum.