Paul Wiedenfeld

Vun Wikipedia
Zur Navigation springen Zur Suche springen

Friedrich Wilhelm Ludwig Paul Wiedenfeld (* 1. März 1868 in Berlin; † 6. Juni 1940 in Bremen) weer en düütschen Verwaltungsbeamten.

Wiedenfeld is 1868 in Berlin as Söhn von Agnes, borene Schwartz, un Wilhelm Josef Emil Wiedenfeld boren. Sien Broder weer Kurt Wiedenfeld. He weer in Berlin op de Högere Knabenschool von Dr. Döbbelin un an dat Askanische Gymnasium un denn in Erfurt op Gymnasium. He hett an de Universitäten Lausanne, Leipzig un Berlin Juristeree studeert. In Leipzig is he 1886 Maat von de Burschenschaft Normannia Leipzig worrn. As Eenjohrig-Freewilligen is he 1889 na’t Militär gahn un 1902 Oberleutnant von de Reserve worrn. Na sien Examen 1889 un dat Referendariat hett he 1892 in Leipzig sien Dr. iur. maakt. He güng denn in’n prüüßschen Verwaltungsdeenst un hett bi de Regerung in Marienwerder anfungen. 1894 keem he as Regerungsassesser un Hülpsarbeider an dat Landraadsamt von’n Kreis Hörde, bevör he 1895 an dat Landraadsamt von’n Landkreis Wiesbaden güng. 1898 is he na de Regerung in Liegnitz versett worrn. Von 1902 (bet 1903 toeerst kommissarsch) bet 1917 weer he de Landraad in’n Kreis Bremervöör. 1913 is he gliektiedig Vörsitter von’n Vörstand von’n Elektrizitätsverband Stood worrn. In’n März 1917 güng he as Referent na de Reichsgetreidestelle in Berlin. In dat Johr hett he ok den Rang von en Gehemen Regerungsraad kregen. Aver al in’n November 1917 is he as Landraad in’n Kreis Achem wesselt. 1930 is he Maat in’n Utschuss för Landsplanung in’t Ünnerwerserrebeed worrn. Landraad is he bet 1932 bleven. To’n 1. Oktober 1932 is de Kreis Achem oplööst worrn un Wiedenfeld güng in Rohstand.

He weer ok Afornten in’n Hannöverschen Provinziallanddag.

An’n 8. Dezember 1894 hett Wiedenfeld Agnes Kaufmann freet. De beiden harrn twee Döchter.