Lütten-Hansdörp

Lütten-Hansdörp is en Dörp in de Gemeen Jersbek in’n Kreis Stormarn.

Geografie

Lütten-Hansdörp liggt an de Grenz to Hamborg. De Duvenstedter Brook direkt in’n Westen höört al to Hamborg. Na’n Süden to liggt Timmerhorn, in’n Oosten Delingsdörp un Bartheil. Na Noorden to doot Jersbek un de lüttje Oort Langereeg liggen. Bi Lütten-Hansdörp liggt ok de Hansdörper Brook, wo veel Kraans bröden doot un de vun wegen de Natur schuult is.

Historie

Lütten-Hansdörp kummt 1389 toeerst in de Oorkunnen vör. Dor stünn domals Johanstorpe Parrochie Berchteheyle. Dat höör to dat Good Tremsbüttel un weer en Rundplatzdörp. 1475 hett Johann IV. vun Sassen-Loonborg dat Dörp köfft un de Vaagtei Tremsbüttel ünnerstellt. Na de Reformatschoon un de Reform vun de Verwaltung, de dor in Holsteen mit verbunnen weer, höör Lütten-Hansdörp to dat landsherrliche Amt Tremsbüttel.

Bi de Verkoppelung 1774 hebbt se de Flächen vun dat Dörp vermeten un in Koppeln indeelt. Nadem Preußen Sleswig-Holsteen övernahmen harr, keem Lütten-Hansdörp as sülvstännige Landgemeen to’n ne’en Kreis Stormarn. Mit de Kommunalverfaten 1889 in Preußen höör dat Dörp to’n Amtsbezirk Bartheil, de 1948 in dat Amt Bartheil opgahn dee. In de Johren 1960 dee sik Lütten-Hansdörp mehr un mehr vun en Buurndörp to en Wahnoort an’n Hambörger Stadtrand wanneln. 1978 keem dat Dörp to de Gemeen Jersbek.

Inwahnertall

Johr	1910	1933	1939	1978
Inwahners	150	133	142	241

Weertschop un Infrastruktur

Verkehr

Lütten-Hansdörp hett twee Straten, de bi Timmerhorn na üm un bi een Kilometer an de Landsstraat 225 rangaht, de vun Bartheil na Hamborg löppt. Ans gifft dat blot noch en lüttjere Straat, de na Bartheil un Jersbek löppt. Na Oosten un Noorden is dat Dörp meist ganz afsperrt dör dat Duvenstedter Brook. De nächste Bahnhoff is in Bartheil.

Literatur

• Hannelies Ettrich: Chronik Jersbek. Jersbek - Klein Hansdorf - Timmerhorn. rutgeven vun de Gemeen, Husum 1989