Judith Arlene Resnik

Vun Wikipedia
Judith Arlene Resnik

Judith Arlene „ Judy“ Resnik (* 5. April 1949 in Akron, Ohio; † 28. Januar 1986 bi Cape Canaveral, Florida) weer en US-amerikaansch Astronaut, de bi de Challenger-Katastroph to Dood keem.

Judy weer de Dochter vun Marvin un Sarah Resnik. Ofschoons hör Öllern jöödsch Inwanderer ut de Sowjetunion weer, hett Resnik den jöödschen Gloov nie leevt. Se hett 1966 hör Afsluss an de Firestone High School makt. In dat glieker Johr hebbt sück hör Öllern scheeden laaten.

Se hett denn wieder studeert un zwar an de Carnegie Mellon University in Pittsburgh (Pennsylvania). De hett se 1970 mit en Diplom in Elektrotechnik afslooten. Dornah hett se bi RCA in Moorestown (New Jersey) un later in Springfield (Virginia) arbeidt, wo se unner annern an Radarsystemen as ok an Höhenforschungsraketen un Telemetriesystemen för de NASA arbeiten dee.

1974 wessel Resnik, de ok en bannig goode Konzertpianistin weer, an dat Labor för Neurophysiologie vun de US-Gesundheitsbehörde in Bethesda (Maryland). Nebenbi schreev se an de University of Maryland an hör Dokterarbeit in dat Fack Elektrotechnik, de se 1977 ok mit de Doktertitel afslooten hett. Glieks dornah nehm se en Stell in de Produktentwicklung vun Xerox in Kalifornien an.

NASA-Tätigkeit[ännern | Bornkood ännern]

1978 wurr se vun de NASA to’n Astronautin utwählt. Mit 28 Johr weer se en vun de jüngsten vun de 35 Kandidaten.

In’ Harvst 1983 hett se hör eerste Mission flogen. An Bord vun de Ruumfähr Discovery weer dat de Mission STS-41-D un se weer een Week ünnerwegens. 3 Satelliten wurrn utsett un Solarzellen up Weltruumdüchtigkeit prüft. Kummandant weer Henry Warren Hartsfield, de sien tweete Mission maken de. De anner Kollegen Michael Lloyd Coats (Pilot), Steven Alan Hawley, Richard Michael Mullane (all Missionsspezialisten) un Charles David Walker (Bruuklastspezialist) hemm all hör eerst Mission flagen.

Resnik wurr denn utwählt as Missionsspezialist för de Mission STS-51-L mit dat Space Shuttle Challenger, de an‘ 28. Januar 1986 um 11:38 Ühr Oortstiet vun dat Kennedy Space Center in Florida afhaben is. De anner Crew-Liddmaaten weern Kommandant Francis Richard Scobee, Pilot Captain Michael John Smith un de Missionsspezialisten Ronald Erwin McNair un Ellison Shoji Onizuka as ok de Bruuklastspezialisten Gregory Bruce Jarvis un Sharon Christa McAuliffe. Dör en Leck in den Drievstofftank is de Challenger aber nah 73 Sekunn explodeert un all söben Besattensliddmaaten keemen to Dood.

Resnik weer schett, harr kien Kinner. En Krater up den Maand un up de Venus un de Asteroid Resnik dragen unner annern hör Naam.

Weblenken[ännern | Bornkood ännern]