Mann vun Grauballe

Vun Wikipedia
Wesseln na: Navigatschoon, Söök
Mann vun Grauballe
Grauballemanden2.jpg
Grauballemanden3.jpg

De Mann vun Grauballe is ene Moorliek, de an’n 26. April 1952 bi’t Törfsteken in dat Nebelgårds-Moor vun Grauballe bi Silkeborg in Däänmark opfunnen worrn is.

Üm un bi een Meter deep in’n Törf hett de Törfsteker Tage Busk Sørensen de Liek funnen, as he ehr in’t Schullerblatt steek. He mark, dat dat kene Wuddel weer un hett faststellt, dat dat ene Moorliek weer. Se hebbt Perfesser P. V. Glob bescheid geven, de de Liek denn kumplett utgraven un ünnersöken leet. De Mann vun Grauballe weer in temlich goden Tostand, Hoor, Nagels un Boortstobbels weren all nableven. De Hoor sünd dör dat Moorwater rood farvt, wohrschienlich weren se vörher dunkelblond oder bruun.

Dör de Radiokarbonmethood hebbt se de Moorliek op de Tiet üm un bi 290 v. Chr taxeert.

De Moorliek hett en groten Snitt an’n Hals vun een Ohr to dat annere. Ok Schädel un Scheen weren braken. Sporen vun Kleedasch, Smuck oder annere Saken weren nich to finnen. Siene letzte Mahltiet bestünn ut ene Grütt ut en grote Tall verschedene Soorten vun Koorn un annere Saat. He wiest Teken vun Gicht un Sweren an de Tähnwuddeln, ofschoonst he woll eerst üm un bi 30 Johren oolt weer.

Hüüt liggt de Moorliek in dat Moesgård-Museum in Aarhus.


Commons-logo.svg Mann vun Grauballe. Mehr Biller, Videos oder Audiodateien to’t Thema gifft dat bi Wikimedia Commons.