Lucius-D.-Clay-Kasern

Vun Wikipedia
Zur Navigation springen Zur Suche springen
Ingang na de Kasern in amerikaansche Tieden
Ingang na de Kasern 2011

De Lucius-D.-Clay-Kasern weer en US-amerikaansche Kasern in Garlst. Dor weer de 2nd Armored Division (Forward) ünnerbröcht. Nöömt weer se na Lucius D. Clay, wat von 1947 bet 1949 de Militärguvernör von de Amerikaansche Besatzungszoon in Düütschland weer.

De Kasern is von 1975 bet 1978 boot worrn. De Kösten weren üm un bi 140 Milljonen US-Dollar. De Hälft hett de Bundsrepublik Düütschland betahlt, den Rest de Amerikaners. De eersten 200 Soldaten sünd an’n 17. Oktober 1978 in de Kasern intagen.

De Brigaad harr üm un bi 3500 Soldaten un 2500 Zivilanstellte un Familienliddmaten. Blangen Barracken, Garaaschen, en Scheetstand, Warksteden, Logistikinrichtungen un en Trainingsgelänn hett dat in Garlst ok en lütte Klinik, en Postamt, en Bökeree, en Kino un en kumbineerten Club för Offzeers un Mannschoppen geven. In’n April 1986 hett ok en Burger King in de Kasern apenmaakt.

Nadem 1990 de Irak-Kries anfungen hett, de 1991 to’n Tweten Golfkrieg föhrt hett, sünd veel Soldaten ut Garlst na’n Persischen Golf verleggt worrn. 18 Soldaten ut de 2nd Armored Division (Forward) sünd in’n Golfkrieg fullen. Dat Material weer nu to’n groten Deel in de Golfregion un de ole Opgaav, de de 2nd Armored Division (Forward) in’n Kolen Krieg harr, weer wegfullen, nadem de Sowjetunion uteneenfullen weer. Dorüm is de Kasern 1992 oplööst worrn. Över de Tied sünd von 1978 bet 1992 so üm un bi 28.000 amerikaansche Soldaten in Garlst statschoneert ween. An’n 1. Oktober 1992 hebbt de Amerikaners de Flagg inhaalt un dat Gelänn an dat Heer von de Bundswehr övergeven.

De Bundswehr hett den olen Naam behollen un bruukt de Kasern nu as Truppenschool. Üm un bi 15.000 Soldaten un zivile Anstellte warrt elk Johr logistisch utbillt. Disse School weer vörher in de Roland-Kasern in Bremen-Grohn ünnerbröcht. In’n Oktober 1999 is de School ganz na Garlst tagen. An’n 1. Oktober 2006 is de School Deel von de Striedkräftbasis worrn un heet nu Logistikschool von de Bundswehr.


Koordinaten:53° 16′ N, 8° 42′ O