Marxistisch-Leninistische Partei vun Düütschland

Logo vun de Partei

De Marxistisch-Leninistische Partei vun Düütschland (afkört: MLPD) is an’n 20. Juli 1982 in Baukem grünnt worrn. Se is ut den KABD entstahn, wat en düütsche kommunistische Lüttpartei wesen is. Dat Bundsamt för Verfatenschuul hett de Partei as linksextremistisch instoopt.

Politische Inholten

De MLPD sütt sik sülvst as en politische Verhoodorganisatschoon vun de Arbeiterklass in Düütschland. Dorna maakt se sik stark för de Perspektive vun’n ne’en Opswung vun den Kamp för den echten Sozialismus. Mit „echten Sozialismus“ is dorbi vun de Partei vör allen de Ansatz vun’n Stalinismus un vun’n Maoismus meent. Na de Ansicht vun de Partei is in de Sowjetunion 1956 op den 20. Parteidag vun de KPdSU de Sozialismus dör en ne’e bürokraatsche Kapitalistenklass toschannen maakt worrn, wat vun de MLPD as Restauratschoon vun’n Kapitalismus betekent warrt. Op den Parteidag, wat de eerste na’n Dood vun Josef Stalin weer, is ünner Nikita Chruschtschow de Entstaliniseeren vun de Partei op’n Weg bröcht worrn, wat vun de MLPD dormit veroordeelt warrt.

De MLPD betekent sik sülvst as Partei vun’n ne’en Tyyp, vun wegen dat se ut de Kritik an’n Verraat an de kommunistischen Idealen tostannen kamen is. Dorut tütt de Partei den Sluss, dat sik de Sozialismus blots op de Grundlaag vun en proletaarsche Denkwies dörkämpen un opboen lett. De Arbeiterklass mutt na’t Störten vun de Diktatuur vun de Monopolkapitalisten un dat Innehmen vun de Staatsmacht de Diktatuur vun’t Proletariat inrichten un de Produkschoonsmiddel in’n gemeensomen Besitt vun't hele arbeiten Volk överföhren. Dat heet, dat de MLPD de Produkschoonsmiddel versellschoppen will. Dorbi betütt sik de Partei op de Theorien vun Karl Marx, Friedrich Engels, Lenin, Josef Stalin un Mao Zedong un verdeffendeert dormit – in’n Gegensatz to meist all annern kommunistisch orienteerten Gruppen in Düütschland – ok dat politische Wirken vun Stalin un Mao Zedong, de allgemeen verantwoortlich maakt warrt för gresige Verstöten gegen de Minschenrechten.

Historie

Grünnen

Grünnt worrn is de MLPD 1982. In de Weeg leidt worrn is de Parteigrünnen vun de MLPD dör den Kommunistischen Arbeiterbund vun Düütschland (KABD), de 1972 grünnt weer. De KABD hett sik vör allen an de Arbeiters richt un harr för sik den Ansprook, de theoreetschen un praktischen Grundlagen för’t Grünnen uvn en „Partei vun’n ne’en Tyyp“ to entwickeln. En bedüden Rull hett dorbi de ehmolige KPD-Funkschonäär Willi Dickhut speelt. He weer vun 1969 bit 1991 för die Schriftenreeg „Revolutionärer Weg“ verantwoortlich.

Inwirken

Bit hüüt künn de MLPD an ehsten in’n industriebedrieflichen Rahmen in Grootbedrieven af un an Macht winnen. Dat is ehr wichtigst Arbeitsfeld. In verschedene nich-gewerkschaftliche Streiks weern Liddmaten vun de MLPD-Bedriefsgruppen vördergrünig bedeeligt. Ofschoonst dat gewerkshaftliche Nichvereenborkeitsbeslüss gifft (to’n Bispeel vun Sieten vun de IG Metall), de en gliektietige Liddmaatschop in de MLPD un de Gewerkschaft utsluten doot, finnt sik MLPD-Liddmaten faken ok in Gewerkschaften un öövt dor deelwies ok Funkschonen ut. Dat hett dorüm ok al Utslüss ut Gewerkschaften geven. To’n Bispeel is de hüütige MLPD-Vörsitter Stefan Engel ut de IG Metall utslaten worrn. Engel hett dorgegen klaagt, is aver in letzte Instanz vun’n Bundsgerichtshoff afwiest worrn (AZ: II ZR 255/89). Siet de Tiet is Engel Liddmaat in de Gewerkschaft ver.di.

