Pieter Boeles

Vun Wikipedia

Dit Woort hett noch annere Bedüden: kiek dorför ünner Pieter Boeles (Rechtswetenschopper).

Pieter Boeles

Pieter Boeles (* 19. April 1795 in Ferwerd; † 26. April 1875 in Grunneng) weer en Predikant un Spraakwetenschopper.

Boeles is 1795 as Söhn von’n Buur Jetzo Boeles un sien Fro Trijntje Pieters in Ferwerd, Freesland, boren. Sien Theologie-Studium (reformeert) an de Universität Grunneng hett he 1817 mit en Dokterarbeit afslaten. Dat Johr hett he ok in Eel Alberdina Janna Speckman heiraadt. He weer denn Predikant in Pingjum, Noordloaren un Noorddiek. Dor, in Noorddiek, weer he von 1827 bet 1870 an de Stephanuskark.

In disse Tied hett he en Reeg Böker schreven, över Theologie un Karkenrecht, aver ok över Spraakwetenschop. Sien grunnengsch Wöörbook Idioticon Groninganum: vergelijkend woordenboek van den Groningschen tongval is aver to sien Tied noch nich in’n Druck rutkamen. Dat hett eerst Siemon Reker 1997 daan. Dit Wöörbook weer dat eerste grunnengsch Wöörbook.