Paul Delos Boyer

Vun Wikipedia
Paul D. Boyer (2016)

Paul Delos Boyer (* 31. Juli 1918 in Provo, Utah; † 2. Juni 2018 in Los Angeles) weer en US-amerikaansch Biochemiker, de 1997 gemeensam mit John Ernest Walker un Jens Christian Skou för sien Arbeiten an dat Adenosintriphosphat (ATP) mit den Nobelpries för Chemie uttekent wurr.

Leven[ännern | Bornkood ännern]

Paul Delos Boyer wurr an’n 31. Juli 1918 as Söhn vun den Osteopathen Dell Delos Boyer (storven 1982) un sien Ehefru Grace Guymon (storven 1933) in Provo in den US-Bundsstaat Utah boren. To de Familie hemm noch 5 Geschwister hörrt. De Dood vun sien Moder 1933, de an de Addison-Krankheit dood bleven is (en Hormon- un Stoffwesselkrankheit de dör Unterfunktschoon vun de Nebennierenrinde utlööst wurrd) hett sien beroplich Interesse up dat Fackrebeet vun de Biochemie un speziell up dat Utforoschen vun de Oorsaken vun disse Krankheit lenkt. 1934 hett he de High School in Provo verlaaten un fung en Studium in Biochemie an de Brigham Young University (BYU) in Provo an. Ansluutend is he an de University of Wisconsin–Madison wesselt, de as führend up dat Rebeet vun de Biochemie gull, un hett hier en Tätigkeit as Forschungsassistent antreeden. 1943 hett he dor sien Doktertitel bi Paul H. Phillips mit dat Thema Studies on muscle phosphorylations and on vitamin A and carotene maakt.[1] Nah sien Promotschoon is Boyer an de kalifoornsch Stanford University wesselt un hett hier an en staatlich finanzeert Projekt to de Stabiliseeren un den Gebruuk vun dat Plasmaprotein `Albumin´ bi Bloottransfusionen vun Kriegsbesehrten mitarbeit. Dit Projekt wurr ut militärisch Interesse nah den Inträe vun de USA in den Tweeten Weltkrieg vörandreven. Nah den spoodrieken Afsluss vun dat Forschungsprojekt wurr he, noch kört vör Kriegsenn’n to de US-Marine intrucken. Sien Deensttiet hett he an dat Navy Medical Research Institute in Bethesda (Maryland) maakt. 1946 folg he en Roop an de University of Minnesota in St. Paul – tonächst as Assistenz-Perfesser. Hier kunn he dör intensiv Forschungsarbeit nahwiesen, dat de Synthees vun dat Adenosintriphosphat (ATP) vör allen bi de Enzymaktivität un de Freegaav van dat ATP Energie binnen deiht. Dat weer en entscheeden Ansatz to de wiedere Utforschen vun de tatsächlich Ablööp bi de ATP-Synthees.

Wegen sien wetenschaplich Leistungen wurr he 1953 to’n ordentlichen Perfesser beropen. Bi en ansluutend Forschensupenholt 1955 in Sweden un de hier dörführt Tosommenarbeit mit dat Forschungsteam vun den Nobelpriesdräger Hugo Theorell (1903–1982) kunn he sück noch intensiver mit de Themen vun de Enzyme un de Oxidoreduktase befaaten. Nah sien Rückkehr weer Boyer van 1956 bit 1963 Perfesser för Biochemie an de University of Minnesota, dornah is he 1963 as Perfesser för Chemie an de University of California, Los Angeles wesselt. Hier wurr he 1965 as Direkter vun dat nee grünnd molekularbiologisch Institut insett. Ok hier kunn he sück wieder mit dat Utforschen vun dat Adenosintriphosphat (ATP) befaaten. Wegen sien wetenschaplich Ergevnisse wurr he 1968 in de American Academy of Arts and Sciences, 1970 in de National Academy of Sciences un 1998 in de American Philosophical Society upnommen. In de 1980er Johren kunn Boyer en Modell vörstellen, wu över de ATP-Synthees dat Adenosintriphosphat (ATP) billd wurrd. As Grundlaag hemm hüm dorför langjohrig utforscht biochemische Analysedaten deent. De Korrektheit vun dit Modell wurr dör sien Forschungskollegen John Ernest Walker bestätigt. Disse Erkenntnisse hemm den Biochemikern as de Grundlaag to dat Verständnis vun den Energiestoffwessel in levend Zellen deent.

Van 1985 bit 1989 weer he Leiter vun en biochemisch Programm, dat de wunnen Erkenntnisse wetenschaplich wieder verfolgen dee. Bit to sien Emeriteeren 1989 weer he an dat Department för Chemie un Biochemie vun de University of California, Los Angeles tätig. In‘n Oktober 1997 hörr Paul Delos Boyer, gemeensam mit den däänschen Mediziner un Biophysiker Jens Christian Skou (1918–2018) un den britischen Melekularbiologen John Ernest Walker (boren 1941) to de dree Wetenschapler, de för hör grundleggend wetenschaplichen Erkenntnisse över de binnere Struktur un Funktschonswies vun twee zentraal Enzyme to de Energieversörgen vun Zellen mit den Nobelpries för Chemie uttekent wurrn.[2]

1939 hett Paul Delos Boyer Lydia Wickerheiraadt, mit de he dree Kinner harr. Paul Delos Boyer is kört vör Vullennen vun sien 100. Levensjohr, an’n 2. Juni 2018 in Los Angeles storven.

Wark[ännern | Bornkood ännern]

As ok sien Kollegen Skou un Walker hett sück Paul Delos Boyer vör allen mit Enzymen, de de Arbeit vun dat Adenosintriphosphat, den Hööftenergieleferanten in‘n Metabolismus vun de Organismen, katalyseeren. He un Walker hemm sück dorbi vör allen up de Synthees vun dat ATP dör dat Enzym ATP-Synthase konzentreert. Dat stellt ut dat Adenosindiphosphat (ADP) un en wieder Phosphatmolekül dat ATP her, indem he disse beid ananner binnen deiht. Boyer kunn all in de 1950er Johren nahweisen, dat disse Vörgang vör allen bi de Enzymaktivität un de Freegaav vun dat ATP Energie binnd statt as bit dorhen annommen dör de Binnen vun dat ADP an dat Phosphat.

In de 1980er Johren stell Boyer en Modell vör, wu över de ATP-Synthase dat ATP billd wurrn kunn. As Grundlaag hemm hüm biochemische Analysedaten deent. De Korrektheit vun dat Modell wurr vun Walker dör Strukturanalysen vun dat Enzyms bestätigt. Beid hemm entsprekend wesentliche Grundlagen to dat Verständnis vun den Energiestoffwessel in levend Zellen leefert.

Literatur[ännern | Bornkood ännern]

  • David Eisenberg: Paul D. Boyer (1918–2018). In: Science. Band 361, Nr. 6400, 2018, S. 334
  • Richard L. Cross: Paul Delos Boyer (1918–2018). Nobel laureate in chemistry who discovered nature’s smallest rotary motor. In: Nature. Band 560, 2018, S. 308

Weblinks[ännern | Bornkood ännern]

Enkeld Nahwiesen[ännern | Bornkood ännern]

  1. Levensdaten, Publikatschonen un Akadeemsch Stammboom vun Paul D. Boyer bi academictree.org, afropen an’n 15. April 2020 (engelsch)
  2. Informatschonen vun de Nobelstiftung to de Priesverlehn 1997 an Paul Delos Le Boyer