Poseidon

Poseidon (Ποσειδῶν) is in de greeksche Mythologie de Gott vun de See un den Zeus sien Broder. He is en vun de twolf Olympiers. Dat Peerd is em hillig.

In de Mythologie vun de Etruskers is he mit Nethuns öbereen sett wurrn, in de Mythologie vun de Römers is he as Neptun ankeken wurrn. Deep ünner de See steiht sien Palast ut Kristall.

Wat vun Poseidon vertellt warrt

Geboort un Kinnertiet

Just as Zeus is Poseidon de Söhn vun Kronos un Rhea. As he boren wurrn weer, hett sien Vadder em dalslaken, just so, as de annern Kinner. Man Zeus, de tolest boren weer, büx ut. Later hett he Poseidon un de annern Geswister rett’. As denn later de Welt in dree Rieken updeelt wurrn is, kreeg Zeus den Himmel, Hades kreeg de Ünnerwelt un Poseidon füll de Eer tohopen mit den Ozean to (greek.: Ωκεανός).

Ehfro un Leevsten

Poseidon weer verheiraat mit Amphitrite. Mit ehr hett he de Söhns Triton un Michelus un de Döchter Rhode un Benthesikyme kregen.

Faken hett he aber wat mit anner Froonslüde harrt, sünners mit de Nymphen vun de See, dat weern de Nereiden un de Okeaniden. Mit jem tohopen hett he noch allerhand Kinner tüügt. Dor weer de Rees Orion bi un dat Peerd Arion un ok Polyphem, de Kyklop mit dat ene Oog, de Minschen freten dö. Dor keem noch Pegasus to, dat Peerd, dat flegen konn. Em hett he mit de Medusa tüügt. Tein Kinner harr he alleen mit Kleito, en Minschendeern, de ganz alleen up de Insel Atlantis leben dö. De Ringer Kerkyon weer ok sien Söhn. Man nich bloß Froonslüde hett he leev harrt. Nee, ok achter den jungen Pelops weer he ran. Em hett he wunnerbore Peer schunken for sien Wagen.

Sagen

Athene un Poseidon harrn sik in’e Klatten, wer denn nu öber Attika regeern scholl. De König vun dat Land weer Kekrops I.. He hett fast leggt: Beide Gödder schollen de Minschen in Attika en Geschenk maken. Wen sien Geschenk beter weer, de scholl denn Baas öber Attika ween. De Wettstriet funn an de Steed statt, wo later de Akropolis boot weern scholl. Poseidon stött mit sien Dreefork in den Steen un dor keem dor en Born mit frischen Water herut. Athene maak dat anners: Se plant den eersten Öölboom för de Atheners. Kekrops woll nu düssen Boom hebben un de Hööftstadt vun Attika hett dor vun den Naam Athen kregen. Poseidon weer dor so vergrellt öber, dat he em up en Schipp up de See utsetten dö. Un he verdamm em, dat he dor nich ehrder wedder dal keem, as he sturv oder as de Leev em vun düssen Fluch free maken scholl. Nie nich wedder scholl he an Land kamen. Man Athene geev em ewig Leben. So kann he hopen, eens Dags noch mol vun sien verdammten Pott rünner to kamen.

Een Mool harrn Poseidon un Apollon sik öber Zeus lustig maakt. Dor mössen se den König Laomedon vun Troja to Deensten ween. De sä, se schollen man grode Muurn rund üm de Stadt ümto boon. Wenn se dor fardig mit weern, denn woll he jem ok rieklich belohnen. Man denn hett he düt Verspreken nich holen un woll jem sunner Lohn wedder los weern. Dor weer Poseidon so vergrellt, dat he dor en gruulichen Seedraken henstüür. Nu möss Laomedon sien egen Dochter Hesione opfern, dat de Draken de Stadt denn tofreden leet. Man Herakles hett ehr rett un hett se mit sien Fründ Telamon tohopen bröcht.

Kultus

Herodot meent, Poseidon stamm egentlich ut Libyen af. He weer ok an un for sik dat Orakel vun Delphi sien Gott. Man dat hett Apollon denn öbernahmen. Tohopen mit Athene is he ok de Schutzgott vun Athen ween. Ok de Stadt Pylos hett he unner sien Flunken nahmen. In Eleusis gell he as Vadder vun den König Oilmophos un in Troizen wurr he as den Theseus sien Vadder ankeken. Em to Ehren is ok noch en Hippioskult inricht wurrn, vunwegen dat dat Seepeerd (greeksch: Ἵππος) to sien Kennteken hören dö.

Seelüde beden to Poseidon, dat se goot ankemen un bröchen em Peer as Opper. De smeten se in de See. Wenn he vegnöögt weer, denn maak he nee Eilannen un sorg dor för, dat de See still weer un dat een dor goot öberweg keem. Wenn he vergrellt weer, denn steek he sien Dreefork in’e See un denn güng dat oorntlich tokehr mit Eerdbeven, Floot un Storm.

Kunst

In de Kunst warrt Poseidon afbillt mit en Strietwagen, de vun grode „Hippokampen“ (dat sünd Seepeer) trocken warrt. Faken hett he sien Dreefork in’e Hand un Delphinen speelt üm em to. Af un an is he tohopen mit Athene to sehn, vunwegen jem ehren Striet üm Attika. Faken gifft dat ok Biller, wo he mit sien Fro Amphitrite Hochtiet höllt. Dor sünd denn ok jümmers Triton un de Nereiden bi. So en Bild kann en bi den groden Soot in de Gaarns vun Versailles bewunnern, man ok up den Domshoff in Bremen. In dat Nationalmuseum vun Athen steiht dat antike Standbild vun den „Poseidon vun Kap Artemision“. Dat is ut Bronze maakt un grötter, as en Minsch.

Literatur

Besunners bekannt is de öbergrode Haat vun Poseidon gegen Odysseus in de Odyssee vun Homer. Dor steiht ja ok in, dat Odysseus den Poseidon sien Söhn Polyphem dat Ogenlicht wegnahmen hett.

In Platon siene Dialogen öber Atlantis steiht to lesen, dat Poseidon de Stammvader vun de Herrschers vun Atlantis is.

Weblinks

Poseidon. Mehr Biller, Videos oder Audiodateien to’t Thema gifft dat bi Wikimedia Commons.

Poseidon hett Pelops leev (engelsch)