Michael John Smith

Nasa-Upnahm vun Mike Smith

Michael John „Mike“ Smith (* 30. April 1945 in Beaufort, North Carolina, USA; † 28. Januar 1986 bi Cape Canaveral, Florida) weer en US-amerikaansch Marinefleger un Astronaut , de bi de Challenger-Katastrooph to Dood keem.

Militärloopbahn

Smith hett 1963 de High School in Beaufort afslooten un hett denn an de United States Naval Academy in Maryland Marinetechnik studeert. Nah sien Bachelor, den he 1967 kreeg (vun de 893 Afsolventen vun den Johrgang belegg he Platz 108), gung he an de Naval Postgraduate School in dat kalifornsch Monterey un kreeg en Johr later en Master in Luftfohrttechnik.

Nah sien Gradueeren wurr Smith in Texas to'n Marinepiloten utbildt un weer denn as Utbilder an dat Advanced Jet Training Command tätig. Af dat Fröhjohr 1971 deen he up den Floogtüüchdräger „USS Kitty Hawk“ as Pilot in' Vietnamkrieg. Nah den Krieg wurr he in Maryland an de United States Naval Test Pilot School (USNTPS) to'n Testpiloten utbildt. In' Ansluss an dat Examen hett he af 1974 an de Entwicklung vun en Teelerkennungssensor för de A-6E „Intruder“ arbeit. 1976 kehr he för eeneenhalv Johren as Utbilder an de USNTPS torüch, bevör he mit en Eenheit an Bord der USS Saratoga in't Middelmeer Deenst maakt hett.

NASA-Tätigkeit

Smith wurr in' Mai 1980 för dat NASA-Ruumfohrtprogramm utwählt. He weer een vun acht Piloten, de sück för dat Space Shuttle qualifizeert harrn. Tosommen mit elf Missionsspezialisten billn se de negente Astronautengrupp vun de NASA. De eenjohrig Grundutbillen fung in' Harvst 1980 an.

Nahdem Mike Smith in' Sömmer 1984 sien eerst Ruumfloogmandat kreeg, dat denn aber doch nicht statt funn (he sull Pilot vun de afseggt Mission STS-51-H ween, en Wedderhalensfloog in'n November 1985 vun Spacelab-1-Experimenten, de aber streeken wurr), wurr he in' Januar 1985 to'n Piloten vun STS-51-L nömmt. Hööftupgaav weer bi disse Mission dat Beobachten vun den Halleyschen Kometen. Dat Space Shuttle Challenger is denn an' 28. Januar 1986 um 11:38 Ühr Oortstiet vun dat Kennedy Space Center in Florida afhaben. De anner Crew-Liddmaaten weern Kommandant Dick Scobee, Missionsspezialisten Ronald Erwin McNair, Judith Arlene Resnik, Ellison Shoji Onizuka un de Bruuklastspezialisten Gregory Bruce Jarvis un Sharon Christa McAuliffe. Dör en Leck in den Drievstofftank is de Challenger aber nah 73 Sekunn explodeert un all söben Besattensliddmaaten keemen to Dood.

Nah disse Mission weer Smith all in' September 1985 för de Mission STS-61-I vörsehn ween, de in' Harvst 1986 stattfinnen sull, wegen de Katastrooph vun 51-L aber eerst in dat Johr 1990 as STS-32 dörführt wurr.

Mike Smith wurr up den Natschonalkarkhoff Arlington bisett. He hett sien Fru Jane un dree Kinner achterlaaten. To Ehren vun den Astronauten drocht en Floogplatz an sien Gebortsoort sien Naam (Michael J. Smith Field Airport).

Weblenken

Michael J. Smith. Mehr Biller, Videos oder Audiodateien to’t Thema gifft dat bi Wikimedia Commons.

• NASA: Biografie (engelsch)
• spacefacts.de: Körtbiografie