Konservativ Jodendom

Vun Wikipedia

Dat Konservative Jodendom is en Twieg vun dat hüdige Jodendom. Up hebr. warrt düsse Twieg ok Masorti nömmt, dat heet up Platt „traditschonell“. Dat konservative Jodendom versocht, de Traditschonen vun den jöödschen Gloven un dat moderne Leven vun hüdigendags in de Praxis vun siene Religion tohopen to bringen.

Grundsätz[ännern | Bornkood ännern]

Dat konservative Jodendom meent, dat de jöödschen Gesette (Mizwot Adonai, Halacha) nich for all Tieden henstellt wurrn sünd, man dat se jummerlos wieter spunnen un anpasst weern mütt. To’n Bispeel is dat in de Gemeenden kloor, dat ok Froenslüde as Rabbiners un as Kantor mitmaken dröövt. Wenn bi de konservative Joden Froenslüde to’n Goddesdeenst kaamt, hefft se de Kippa up un wickelt sik Tefillin um un weert tellt for den Minjan. Deerns fiert ehre religiöse Grootjöhrigkeit bi de Bat Mizwa, so, as Jungs dat bi de Bar-Mizwa-Fier doot.

Dat konservative Jodendom verscheelt sik vun dat Orthodoxe Jodendom, wat de religiösen Wetten so stohn lett, as se upschreven sünd un wat dor nix an ännern will. Masorti is dor en Twieg vun dat Liberale Jodendom mit, just so, as dat Reformjodendom. Dat ganze liberale Jodendom stimmt dor in overeen, dat se de Tora histoorsch-kritisch anfaten un verstohn deit.

Geschichte[ännern | Bornkood ännern]

Siene Wuddeln hett dat konservative Jodendom in de positiv-histoorsche School vun den Historiker Heinrich Graetz un vun den Rabbiner Zacharias Frankel in de tweete Hälft vun dat 19. Johrhunnert. Se weern beide togange an dat Jöödsch-Theoloogsche Seminar in Breslau, wat se ok up’e Been stellt hefft. Fraenkel weer dor Direkter un Graetz weer Dozent for jöödsche Geschicht un Bibelkritik. An dat Seminar hett dat to’n eersten Mol en universitäre Utbildung for Rabbiners geven.

Masorti in Düütschland[ännern | Bornkood ännern]

In dat Johr 2002 is in Berlin de eerste düütsche Masorti-Gemeende upmaakt wurrn. Vun 2007 af an warrt se anföhrt vun de Rabbinersche Gesa Ederberg. Se is Rabbinersche an de jöödsche Eenheitsgemeende vun Berlin. In Berlin gifft dat ok en Masorti-Kinnergoorn. Annere Masorti-Gemeenden bestoht in Chöttingen, Heilbronn un Weiden.

Literatur[ännern | Bornkood ännern]

  • Norman Solomon: Judentum. Reclam Universal Bibliothek Nr. 9780
  • Judentum verstehen, Symapathie Magazine, [1]
  • Masorti in Deutschland, Masorti Verein Berlin, [2]
  • Julius H. Schoeps (Hrsg.), Neues Lexikon des Judentums, Gütersloh 1992
  • Andreas Brämer, "Rabbiner Zacharias Frankel. Hildesheim [u. a.]: Olms, 2000

Weblenken[ännern | Bornkood ännern]

Borns[ännern | Bornkood ännern]