Otto Wachs (1874–1941)
Otto Julius Ludwig Wachs (* 16. Juni 1874 op Good Hanerau; † 23. März 1941 in Wittenbarg) weer en düütschen Verwaltungsbeamten.
Wachs is 1874 as Söhn von Helena Wilhelmine, borene Mannhardt (1832-1891), un Hans Heinrich Wachs (1822-1895) op Good Hanerau boren. Von Oostern 1889 af an weer he op dat Gymnasium Plön un hett dor an’n 20. März 1893 sien Abitur maakt. He hett Juristeree studeert, toeerst bet Harvst 1894 an de Universität Marburg, denn een Semester an de Universität Freiburg un toletzt an de Universität Berlin. 1893 is he Maat von dat Corps Hasso-Nassovia Marburg worrn[1] un 1894 von dat Corps Suevia Freiburg.[2] In Berlin hett he an’n 26. Juni 1896 sien eerst Staatsexamen maakt. He hett 1896 sien Dokterarbeid över dat Thema Der Antheil des deutschen Kaisers an der Gesetzgebung in den Reichslanden schreven.
In dat Johr is he Referendar worrn un 1898 Regerungsreferendar. 1901 is he as Regerungsassesser in’n prüüßschen Staatsdeenst övernahmen worrn un keem as landrätlicher Hülpsarbeider bi dat Landraadsamt na Helgoland. Von 1905 bet 1907 weer he Hülpsarbeider bi dat Landraadsamt von’n Kreis Süderdithmarschen.
He is 1907 as Nafolger von Max Fischer Landraad von’n Kreis Jörk worrn un dat bet 1911 bleven, as em Erich Moewes aflööst hett. He is denn na’n Kreis Süderdithmarschen versett worrn un hett dor Graf von Bylandt-Rheydt aflööst. Dor is he bet 1919 bleven, as Oskar Fröhlich sien Nafolger worrn is.
Von 1921 bet 1938 weer Wachs Maat von’n Bezirksutschuss un dat Bezirksverwaltungsgericht in Sleswig. Von 1922 bet 1937 hett he to’n Vörstand von de Landsbank von de Provinz Sleswig-Holsteen höört. Na 1937 hett he in’n Rohstand in Kitzbarg bi Kiel leevt.
Wachs hett 1906 Irmgard Nieper ut Gosler freet, mit de he twee Döchter un twee Söhns harr. Sien Söhn weer de Bankier un Olympiadeelnehmer von 1936, Otto Wachs.