Lothar Matthäus

Vun Wikipedia
Zur Navigation springen Zur Suche springen

Lothar Herbert Matthäus (* 21. März 1961 in Erlangen) is en ehmalger düütsch Footballspeler un -trainer as ok -experte in‘t Feernsehn.

He fung sien Loopbahn bi de Mannlüüd 1978 in de Landssliga Mitte bi den 1. FC Herzogenaurach an, för den he ok all in sien Jöögd speelt harr. 1979 is he to Borussia Mönchengladbach wesselt, wo he meest 200 Plichtspeelen in fiev Johren maakt hett. 1984 keem he to’n eersten Mal to FC Bayern München. In de veer Speeltieden för de Münchener wurr he dreemal Düütsch Meester un wunn eenmal den DFB-Pokal. Dornah gung he nah Italien, to Inter Mailand. Ok dor bleev he veer Johr un wunn dor 1989 den Meestertitel un 1991 den UEFA-Pokal. Wiels sien Tiet bi den Nerazzurri wunn he 1990 den Ballon d’Or, wurr 1991 de eerste offizielle Weltfootballer van dat Johr un 1990 ok Düütsch Footballer van dat Johr. 1992 kehr he nah Düütschland to’n FC Bayern München torüch. Nu reck he mit den Vereen noch veer Düütsch Meesterschapen, twee DFB-Pokalsiege un wunn 1996 den UEFA-Pokal. 1999 wurr he nochmal Footballer van dat Johr in Düütschland. In dat Fröhlohr 2000 gung he kört för sien 39. Gebortsdag nochmal in’t Utland un speel een Saison lang för de MetroStars in de Major League Soccer, bevör he Anfang 2001 sien aktiv Loopbahn nah över 22 Johren afsluuten dee.

Matthäus gellt as en van de wichtigsten düütsch Footballnatschonalspeler. Siet 1979 in Nahwussmannschapen insett, hett he 1980 sien eerst Lännerspeel maakt. 10 Johr later wurr he mit de düütsch Natschonalmannschap Weltmeester. Insgesamt hett he an fiev Weltmeesterschapen deelnommen. Mit 150 Lännerspelen hollt he den düütschen Rekord.

Nah sien Spelerkarriere hett he van 2001 bit 2011 as Trainer in Öösterriek, Serbien un Montenegro, Brasilien un Israel as ok as Natschonaltrainer för Ungarn un Bulgarien arbeit. Dornah hett he för’t Feernsehn arbeit.

Literatur[ännern | Bornkood ännern]

Weblinks[ännern | Bornkood ännern]

Commons-logo.svg Lothar Matthäus. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen[ännern | Bornkood ännern]