Lucy (Australopithecus)

Vun Wikipedia
Lucy ehr Skelett

Lucy is de inoffizielle Naam vun en Skelett vun den Australopithecus afarensis, wat en Aart vun den Australopithecus is. Dor warrt se mit to de Australopithecina rekent. As all Aarden vun düsse Grupp höört se ok to den Tribus vun de Hominini mit to. Man to de Minschen an sik warrt se noch nich rekent. Wetenschopplich hett düsse Fund den Naam AL 288-1 kregen. Dor steiht „AL“ bi för „Afar Locality“ (De Gegend vun Afar). Lucy hett vör um un bi 3,2 Mio. Johren leevt. Den Ökelnaam hett se vun dat Beatles-Leed Lucy in the sky with diamonds kregen. En annern Ökelnaam vun düssen Fund is Dinknesh (Up Amhaarsch: Du Wunnerbore).

De Geschicht vun den Fund[ännern | Bornkood ännern]

Lucy is an'n 30. November 1974 in Hadar in Äthiopien vun Donald Johanson funnen wurrn. Düssen Dag weer he mit den Postdoc Tom Gray unnerwegens an den Fundoort 162. An'n Hang vun ene Kuhlen, de vun en Wadi utspöhlt wurrn weer, hefft se toeerst „en lüttjet Stück vun en hominiden Arm“ un foorts ok de „Achtersiet vun en lüttjen Schädel“ funnen. Dichtbi lä denn ok noch en Bruckstück vun en Böverschenkelknaken.[1] Yves Coppens hett vertellt[2] dat de Knakenstücken, de hier todage kamen weern, toeerst mol gor nich sunnerlich unnersocht wurrn sünd. Dat geev ja al dutzwiese so'n Aart vun Fundstücken in de Gegend. Eerst, as de Fundsteed denn noch mol akraat unnersocht wurrn is, is rutkamen, dat noch annere Knakenstücken vun densülvigen Vörminschen stammen döen. De meisten Forschers meent, dat weer en Froensminsch ween. Dat weer nu en ganz besunnern Fund. As düsse tosätzlichen Fundstücken an'n Avend in dat Forschercamp in'n Kataloog inschreven wurrn sünd, dor spelen de Beatles up en Kasettenrecorder verscheden molen ehre Leeder, dormank dat bekannte Leed vun Lucy in the Sky with Diamonds. Dor hett Lucy denn ehrn Ökelnaam vun weg harrt.

Vun 1975 bit 1980 sünd de Knaken vun Lucy in dat Cleveland Museum of Natural History in Cleveland, USA, vun Johanson akraat unnersocht wurrn. En Reeg vun Afgüss sünd maakt wurrn un achternah hefft de behörden in Äthiopien jem torüch kregen. Vun dor af an sünd de Originalknaken in Addis Abeba unnerbrocht ween.[3]

Vun'n August 2007 af an sünd de Originalknaken in de USA utstellt. Dor geiht vdat bi um geld, dat för de Museen in Äthiopien tohopenkamen schall. Veel Paläoanthropologen hefft dor duchtig över schimpt, dat de Knaken wedder in't Utland bröcht wurrn sünd. Se weern de Meenung, een konn unmööglich weten, of de Knaken amenne in Dutt gahn döen oder of se verschütt güngen. Nu hett dat avers in de USA lang nich so veel besökers geven, as dat dacht wurrn weer. Dorüm is Lucy vun März 2009 af an eerst mol Houston Museum of Natural Science inlagert wurrn.[4]

Vunwegen de Forschung is in de USA en Scan vun de Knaken mit Hölpe vun en Computertomographie maakt wurrn. De is in en dreedimensionale Computersimulatschoon ummuddelt wurrn. Nu kann een sehn, wie dat Skelett vun binnen her upboot is.

Wat funnen wurrn is[ännern | Bornkood ännern]

Lucys ehr Skelett (namaakt) in dat Senckenberg-Museum in Frankfort. Annahmen warrt, dat se up twee Fööt lopen dö.

In de Fackliteratur warrt Lucy meist as Fro vun 25 Johren beschreven. Dat gifft avers ok Forschers, de meent, se weer en Mann ween. Ehr Skelett is en vun de Skeletten vun de Vöröllern vun den Minschen, wo an minnsten vun tweigahn is. Üm un bi 20 % vun dat Skelett sünd funnen wurrn. Wenn een de Hand- un Footknaken nich mitreken deit (dat sünd bi de Hälft vun all Knaken bi en Skelett), denn sünd dat bi 40 %. De Böverschenkel un Schenen, Deele vun dat Becken, vun dat Rüchgraat, vun den Schädel un vun de Armknaken sünd funnen wurrn. So, as dat utsütt, wiest dat Skelett, dat sik düsse Vörminsch anpasst harr an dat Liekup-Lopen. De Naam för de Aart, so as he nu dor steiht, is 1978 vergeven wurrn. Tohopen mit Yves Coppens un Tim White hett Donald Johanson vunwegen den Fund vun Lucy dormols to'n eersten Mol de nee Aart vun den Australopithecus afarensis beschreven.

Dat de Australopithecus afarensis liekup lopen dö, is ok bewiest dör Footstappen, de Mary Leakey in de Vulkanasch vun Laetoli in Tansania funnen hett. William Sellars meent, he weer heel un deel liekup lopen un weer dor twuschen 0,6 un 1,3 m/s (2,16 bit 4,68 km/h slank mit lopen. Dat is berekent wurrn vunwegen de Maten vun Lucy un de Footstappen in Tansania mit Hölpe vun en Modellsimulatschoon.


Belegen[ännern | Bornkood ännern]

  1. * Donald Johanson, Maitland Edey: Lucy. Die Anfänge der Menschheit. Piper, München un Zürich 1982, ISBN 3-492-02738-5; hier ziteert na de nee Utgave vun 1992, S. 16
  2. in en apentlichen Vördrag an'n 15. November 2006 in dat Senckenberg-Museum, Frankfort an'n Main
  3. Science Band 314 vun'n 27. Oktober 2006, S. 574
  4. Lucy's museum tour threatens to become a spell in storage. Nature 457, 2009, S. 775

Literatur[ännern | Bornkood ännern]

  • D. C. Johanson und Y. Coppens: A Preliminary Anatomical Diagnosis of the First Plio-Pleistoice Hominid Discoveries in the Central Afra, Ethiopia. Americal Journal of Physical Anthropology 45, Sept. 1976, S. 217-234
  • D. C. Johanson, T. D. White und Y. Coppens: A New Species of the Genus Australopithecus (Primates: Hominidae) from the Pliocene of Eastern Africa. Kirtlandia Nr. 28 (1978)
  • D. C. Johanson und Maitland Edey: Lucy - Die Anfänge der Menschheit. (Dt. Utgave), R.Piper & Co. München 1982, ISBN 3-492-02738-5
  • Yves Coppens: Lucys Knie - Die prähistorische Schöne und die Geschichte der Paläontologie. (Dt. Utgave), München 2002.

Weblenken[ännern | Bornkood ännern]