Osten Strohm
De Osten Strohm (ok Ost Stroom, na den Stroom Oost) weer en Waalfänger, de vun 1767 bet 1777 op Gröönlandfohrt güng.
Historie[ännern | Bornkood ännern]
1766 hett de Geversdörper Ünnernehmer Johann Thumann dat Schipp Osten Strohm utrüsten laten. 20.000 Rieksdaler harrn Aktionäre dorför opbrocht. De Anlegger weren meist rieke Buern ut de Maschen in de Ümgegend. Thumann harr dat Schipp in’t Vörjohr 1766 in Amsterdam köfft un na Neehuus an de Oost brocht. De Schippstyp is nich mehr bekannt.
An’n 16. April 1767 is dat Schipp för de eerste Fohrt ünner Kummandör Jan Adriansen Breed na Gröönland rut. De Osten Strohm keem an’n 1. September mit blots en halven Waal trüch, den se tohoop mit en Hollanner in Mackerschop fungen harrn un de 53 Quardeel Traan un 34 Quardeel Speck bröch. De duerhaftige Noordwind harr dat Fangen swoor maakt. De Kummandör weer noch na’t Weygatt seilt, aver ok dat harr nix nützt. Date Fang möök Innahmen vun 4.050 Hamborgsche Mark. Vitalien un Hüer möken aver 5.500 Mark, so dat de Fohrt keen Gewinn inbröcht harr. De twete Fohrt 1768 bröch aver en goden Fang un Traan un Speck hebbt 21915 Lujedor inbrocht. Dat geev ene Dividend vun 50 bet 60 Perzent vun de Inlaag. Doch toglieks weren ok en poor Lüüd bi de Fohrt op See bleven un welk krank worrn. Ok weer de Geschäftsföhreree vun Thumann so undörsichtig, dat de Anleggers dat gemeensame Ünnernehmen oplösen wullen. Doch de Verdrag weer op söss Johr fast un se kemen dor nich rut. Welk vun de Anleggers hebbt jemehr Andelen denn verkööpt.
In de Johren, de nu kemen, geev dat jümmer lüttje Gewinnen. 1773 wessel de Kummandör un nu harr J. Teunies dat Leid. Doch siene Fangtallen weren nich good. As he 1775 mit’n lerrig Schipp trüchkeem, hebbt se 1776 C. Christoffersen to’n Kummandör maakt. As de Fang 1777 weer so lütt weer, geven se’t Waalfangen mit den Osten Strohm na. Annere Waalfängers sünd aver ok later noch vun de Oost ut rutföhrt.
Fang[ännern | Bornkood ännern]
| Johr | Tiet | Waalfisch | Quardelen Speck | Quardelen Traan | Pund Borten |
|---|---|---|---|---|---|
| 1767 | 16. April - 1. September | ½ | 34 | 53 | ? |
| 1768 | 30. März - 3. September | 7¼ | 122 | 181 | 3100 |
| 1769 | bet 18. August | 3½ | 80 | 121½ | 2921 |
| 1770 | bet 14. August | 4¼ | 268 | ? | 7164 |
| 1771 | bet 2. September | 1⅓ | 66 | ? | ? |
| 1772 | 5¼ | 281 | ? | 7225 | |
| 1773 | bet 16. September | ½ | 30 | ? | ? |
| 1774 | bet 7. August | 3½ | 120 | 177 | ? |
| 1775 | lerrig | - | - | - | |
| 1776 | bet 17. August | 4 | 27 | 68 | ? |
| 1777 | 1½ | 20 | ? | ? |
Weblenken[ännern | Bornkood ännern]
- to’n Waalfang vun de Oost ut (hoochdüütsch)