Nikolaus Krage

Vun Wikipedia
Zur Navigation springen Zur Suche springen

Nikolaus Krage (* in Lüchow; † 1559 in Soltwedel) weer en evangeelsch Theoloog un de Reformater vun Minden.

Leven[ännern | Bornkood ännern]

As Prediger weer Krage in Stoltenau an den Hoff vun Graaf Erich vun Hoya togange. In’n Dezember 1529 kemen dor Börger vun Minden hen un wollen ek in jem ehre Stadt holen. Nah länger Verhanneln weer de Graaf dor mit inverstahn. Mag angahn, se hefft em bi siene Predigten kennenlehrt. Krage füng nu an un predig in all Karken vun de Stadt. Bito schreev he de „Christlike Ordeninge der Erlyken Stadt Mynden“. Düsse Ordnung is keen sülvstännig Arbeit. Dat meiste hett Krage vun Johannes Bugenhagen sien „Der Erbaren Stadt Brunswiek Christlike Ordeninge“ övernahmen. In’n Februar 1530 is dat Wark in Lübeck druckt wurrn. As Minden düsse Ordnung annehm, bedüüd dat: Vun nu af an harr in de Stadt de Reformatschoon dat Seggen.

De Preesters un Mönke vun den olen Gloven mössen rut ut de Stadt. Ok de Domherren sünd aftrocken, man se füngen bi dat Kammergericht vun dat Riek en Prozess an. Am Enn keem dat sowiet, dat 1538 de Rieksacht över Minden utspraken wurrn is.

De „Christlike Ordeninge“ weer de eerste evangeelsche Karkenordnung in Westfalen. As de bekannt maakt wurrn weer, stell Krage 19 Thesen up un slöög de an jede Karkendöör in de Stadt un woll dor över disputeern. Man as sik dor nümms för mellen dö, wurr he allgemeen as de Winner ansehn.

Vunwegen dat he de Gemeende nah de Predigten üm sik sammel, keem he in Verdacht, he höör to de Swööggeisters hento. Vunwegen sien bullerballerige Oort kreeg he ok Striet mit den Raat vun de Stadt. So, as he sik upföhrn dö, seeg dat so ut, dat he in’n Unrecht weer. Vunwegen dat de lüttjen Lüde achter em stünnen, wurr he ok as en Mann ankeken, de de Lüde upsternaatsch möök. Een Tiet lang föhr he noch dat Woort in den Fischerwiek, man as he versöch, vun dor ut de Macht in de Stadt an sik to rieten, hefft se em rutsmeten un nah Stoltenau torüchbröcht.

Man dor konn he ok nich blieven. He güng nah Holsteen, man nargens wollen se em so richtig hebben. Man 1543 schaff he dat doch un is denn Prediger an’n Hoff vun Christian III. in Kopenhagen wurrn. 1547 möss he de Stadt wedder verlaten. Vun 1553 af an hett he sien lesten Johren in Soltwedel in de Ooltmark tobröcht.

Böker[ännern | Bornkood ännern]

  • Nikolaus Krage: Christlike Ordeninge der Erlyken Stadt Mynden, Rutgeven vun de Stadt Minden, Minden, 1980 mit hochdüütsch Översetten vun Hermann Niebaum un Timothy Sodmann
  • Dansk: Biografisk Lexicon 5, Kopenhagen 1934, Siet 445
  • Robert Stupperich: Entstehung der Gymnasien in Minden. (Land u. Leuten dienen) Minden 1980
  • M. Krieg: Das Chronicon domesticum et gentile des Heinrich Piel, Mönster, 1981
  • Hans Nordsiek: Von Lüchow nach Salzwedel - auf den Spuren des Mindener Reformators Nicolaus Krage, in: Mitteilungen des Mindener Geschichtsvereins, 53/1981, S. 51-106.