Karl Lampe (Jurist)

Karl Lampe (* April 1899 in Hannover; † 1978) weer en düütschen Verwaltungsbeamten.

Lampe is 1899 in Hannover boren un weer von März 1917 af an Soldaat in’n Eersten Weltkrieg. Lampe hett Juristeree studeert un hett in’n März 1925 sien tweet Staatsexamen maakt. He hett vör 1934 as Regerungsraad in Lümborg arbeidt. An’n 1. Mai 1933 is he Liddmaat von de NSDAP worrn.

He is in’n Januar 1934 as Nafolger von Paul Freiherr von Hodenberg Landraad von’n Kreis Oosterholt worrn. In’n August 1934 is he denn richtigen Landraad worrn un dat bet 1936 bleven. He weer in de SA, is dor aver 1935 rutflagen, nadem he as Landraad in sien Kreis Akschonen gegen Joden verhinnert harr. He schull toeerst ok ut de Partei rutflegen, hett denn aver man en Verwies kregen.

In’n Dezember 1936 hebbt se em as kommissarschen Landraad in’n Landkreis Dannenbarg versett. 1937 is he richtigen Landraad worrn un dor bet 1945 bleven. Na’n Tweten Weltkrieg weer he von April 1945 bet April 1948 von de Amerikaners interneert. He is toeerst in de Kategorie IV entnazifizeert worrn, in’n Mai 1950 in de Kategorie V.

In’n März 1951 is he Regerungsraad in Hannover worrn. An’n 1. Januar 1954 is he Landssozialgerichtsraad worrn un in’n September 1957 Direkter von dat Sozialgericht Bruunswiek. In’n Juli 1964 is he in Rohstand gahn.