Bündnispolitik

De MLPD maakt sik in vele soziale Bewegen stark, as to’n Bispeel in de Fredensbewegen oder in de Bewegen gegen den Sozialafbo (kiek ok Ne’e soziale Bewegen). Sünners isoleeren deit sik de MLPD dör jemehr Verdeffenderen vun Stalin un’t Verharmlosen vun stalinistische Verbreken gegen de Minschlichkeit.

Argdenken un Skepsis löst sünners de Taktik vun de Partei ut, bi Demonstratschonen un Kundgeven vun de Arbeiterbewegen oder annere soziale Bewegen blots roor ünner den egenen Naam optotreden. Dat is en Resultat vun’t Överwachen dör dat Bundsamt för Verfatenschuul. Dör Woortbidrääg vun verscheden MLPD-Liddmaten bi eenieg Akschonen is op disse Wies de Indruck vun en veelsietig Spektrum tostannen kamen, wenn sik de Sprekers as Vertreder vun en Gewerkschaft, de Fronsgrupps Courage oder annere Bündnissen vörstellt. Ahn de Partei to nömen warrt dorbi faken sünnere Positschonen un Telen vun de Partei as Mehrheitsansichten vun de Lüüd dorstellt.

Mit Opkamen vun Massenprotesten gegen de Agenda 2010 un dat Hartz-Kunzept in’t Johr 2004 hett ok de MLPD ehr Insetten starker maakt. Stiegen Liddmatentallen un tallrieke Demonstratschonen, de vun de MLPD oder vun Gruppen, de vun jem bestimmt warrt, organiseert weern, staht in Proportschoon to Optreden, de vun vele annere Hartz-IV-Gegners as bündnisfeendlich un inbillt gegenöver annere butenparlamentaarsche Linke opfaat warrt.

Wahlbedeeligen

Wahlen in Bund un Länner

Bi Wahlen hett de MLPD bi hüüt keen Sitten för sik winnen künnen. Bi de vörtogen Bundsdagswahl 2005 hett de MLPD den Parteien Linkspartei.PDS un WASG en gemeensome Kandidatur vun de linken Parteien vörslahn, worop de beiden Parteien aver nich reageert hebbt. Dorophen is de MLPD 2005 mit egene Landslisten in all sössteihn Bundslänner as ok mit 36 Direktkandidaten to de Wahl antreden un hett dorbi tohopen 45.116 Tweetstimmen (0,1 Prozent) kregen. Dat Resultat hett sik dormit in’n Vergliek to de Wahl Bundsdagswahl 1998 verteihnfacht. Bi de Bundsdagswahl 2002 hett de Partei nich kandideert un hett an de Steed de Börgers to’n aktiven Wahlboykott opropen („Stimmt ungültig!“).

Bi de Landdagswahl in Sassen-Anholt 2006 hett de MLPD mit en opwännigen Wahlkamp ehr opstunns best Wahlresultat vun 0,4 % (4.051 Stimmen) kregen.

Kommunalpolitik

Siet Enn vun de 1990er johren hett sik de MLPD starker de Kommunalpolitik towennt. Na’t Fastleggen vun’n Gelsenkiärkener Parteidag in’n Dezember 1999 is en sy<stemaatsche Kommunalpolitik för de MLPD en nee Feld in de Strategie un Taktik to’n Inbetehen vun de Massen in den politischen Kamp.

