Niels Peter Høeg-Hagen

Niels Peter Høeg-Hagen (* 15. Oktober 1877 up dat Goot Gundersted bi Nibe, Jütland; † 15. November 1907 up Gröönland) weer en däänsch Offizier, Kartograf un Polarforscher. He is 1907 wiels de Danmark-Expeditschonen up en Schleddenreis to den Independence-Fjord in Nordostgröönland gemeensam mit den Expeditschoonsbaas Ludvig Mylius-Erichsen un den Hunnenschleddenführer Jørgen Brønlund to Dood kommen.

Leven

Høeg-Hagen weer de Söhn vun Jacob Bernhard Høeg-Hagen (1843–1913) un de sien Fru Ludovika Vilhelmine Bie (1847–1922). Mit elf Johren keem he mit sien Öllern nah Kopenhagen un later nah Holbæk, wo he de Realschool besöcht hett. As Wehrplichtiger bi de Infanterie hett he sück dorför entscheeden, de Offiziersloopbahn intoslahn. Nah den Besöök vun de Offiziersschool wurr he 1900 to’n Premierleutnant befördert.

As Mylius-Erichsen 1906 sien Mannschap för de Danmark-Expeditschoon tosommenstellen dee, deren wesentlich Teel de Upkloren vun den letzten noch unbekannten Küstenverloop in’ Nordosten vun Gröönland weer, hett Høeg-Hagen up den Posten vun en Kartografen utwählt, de sück dorup bewurben harr. Dat Expeditschoonsschipp Danmark gung in’ August in Danmarkshavn in’n Süüden vun Germanialand vör Anker, wo de Expeditschoonsmannschap nahe den 77. Breedengrad överwintern dee. An’ 28. März 1907 sünd twee Schleddenteams in Richt Norden fohren. Nahdem dat eerste Team ünner de Leitung vun Johan Peter Koch (1870–1928) Kap Bridgman in Pearyland reckt un dat tweete, vun Mylius-Erichsen leit Team den Danmarkfjord erforscht harr, hemm sück de beid Mannschapen an’ Kap Rigsdagen weer drapen. Wiels Koch to de Danmark torüch gung, is Mylius-Erichsen mit Høeg-Hagen un Brønlund to’n Independence-Fjord fohren, um dorvan Koorten to teken. Dorbi keem de Mannschap aber över de Tiet weg un kunn wegen dat insetten Dauweer mit de Rückreise to dat Basislager nich vör den Harvst anfangen. Dör Hunger un Kolt swächt sünd de dree in’ November 1907 storven. Koch hett den dooden Brønlund un Kortenskizzen vun Høeg-Hagen 1908 in Lambertland funnen. Mylius-Erichsen un Høeg-Hagen hett man aber nich weer funnen.

In Nordostgrönland sünd de Gletscher Hagen Bræ un de Hagenfjord, in de he kalvt, ebenso nah Niels Peter Høeg-Hagen nömmt as dat Eiland Hagen Ø, up de Høeg-Hagen in’ Harvst 1906 twee Daag verbrocht hett.

Literatur

G. Amdrup: Report on the Danmark Expedition to the North-Easr Coast of Greenland 1906–1908. In: Meddelelser om Grønland 41, 1913, S. 1–270.
Spencer Apollonio: Lands that Hold One Spellbound; University of Calgary Press, 2008, ISBN 978-1-55238-240-0, Sieden 101–120

Weblenken

Niels Peter Høeg Hagen. Mehr Biller, Videos oder Audiodateien to’t Thema gifft dat bi Wikimedia Commons.

N. P. Høeg Hagen in dat Dansk Biografisk Leksikon (däänsch)