Oliver Bierhoff

Oliver Bierhoff (* 1. Mai 1968 in Karlsruhe) is en ehmalger düütsch Footballspeler.

De Störmer speel van 1974 bit 1980 för de Essener SG 99/07, 1978 bit 1986 för Schwarz-Weiß Essen, 1985 bit 1988 för Bayer 05 Uerdingen un 1988/89 för den Hamburger SV. 1990 keem he för Borussia Mönchengladbach to’n Insatz, bevör hüm dat in’t Utland verslahn dee. In 73 Bundsligaspelen keem he up 10 Doren.

In de Saison 1990/91 weer he bi SV Casino Salzburg ünner Verdrag un wessel dornah bit 1995 to Ascoli Calcio. Dornah speel he dree Johr för Udinese Calcio un denn van 1998 bit 2001 för AC Mailand, mit de he 1999 italieensch Meester wurr. 2001/02 speel he bi AS Monaco un de Saison dorup bi AC Chievo Verona.

För de düütsch Natschonalmannschap hett he van 1996 bit 2002 insgesamt 70 Lännerspelen maakt un dorbi 37 Doren schaaten. Sien wichtigst Door weer dorbi dat „Golden Goal“ bi de Football-Europameesterschap 1996, wat de Düütsche Mannschap den Europameestertitel inbroch. In dat Johr 2000 hörr he ok den Kader to de Europameesterschap an.

In de Johren 1998 un 2002 speel he ok bi Football-Weltmeesterschapen und wurr 2002 Viezweltmeester.

He weer siet Juli 2004 Funktschonär bi den DFB, tonächst as Manager för de düütsch Natschonalmannschap vun de Mannlüüd, af 2018 een vun veer DFB-Direkters un siet 2022 as „Geschäftsführer Nationalmannschaften und Akademie“. Nah de schlecht för Düütschland loopen Football-Weltmeesterschap 2022, de hüm völ Kritik inbrocht harr, hett he sien Verdrag mit den DFB noch in'n Dezember uplööst.

Ehrungen

Oliver Bierhoff weer 1998 Footballer vun dat Johr in Düütschland.

Borns

• Bernd Rohr, Günter Simon: Fußball-Lexikon, 2004 Copress Verlag, ISBN 3-7679-0829-8