Bi Kommunalwahlen arbeit de MLPD tomeist in so nöömte överparteiliche Personenwahlbündnissen mit, de faken ünner de Beteken Alternativ – Unabhängig – Fortschrittlich (AUF) loopt. So stellt de AUF Gelsenkiärken siet 1999 twee Liddmaten in’n Raat vun de Stadt. Een dorvun is Monika Gärtner-Engel, de hüütige Viez-Vörsittersche vun de Partei un Fro vun den Vörsitter. 2001 un 2006 hett ok de AUF Kassel den Intog in’n Stadtraat henkregen. In’n Juni 2004 sünd Wahlbündnissen, de vun de MLPD ünnerstütt weern, in de Stadtrööd vun Iesenack (2 Sitten), Albstadt un Esslingen an’n Neckar intogen. Bi de Kommunalwahlen in’n September 2004 in Noordrhien-Westfalen kregen disse Wahlbündnissen 14 Mandaten in negen Kommunen, dorünner in de kreisfre’en Städer Gelsenkiärken, Mölm un Solingen (elk 2 Sitten) as ok een Sitt in Essen un in Leverkusen. vun 2004 bit 2007 weer de MLPD as Partei kennlich in’n Stadtraat vun Wolfen mit en Stadtraatsche vertreden. Bi de dör de Kreisrebeetsreform vörtogen Kommunalwahlen künn se in’n April 2007 ehr Parlamentsvertreden in de ne’en Stadt Bitterfeld-Wolfen hollen.

Kommunalpolitische Vertreden vun de MLPD un MLPD-nege Gruppen

Stadt	Sitten	Prozent	Wahlbeteken
Albstadt	1	5,4 %	Zukunftsorientiert – Unabhängig – Gemeinsam
Biärgkoamen	2	4,3 %	Bergauf Bergkamen
Bitterfeld-Wolfen	1	1,3 %	MLPD/Offene Liste
Iesenack	2	6,3 %	Eisenacher Aufbruch
Essen	1	0,8 %	Essen steht AUF
Esslingen an’n Neckar	1	2,6 %	Für Esslingen
Gelsenkiärken	2	3,0 %	Alternativ – Unabhängig – Fortschrittlich
Hiätten	1	2,4 %	Alternativ – Unabhängig – Fortschrittlich
Kassel	1	1,7 %	Alternativ – Unabhängig – Fortschrittlich
Leverkusen	1	1,1 %	Lauf Leverkusen
Mölm	2	2,8 %	Wir aus Mülheim
Neukirchen-Vluyn	2	5,3 %	Neukirchen-Vluyn auf geht’s
Solingen	2	2,6 %	Solingen aktiv
Witten	1	1,6 %	Alternativ – Unabhängig – Fortschrittlich

Parteistruktur

Liddmaten vun’t Zentralkomitee Stefan Engel (Vörsitter) Klaus Arnecke Peter Borgwardt (Liddmaat vun’t Sekretariat) Reinhard Funk Monika Gärtner-Engel (Viez-Vörsittersche) Dieter Ilius Günter Slave Klaus Wallenstein Peter Weispfenning Anna Bartholomé (Froenpol. Sprekersche) Otwin Herzig (verantwoortl. f. Bedrief & Gewerkschaft) Roland Meister (Internatschoonalismus-Verantwoortl.) Jörg Weidemann (Pressespreker) Wolfgang Göller (Parteigewarfsföhrer)

Siet de Grünnen vun de Partei 1982 is Stefan Engel de Parteivörsitter. Dat fromelle Recht, över Saken to befinnen liggt bi dat Zentralkomitee vun de Partei. Dorto höört Stefan Engel, sien Fro un Partei-Viez Monika Gärtner-Engel un twölf wietere Parteiliddmaten. Dat Zentralkomitee (ZK) is dat Föhrensgremium vun de MLPD.

De Partei is in Parteigruppen, Oort- un Kreisverbännen as ok Landsverbännen ünnerdeelt. Na egen Vertellen sünd de MLPD un ehr Jöögdverband Rebell in mehr as 450 Öörd in Düütschland vertreden. De Mehrtall vun de Liddmaten vun de MLPD sünd Arbeiters un Anstellte, man dat gifft in jemehr Regen ok en poor Sülvststännige as Dokters un Afkaten. De Partei hett en Andeel an Froenslüüd vun ruchweg 39 %. De Partei gifft butendem an, dat ok Joochschoolgruppen opboet warrn schüllt.

De MLPD hett na en Schätzen vun’n Verfatenschuul 2.300 Liddmaten (Stand vun 2007) un is dormit na de DKP de tweetgröttste kommunistische Partei in Düütschland.

De MLPD höört to de International Conference of Marxist-Leninist Parties and Organizations.

