Marco Antonio Ferro

Marco Antonio Ferro (* nah 1600; † 1662 in Wien) is en italieenschen Komponisten un Lutenspeler ut de Tied vun dat Barock ween.

Leven

Marco Antonio Ferro is in Wien as Lutenspeler togange ween. In dat Woort vorweg vun de eenzigste Sammlung vun siene Warke hett he sik sülms as „Cavalier Aurato“ (Ridder vun’n Gollen Sporen) betekent un hett sik „Conte Palatino Cesarea“ nömmt. Vundeswegen hett he sachs to de högern Hofflüde vun Kaiser Ferdinand III. tohöört. Wo Ferro herkamen dö, dor weet wi nix over. Siene Musik is in den Stil vun Venedig komponeert. In de Johre vun 1642 bit 1652 un denn wedder vun Oktober 1658 bit 1662 hett he to de Hoffkapell vun Wien tohöört.

Wark

Dat eenzig bekannte Wark vun em is de Sammlung „Sonate a due, tre, quattro strumenti e basso continuo“ Op.1. Dat is 1649 in Venedig druckt wurrn. Dor hannelt sik dat um 12 Sonaten vun een Satz bi. As dat in den dormoligen Stil begäng is, besteiht jede Sonaat ut veer bit fiev Sektschonen. Dor wesselt sik homophone lansame Deele in af mit Adagios, de as Fugen holen sünd. All siene Warke sünd, vun de Kompositschoon ut bekeken, tämlich slicht holen. In de 6. Sonaat finnt sik een vun de eersten Bispeele vun en Loopbass.. Afsnitte, de Funken slaht, wesselt sik af mit unverwachte Dissonanzen, mit afsunnerliche un bizarre Infälle. Dor kann een Ferro sien Stil an utfinnen un de Musikwetenschoppler Hugo Riemann hett an't Enn vun dat 19. Johrhunnert en beten minnachtig vun en „Flicken-Sonaat“, snackt, liek as den Harlekin sien Kostüm..