Madaura

Vun Wikipedia
Wesseln na: Navigatschoon, Söök

Madaura, ok Madaurus, is en ole Stadt vun de Numidiers in dat hüdige Algerien. Toeerst höör Madaura to dat Königriek vun König Syphax, later hett König Massinissa dat innahmen. Syphax weer in den 2. punischen Krieg up de Siet vun Hannibal vun Karthago. Massinissa hett dat mit de Römers holen.

An dat Enn vun dat 1. Johrhunnert nah Christus is Madaura een röömsche Kolonie wurrn. Besunners goot Ansehen harrn de Scholen in düsse Stadt. De antik Schriever Apuleius is in Madaura baren. Apuleius het dat Book De gullen Esel schreben. Dat kann een vundaage jümmers noch kopen.

De Hillige Augustinus studeer een Tiet lang in düsse Stadt. Later hett he an de Inwohners een Breef schreben. Ut düssen Breef kann een sehn, datt in Augustinus sien Tiet veel vun de Inwohners vun Madaura noch keen Christen weeren.

Dree Bischöppe ut Madaura kennt wi vundaag mit Namen. De eerste is Antigonus. He hett dat Konzil to Karthago 349 besöcht. De tweete is Placentius. He besöch dat Konzil vun 407 un een Konferenz vun 411. De drüdde is Pudentius. He weer up een verbaden Bischopskonferenz 484 un is vun de Wandalen ehren König Hunerik, tohopen mit de annern Bischöppe vun düt Dreepen, buten Lands dwungen wurrn.

Hüdigendags is Madaura een dode Stadt. Man schöne Ruinen kann een dor ankieken. Dichtbi liggt de hüdige Stadt Mdaouroch in dat Departement Constantine in Algerien.