Nevenorganisatschonen

De Kinnerorganisatschoon Rotfüchse schall al Kinner an de Ideologie vun de Partei ranföhren. De Jöögdorganisatschoon heet Rebell. All twee johren organiseert de MLPD mit annere Organisatschonen tohopen en internatschonal Pingstjöödgdrapen in Gelsenkiärken.

Mit de MLPD verbunnen sünd

• de Willi-Dickhut-Stiftung e.V. mit dat Willi-Dickhut-Museum
• de Sellschop to’n Föddern vun wetenschoppliche Studien to de Arbeiterbewegen e.V. (GSA)

Bito sünd mit de MLPD verschedene Kulturgruppen verbunnen as to’n Bispeel de Ruhr-Chor un de Musikgrupp Nümmes in Berlin, as ok de Stuttgarter Hip-Hop-Grupp Rebell Rhymes.

De Froenverband Courage, de sik sülvst as överparteilich betekent, is ok vun de MLPD domineert. Na buten hen is de Partei dorop bedacht, dat de Froenverband unafhangig dorstellt warrt. Dat Inwirken dör de Partei wiest sik in personelle Parallelen un den Ümstand, dat de an sik unbedüdene Verband in de Medien vun de Partei jümmer wedder thematiseert warrt, wiel he in annere Medien kuum acht warrt.

Mit dat Wahlbünsnis AUF, dat in eenige Städer op kommunale Even arbeit, versöcht de MLPD mit eenigen Spood ehr Vertreders in de kommunalpolitischen Strukturen intobringen. Ok AUF warrt na buten as unafhangig dorstellt, liekers dat de Partei dat Bündnis beherrscht.

Ok de „Bundswiete Mandagsdemobewegen“, de ut de Mandaagsdemonstratschoon gegen Sozialafbo 2004 tostannen kamen is un in eenige Grootstäder bit vundaag jede Week lütte Kundgeven organiseert, warrt tomindst siet 2005 as Vörfeldgrupp vun de MLPD ansehn.

Faktisch is mit de Partei ok de Mediengrupp Neuer Weg verbunnen. In jemehrn Verlag warrt dat Parteiblatt un de hele Literatur ut de Partei, as ok de Warken vun jemehr Vördenkers publizeert. Verdragspartner vun den Verlag is de Verdriefskeed people to people, de en Online-Shop hett un op Veranstalten vun de MLPD grundsätzlich mit Stännen to finen is. Verkoopssteden vun people to people gifft dat mitünner in de regionalen Gewarfssteden vun de MLPD. So verdrifft people to people to’n Bispeel de Böker vun’n Parteivörsitter, de in fre’en Hannel kuum Acht finnt, an prominente Steed.

Blangen de nöömten Organisatschonen un Ünnernehmen gifft dat in’t Ümfeld vun de MLPD noch en gröttere Tall vun lütte Gruppen.

Inrichten un Vermögen

Egendorstellen to’t Vermögen

Na egen Dorstellen finanzeert sik de MLPD alleen över de Bidrääg vun de Liddmaten un Spennen, to’n Bispeel in’n Rahmen vun Spennenkampagnen. Na Angaav vun de Funkschonärstietschrift Lernen und Kämpfen, Heft 1/2004, schall dat Trohandvermögen vun de MLPD vun letzten Parteidag in’n Dezember 1999 in Hööch vun 8,5 Millionen bit 2004 op 12,1 Millionen Euro anwassen wesen.

Dat Vermögen vun de Partei is vör allen in Immobilien un Bedrieven anleggt:

• dat Ferien- un Freetietzentrum in Truckenthal in’n Landkreis Sonneberg
• dat Huus Koststraße 8 in Gelsenkiärken (Mieter: Arbeiterbildungszentrum ABZ)
• dat Huus Horster Mitte (ehmolig Sparkassenhuus) as Sitt vun’t ZK un de REBELL-Verbandsföhren in Gelsenkiärken
• dat Huus vun de MLPD-Kreisföhren in Berlin
• dat Huus vun de MLPD-Kreisföhren in Stuttgart
• de Mediengrupp Neuer Weg GmbH in Gelsenkiärken un Berlin mit Druckeree, Verlag, Internetdeensten un Warfagentur

Verwalt warrt dat Vermögen vun’n Vermögensverwaltensvereen Koststraße 8 e. V. (VVV) in Gelsenkiärken. Vereensvörsitter is de Parteivörsitter Stefan Engel.

