Końskowola

Vun Wikipedia

Końskowola is en Dörp in den Süüdoosten vun Polen un de Hööftoort vun en Landgemeend mit densülbigen Naam. Dat liggt up 161,8 m Hööcht in dat Powiat Puławski in de Woiwodschap Lublin an den Kurówka-Stroom. 2004 leven dor 2.188 Inwahners. Börgermestersche is hüdigendags (2007) Ewa Gruza.

Historie[ännern | Bornkood ännern]

Vun’n 8. Juni 1532 bit 1870 hett dat Dörp as Stadt gullen. Den Naam hett dat vun sien Grünner Jan Koninski. To’n eersten Mol is dor in dat Johr 1442 vun to hören. 1532 kreeg Końskowola Stadtrecht. Dat weer en Middelpunkt vun den Hannel mit allens, wat een to’n Leven bruukt. Babenhen geev dat dor en poor Textilfabriken. Minschen ut ganz Polen, man ok ut Sassen sünd dor denn hentrocken. As Polen to’n drüdden Mol deelt wurrn is, keem de Oort 1795 an Öösterriek. 1809 is he en Deel vun dat Hartogdom Warschau wurrn. Nah den Januarupstand hett Końskowola dat Stadtrecht verlaren. Vun 1918 af an höör dat Dörp wedder to Polen to. An’n Anfang vun den Tweden Weltkrieg hefft de Düütschen dat Dörp an’n 15. September 1939 innahmen. Dor is denn en Lager inricht wurrn, wo de Suldaten vun den Fiend insparrt wurrn sünd. Dor bleev dat nich lang bi. Man denn is dor en Konzentratschoonslager upmaakt wurrn. Dat geev dat bit 1943.

In dat Ghetto sünd Jöden ut düssen Oort, man ok ut de Slowakei ünnerbröcht wurrn. An’n 8. Mai 1942 sünd allerhand Jöden in dat Vernichtungslager Sobibor bröcht wurrn. In’n Oktober 1942 hett dat Bataillon 101 vun de Reservepolizei dat Ghetto uplööst. Dor sünd üm un bi 1000 Minschen bi ümbröcht wurrn.

Gemeende[ännern | Bornkood ännern]

To de Gemeende Końskowola höört de Oort Chrząchów mit to.

Tourismus[ännern | Bornkood ännern]

Wat een sik ankieken mutt in Końskowola is besunners de kathoolsche Kark. Dor is de Familiengruft vun de Opalinskis un vun de Lubomirskis in to sehn un ok schöne Graffsteen vun Tylman van Gameren. En anner Kark in den Stil vun de Renaissance vun Lublin is in dat Johr 1613 boot wurrn. Dat gifft ok en evangeelschen Karkhoff.

Beröhmte Lüde ut Końskowola[ännern | Bornkood ännern]

In Końskowola sünd de poolschen Dichter Franciszek Dionizy Kniaźnin un Franciszek Zabłocki storven.

Weblinks[ännern | Bornkood ännern]

Ghetto vun Końskowola. Mehr Biller, Videos oder Audiodateien to’t Thema gifft dat bi Wikimedia Commons.