Neetz (Stroom)

Neetz
Laag	Neddersassen
Stroomsystem	Elv
Läng	53 km
Afströömrebeed	174 km²
Born	bi Süschendörp (op 48 m över NN)
Münn	in Fohrnholt in de Ilmenau (op 2 m över NN)
Water je Sekunn	0,991 m³/s
linke Blangenströöm	Strachau, Kalberlah, Sommerbeek, Muusdaalbeek, St.-Vitusbeek, Strangengraven
rechte Blangenströöm	Harmsdörper Beek, Brookwetter, Maschwetter
Seen	Reihersee, Bourmer See
Brügg över de Neetz bi Bourm

De Neetz is en 53 Kilometer langen Stroom in’n Noordoosten von Neddersassen, de von rechts in de Ilmenau münnt.

Verloop

De Born von de Neetz liggt bi Süschendörp an’n Noordrand von de Göhr, dicht bi de Bundsstraat 216. Von dor flütt de Beek eerst en lütt Stück na Süüdwesten un ünner de Wendlandbahn ünnerdör. De Neetz dreiht denn bilütten op Noordwest un bi Neetzendörp flütt de Beek al wedder ünner de Wendlandbahn dör. En Stück wieder hett de Neetz fröher de Neetzendörper Möhl andreven. Bi Buundörp münnt von links de Strachau un de Neetz geiht twüschen Quickborn un Dahlenborg dör. In’n Noorden von Dahlenborg münnt von links de Wappau/Kalberlah in de Neetz. Kort later geiht de Bundsstraat 216 mit en Brügg över den Beek röver. Nu flütt de Beek twüschen Marienau un Rieckling dör un nimmt von links de Sommerbeek op. Bi Ellern münnt von rechts de Harmsdörper Beek in de Neetz. De Stroom löppt nu dör Wiechel un Themsborg un nimmt in Süttdörp von links den Muusdaalbeek un den St.-Vitusbeek op. In Neetz gaht de Landsstraat 221 un de Bahnlien Lümborg–Bleikd över de Neetz weg. De Stroom geiht nu an Nee Bollesen un Neemöhlen langs. Bi Walmsworth in de Neegd von Bookelkaten fangt de Neetzkanaal an, de von hier op direkten Weg na de Ilmenau bi Wittörp löppt (un von dor wieder as Ilmenaukanaal).

Disse Kanaal is in dat 19. Johrhunnert anleggt worrn un nimmt vondaag den grötteren Deel von dat Water ut de Neetz op.

De ole Loop von de Neetz geiht wieder na Noordwesten an Grävenhoorn langs un nimmt bi Echen von links den Strangengraven un von rechts de Brookwetter un de Maschwetter op. In’n Westen von Echen geiht de Elv-Siedenkanaal över de Neetz weg. De Stroom flütt wieder dör Fischhusen un verbredert sik op dat Stück vör Lüürshusen to’n Reihersee. Bi Lüürshusen geiht ok de Bundsstraat 209 över den Stroom weg. Von’n Eekhagen in’n Westen von Lüürshusen ut weer de Neetz fröher mit’n Metzensee un de Ilau in’n Noorden un mit’n Bourmer See in’n Süden verbunnen. Över den Bourmer See is dat Water ut de Neetz över Bourm un Horborg in de Ilmenau flaten.

In’n Eekhagen is 1621 en Slüüs un 1625 en Damm boot worrn, dat dat Water nich mehr na Noorden na de Ilau fleten kann.

Nadem mit’n Ilmenaukanaal de Ilmenau in en nee Bedd leggt worrn is, warrt faken ok de ole Loop von de Ilmenau as Deel von de Neetz ansehn. De güng von Horborg na O’rshusen (mit Brüggen von de Bundsstraat 404 un de Bahnlien Winsen–Meschacht) na Fohrnholt. Dor drippt de ole Loop von de Ilmenau wedder op den Ilmenaukanaal.

Dat Water flütt von de Ilmenau in de Elv un wieder in de Noordsee.

Watergööd

De Neetz hett to’n groten Deel de Watergööd-Klass II: mäßig belast (betamesosaprob). Utnahm is dat Stück in’n Noorden von Dahlenborg. Hier is de Watergööd II–III: kritisch belast (beta- bet alphamesosaprob). Dat liggt an dat Water, dat ut de Strachau toflütt: de Beek is deelwies stark verschmutzt (Göödklass III).

Weblenken

Neetz (Stroom). Mehr Biller, Videos oder Audiodateien to’t Thema gifft dat bi Wikimedia Commons.