Krankenhuus Solzhusen

Krankenhuus Solzhusen

Tafel an’n Ingang

Dat Krankenhuus Solzhusen is en Krankenhuus in freegemeennützige Dregerschop in Solzhusen in’n Landkreis Horborg. Dat weer dat eenzige genossenschaftliche Krankenhuus in Düütschland mit de Gemeennützige Krankenpleegvereen eG as Dreger. Dat Leid hett de Vörstandsvörsitter Jürgen Meinberg.

Historie

1897 hett de Sanitätsraad Wilhelm Meinberg, de as Dörpdokter in Solzhusen un ümto arbeidt hett, in dat Huus von’n Solzhüser Balbeer un Bader Christoph Mestmacher en Krankenstatschoon inricht, de toeerst dree Bedden harr. Ünnerstütt von Pastoor Wilhelm Bode hett he mit annere Inwahners von Solzhusen den Krankenpleegvereen Solzhusen grünnt, de an’n 13. Juni 1898 as Genossenschaft indragen worrn is. De Inrichtung weer as evangeelsch Krankenhuus dacht, dat ok annere Kunfessionen apenstahn schull. Al na een Johr har de Krankenpleegvereen 36 Liddmaten, blangen Börgers un Buurn ok söven Gemenen.

As Pleegkraft hett dor toeerst alleen de Fro von’n Balbeer Mestmacher arbeidt, de kort later en Utbillung as Krankenswester maakt hett. Eerst 1903 is en tosätzliche Pleegkraft un en Weertschopperin instellt worrn, nadem al 1900 de Kapazität von dat Huus dör Utbo von dat Mestmachersche Dackgeschoss op ölven Bedden anstegen weer.

Von 1902 af an weer de Plaan, dat ole Solzhüser Amtshuus to övernehmen. Dat is 1854 boot worrn un dor weren dat Amt Solzhusen un dat Amtsgericht Solzhusen in ünnerbrocht. As Amt un Amtsgericht 1859 al wedder oplööst worrn sünd, is dat Gebüüd as Schandarmeriestatschoon bruukt worrn. De eersten Andrääg sünd noch aflehnt worrn, aver 1906 kunn dat Gebüüd denn doch övernahmen warrn un güng na en Ümbo in’n Oktober 1907 in Bedriev.

Dat ole Amtshuus, en Sadeldackbo mit twee Etaaschen, is vondaag de Middeldeel von en Anlaag mit dree Flögels. De verklinkerte Fassaad is mit Lisenen in dree Afsneed to je dree Assen von Segmentbagenfinsters indeelt un na baven dör en Gesims afslaten. Düsse Deel von dat Gebüüd is 1991 as Bodenkmaal indragen worrn. Den Togang billt en lütten hellblauen Pavillon, de later anboot worrn is.

Eerst 1908 is dat Krankenhuus an Kanalisatschoon un elektrischen Stroom anslaten worrn. 1910 keem en Zentralheizung. De eerste Operatschoonssaal keem 1921, de Röntgenanlaag 1937. 1985 is an de Oostsied von dat ole Amtshuus en eersten Anbo anleggt worrn un 2011 an de Westsied noch en tweten.

Ünner annern dör de temlich hogen Investitschoonskösten hett dat Krankenhuus finanzielle Problems kregen. Dorüm müss in’n September 2013 en Insolvenzandrag stellt warrn. Nadem toeerst noch versöcht worrn is, dat Krankenhuus as Akutkrankenhuus wieder to bedrieven, hett in’n Oktober 2014 denn de Landkreis Horborg dat Krankenhuus övernahmen un wull dat in en ambulant Gesundheitszentrum ümwanneln, von wegen dat dat Krankenhuus Solzhusen al to disse Tied nich mehr in’n Beddenbedarfsplaan von dat Land Neddersassen vörsehn weer.

An’n 27. Mai 2015 hebbt de Genossen von’n Krankenpleegvereen, de Gläubigers un de Bundsagentur för Arbeid eenstimmig den Insolvenzplaan annahmen. De Plaan seggt ut, dat de Genossenschaft in en gemeennützige GmbH ümwannelt warrt.

Struktur

De Dregergenossenschaft von dat Krankenhuus hett 1137 Maten, de 5292 Genossenschaftsandelen hebbt. Dat Krankenhuus is as Plaankrankenhuus in’n neddersassischen Krankenhuusplaan opnahmen. Dat hett 75 Bedden. Dor doot 50 Pleegkräft un 14 Dokters arbeiden un dor kaamt noch twee Beleggdokters to. Dat gifft Afdeels för Binnere Medizin (mit Swoorpunkt Lungen- un Bronchialheelkunn), Chirurgie (mit Spezialiserung op Gelenkchirurgie) un Urologie (de eenzige in’n Landkreis Horborg). 2010 sünd 2726 Patschenten stationär un 6238 ambulant in dat Krankenhuus behannelt worrn.

To de Utstattung höört Ultraschalldiagnostik, Stoßwellen-Lithotripsie un Computertomografie; as Besünnerheit hett dat Krankenhuus Solzhusen en egen ambulant Slaaplabor.

Pleeg un Olenbetreuung

To dat Angebot hett bet Februar 2014 ok en Pleegdeenst höört. De hett anbaden: hüüslichen Pleegdeenst, [Daagspleeg]] för Patschenten, de tohuus övernachten doot, un ambulanten Pleegdeenst „Pleeg tohuus“ för Fäll, in de de normale hüüsliche Betreuer verhinnert oder in Urlaub is. Disse Pleegbedriev hett to dissen Tiedpunkt de Benno- un Inge-Behrens-Stiftung övernahmen. Gliektiedig güngen ok dat „Betreute Wahnen“ un dat Senioren- un Pleegheim Heidmarkhoff (grünnt 1996) in de Stiftung över.

Literatur

• Gemeinnütziger Krankenpflegeverein eG (Hrsg.), Hermann Dieck, H. Schulz: 100 Jahre Krankenhaus Salzhausen. Sülvsverlag, Solzhusen 1997

Weblenken

Krankenhuus Solzhusen. Mehr Biller, Videos oder Audiodateien to’t Thema gifft dat bi Wikimedia Commons.

• Websteed von dat Krankenhuus (hoochdüütsch)
• Qualitätsbericht 2010 (PDF; 2,1 MB) (hoochdüütsch)