Kurt Vajen

Vun Wikipedia
Zur Navigation springen Zur Suche springen

Kurt Vajen (* 15. Mai 1936 in Ahusen; † 1. Dezember 2020) weer en düütschen Politiker von de CDU (later bi de REP).

Vajen is 1936 in Ahusen boren. He weer bet 1951 op de Volksschool un hett denn en Lehr in de Bueree maakt. 1960 is he Landweertschopsmeester worrn. Von dat Johr an weer he denn as Buur sülvstännig in Wensbrock. He is in de Junge Union rin un 1966 ok in de CDU. Vajen weer vereedigten Landweertschoplichen Goodachter un Saakverstännigen bi de Landweertschopskamer Hannover. He weer Maat von’n Opsichtsraad von dat Överlandwark Noord-Hannover un Verbandsvörsteher von’n Waterversorgungsverband för den Landkreis Rodenborg.

1972 is he Afornten in’n Kreisdag von’n Landkreis Rodenborg worrn un weer dor denn ok Viez-Landraad. 1974 is he Raadsherr un Börgermeester von de Gemeen Brookel un de Samtgemeen Bootel worrn. Börgermeester weer he bet 1990 un Samtgemeenbörgermeester bet August 1988. Von 1975 bet to de Kreisreform 1977 weer he Landraad von’n Landkreis Rodenborg. Na 1977 weer he wedder Viez von’n Landraad. Bi de Landdagswahl 1978 is he för den Wahlkreis Rodenborg Maat von’n Landdag von Neddersassen worrn. He weer dor von 1978 bet 1990 (negente bet ölvente Wahlperiood) Afornten. Nadem he in’n September 1989 de Republikaners bipeddt is, is he ut de CDU rut, bevör de CDU em utsluten kunn. Bet an dat Enn von de Wahlperiood in’n Juni 1990 weer he in’n Landdag denn Afornten ahn Frakschoon. Bi de Wahl 1990 hett he sik as Kannedaat förde Republikaners opstellen laten, is aver nich in’n Landdag intagen.

Vajen is Grünner un Vörsitter von’n Vereen Vereenigung von fröhere Kommunalpolitikers in Rodenborg.[1]

Kuntrovers[ännern | Bornkood ännern]

1986 is rutkamen, dat Vajen as Börgermeester in mehr as een Fall de Kommunalwahl in Brookel manipuleert hett. He is mit Breevwahlünnerlagen na Wählers gahn, de för sik un jemehr Verwandte wählen schullen.[2] Ernst Albrecht, Ministerpräsident von Neddersassen, hett aver liekers to em hollen, üm de Mehrheit in’n Landdag von een Stimm von CDU un FDP nich op’t Speel to setten. Ok as Vajen 1988 nachtens mit twee Promill Alkohol in’t Blood von Polizisten anhollen worrn is un sik gegen de Polizisten wehrt hett, is he Afornten bleven.[3] Vajen hett 1988 en Geldstraaf von 18.000 Mark kregen un müss för negen Maand den Föhrerschien afgeven.[4]

An’n 2. September 1989 hett sik de CDU-Frakschoon in Neddersassen denn doch von Vajen trennt un dorbi de Mehrheit in’n Landdag verloren. De SPD-Politiker Oswald Hoch, de kort vörher eerst in’n Landdag narückt is, hett en lütte Tied later kunddaan, dat he ut de SPD-Frakschoon utpeddt un hett as Afornten ahn Frakschoon Albrecht sien Mehrheit von 78 Stimmen för de CDU/FDP gegenöver 77 Stimmen för SPD un Gröne bet an dat Enn von de Wahlperiood in’n Juni 1990 sekert.

Footnoten[ännern | Bornkood ännern]

  1. „Vereinigung ehemaliger Kommunalpolitiker“ wählt neuen Vorstand. In: kreiszeitung.de, 23. Februar 2012
  2. Hinrich Lührssen: Ein Mann – eine Stimme: Der Wahlfälscher im Landtag. Die Zeit 42/1988 von’n 14. Oktober 1988
  3. Abgeordnete: Extrem mißlich. Der Spiegel 18/1988 von’n 2. Mai 1988, Sied 106
  4. Niedersachsen: Am seidenen Vajen. Der Spiegel 35/1989 von’n 28. August 1989, Sied 26–27