Kitgum (Distrikt)

Vun Wikipedia
Koort vun Kitgum in Uganda
Koort vun de Ünnerafdelen vun Kitgum

Kitgum is en Distrikt in’n Norden vun Uganda, de an’n Sudan grenzt. Kitgum hett na’n Zensus vun 2002 283.546 Inwahners. Dör den Rebellenkampf vun den Herrn sien Wedderstandsarmee siet 1986 un de velen Flüchtlinge un Flüchtlingslagers hett sik de Inwahnertall in de Vergangenheit fakener recht gau verännert. Hööftoort vun’n Distrikt is de Oort mit’n sülven Naam, Kitgum. De Inwahners leevt to’n groten Deel vun Subsistenzweertschop. Na ISO 3166-2 is de Kood för Kitgum UG-KIT.

Kitgum höört tohoop mit Gulu un Pader to dat Acholiland, wat dat Rebeet vun dat Acholi-Volk is. Bet to’n 4. Dezember 2001 weer Pader ok Deel vun Kitgum wesen, is denn aver as egen Distrikt aftrennt worrn.

Kitgum hett 25 Krankenhüüs, 22, de vun’n Staat bedreven warrt un dree, de vun Nichstaatliche Organisatschonen bedreven warrt. An de 172 Grundscholen sünd good 98.000 Schölers inschreven. Dorvun sünd acht privat un de Rest vun’n Staat bedreven. Dat gifft söven Scholen, de na de Grundschool noch wiedergaht, un twee högere Scholen, dat Lehrerseminar Kitgum un dat Technische Institut vun Kitgum[1].

Geografie[ännern | Bornkood ännern]

De Distrikt is 9.773,63 km² groot un dehnt sik so vun Noord na Süüd över 90 km un vun Oost na West över 165 km ut. Dat Zentrum mit de Stadt Kitgum liggt 452 Kilometer vun de Hööftstadt vun Uganda, Kampala, vun af.

Navers sünd de Distrikt Kotido in’n Oosten, Pader in’n Süden, Gulu in’n Westen un de Sudan in’n Noorden.

Kitgum besteiht ut twee Kreise, Lamwo (in de Koort de hellere Deel mit de Tallen 1 bet 9) un Chua (in de Koort de düüstere Deel mit de Tallen 10 bet 19).

Klima[ännern | Bornkood ännern]

Kitgum besteiht ut Savann mit twee Regentieden vun de Midd vun’n März bet Enn Mai un vun Juli bet Anfang November.

Footnoten[ännern | Bornkood ännern]

  1. http://kitgum.go.ug/

Weblenken[ännern | Bornkood ännern]


Koordinaten:3° 26′ N, 32° 58′ O