All hööftamtlichen Mitarbeiters vun de MLPD kriegt na Angaav vun de Partei en Towennen to jemehrn Levensünnerholt vun hööchstens 956,- € netto in’n Maand plus vermögenswirksome Leistungen un en Tosatzrente.

Angaven gegenöver de Bundsdagsverwalten

De Partei hett keen Ansprook op Middel ut de staatlichen Parteienfinanzeeren. In de Bundsdagsdrucksaak 16/1252 is de Rekenschopsbericht vun’t Johr 2003 opföhrt. Dorna hett de Partei in dat Johr ruchweg 2,4 Millionen Euro kregen, dorünner:

• 32 % Bidrääg vun Liddmaten
• 32 % Innahmen ut Vermögen
• 20 % Spennen

Dat Johr 2003 hett de MLPD mit en Överschuss vun 260.000 € afslaten, in’t Vörjohr weern dat 83.000 € Överschuss. För ehr Grött is de MLPD teemlich riek. Dat Reinvermögen bedriggt üm un bi 5,5 Millionen Euro. Blangen kommerzielle Krediten (5 Millionen Euro) un Darlehen vun private Personen (3 Millionen) hett de Partei annere Verbindlichkeiten vun üm un bi 730.000 €. Na egen Utkunft kreeg de Partei in den Tietruum söven Grootspennen över 10.000 Euro. Den gegenöver steiht en Huus- un Grundvermögen vun 11,5 Millionen Euro. Nicht in’t Parteivermögen opföhrt is dat Vermögen vun den Jöögdverband Rebell.

Firmenandelen

De MLPD hollt 96 % vun dat Bookföhrenbüro Essener Str. 86 GmbH in Gelsenkiärken. Offiziell is de Partei nich an wietere Ünnernehmen bedeeligt, ehr Immobilienbesitt warrt in Rekenschopsbericht nich wieter opslötelt. Vun de to’n Vermögensvereen hören Im Waldgrund GmbH & Co. KG hett sik de Partei Boleistungen in fiefstelliger Hööch gootschrieven laten.

Parteipresse

• Rote Fahne, Oplaag jede Week ca. 7.500, Redakschoonsleiter: Jörg Weidemann
• Lernen und Kämpfen, Liddmaten- un Funkschoonärschrift, Oplaag jeed veerdel Johr ca. 1.000
• Revolutionärer Weg, theoretische Schriftenreeg
• Galileo – streitbare Wissenschaft, Blatt vun de Hoochschoolgruppen vun de MLPD
• Rebell, Magazin vun de glieknöömten Jöögdorganisatschoon

Disse Schriften un Blööd warrt in’n Parteiverlag Neuer Weg publizeert.

• Lüttblööd vun de MLPD sünners in Grootstäder, as Vor Ort warrt vun de Kreisföhren Gelsenkiärken rutgeven.

Beobachten dör den Verfatenschuul

De MLPD warrt regelmatig vun’n Verfatenschuul vun Bund un Länner beobacht vun wegen den Verdacht op verfatensfeendliche Akschonen. Na de Inischten, de dorbi wunnen worrn sünd, versöcht de MLPD to’n Bispeel de gegen de Hartz-IV-Gesetten wennten Protesten un Initiativen för sik to nütten, üm verfatensfeendliche Ansichten to verbreden. Alltohopen warrt de Partei aver „...mit lütte Gruppen vun politisch-ideologisch övertüügte Liddmaten eher en sektenglieke Randpositschoon“ naseggt.

Literatur

• Peter Schwarz: Marxismus gegen Maoismus: Die Politik der MLPD, Essen 1987, ISBN 3-88634-032-5

Weblenken

• Offizielle Websteed vun de MLPD
• Websteed vun de Jöögdorganisatschoon Rebell
• Websteed vun’t Wekenblatt Rote Fahne
• Verfatenschuulbericht 2006, Siet 188 (PDF-Datei; 7,27 MB)