Portal:Wikinews/Automaatsch Ruumtransporter op’n Weg na de ISS

9. März 2008: In de fröhen Morgenstünnen, üm 4:03 UTC hett de ESA to’n eersten Maal en automaatschen Ruumfrachter – dat Automated Transfer Vehicle (ATV) – losflegen laten. De Ruumtransporter Jules Verne is mit en Rakeet vun’n Tyyp Ariane 5 vun Kourou afschaten worrn un schall denn na de Internatschonale Ruumstatschoon (ISS) flegen. De Jules Verne flüggt feernstüert, ahn dat en Mannschap an Boord is.

Dat Andocken an de ISS schall na en Flaagtiet vun fief Daag ok vullautomaatsch passeeren. Wenn dat daan is, künnt de Astronauten dor vun de ISS ut ringahn, üm de transporteerten Göder uttoladen un jemehrn anfallen Müll wedder intoladen. Plaant is, dat dat ATV söss Maanden lang andockt blifft. Dorna schall dat belaadt mit ruchweg 6,3 t Müll wedder afleggen un op de Eer to lenkt warrn. Dat ATV is aver blots för den eenmaligen Bruuk: wenn de Frachter sien Deenst daan hett, warrt de mitsams den Müll in de Atmosphäär to’n Vergleihen bröcht.