Laurent Brochard

Laurent Brochard (* 26. März 1968 in Le Mans) is en ehmalger franzöösch Radrennfohrer.

Karriere

Brochard wurr 1992 Profi un gull as Allrounder. He weer good in de Bargen, kunn in' Massensprint mithollen un Tietfohren kunn he ok good. In sien Anfangsjohren kunn he de Tour du Haut-Var un de Limousin-Rundfohrt winnen, as ok Deelstreckensiege dor un bi de Middelmeer-Rundfohrt halen.

1997 harr Brochard sien Dörbröök. He wunn twee Deelstrecken bi dat ansehn Midi Libre wunn de negente Deelstreck bi de Tour de France vun Pau nah Loudenvielle dör de franzöösch Pyrenäen an den franzööschen Natschonalfierdag 14. Juli. In dat sülvig Johr wurr he denn noch in dat spaansche San Sebastián Weltmeester.

1999 kunn he för dat lütt Team Jean Delatour bi de Vuelta a España een Deelstreck winnen un wunn bit 2002 noch mehrere lüttgere Rennen. 2003 is he to Ag2r Prévoyance wesselt. Siet Anfang 2005 fohr he för de Mannschap Bouygues Télécom un wunn in dat Johr to'n darten Mal nah 2001 un 2003 dat Rennen Paris-Camembert.

1996, 2000 un 2004 hett he an de Olympisch Sömmerspelen deelnommen, aber kien Medaille wunnen. Af de Saison 2008 düükt he nich mehr in Ergevnislisten up.

Doping

Nah den Sieg vun Brochard bi de Weltmeesterschap 1997 wurr he positiv up dat to Dopingmiddel tellen Betäubungsmiddel Lidocain test. Wie he aber en Attest vun den Dokter vörwiesen kunn, wurr he nich för schuldig befunnen. Dat wurr seggt, dat Brochard Probleme mit de Bandschiev harr un dat Middel ut dissen Grund nommen harr. De Festina Masseur Willy Voet, de den Festina Schandaal utlööst hett, hett seggt, dat dat Attest eerst twee Week nah den positiven Dopingtest erstellt wurrn weer, um en Schandaal to verhinnern. Dat sall nah sien Utseggen direkt dör de UCI un FFC passeert ween. Voet harr luut eegen Utsaag Brochard en spaansch Kortisonpräparat to irreguläär Leistungssteigerung verafreicht (Doping), in dat aber ok Lidocain enthollen weer. Wat Voet dor behaupt hett, muss as handfast Schandaal vun „ganz baben“ instuuft wurrn. De Utseggen vun Voet wiels de Festina-Affäär hebbt sück tominst samt un sünners as wohr herutstellt.

In dat Regenbagentrikot wunn Brochard noch en Deelstreck bi den Midi Libre, bevör he denn bi de Tour de France 1998 mit in de Festina-Affäär mit rinkeem. He hett EPO-Doping instahn un wurr vun de UCI sparrt. Dat wat bi de Weltmeesterschap 1997 passeert weer, het man dorbi nich noch mal upgreepen.