Justus Johann Kelp
Justus Johann Kelp (* 17. September 1650 in Veern; † 30. Juli 1720 in Ramßel) weer en düütschen Verwaltungsbeamten un Gelehrten.
Kelp is 1650 as Söhn von Anna, borene Hude (6. Januar 1607–24. August 1685), un den Organist an de Johanniskark, Christoph Kelp, in Veern boren.[1] He hett toeerst de Doomschool Veern besöcht un denn de Raadsschool Minnen.[1] Von dor is he 1669 op de Universität Rinteln wesselt.[1] 1670 güng he an de Universität Königsbarg.[1] Von dor keem he 1673 wedder trügg un weer denn de eersten Johren Huuslehrer.[1]
Later hett he bi de Ämter Ehrenborg, Soldan un Neenborg arbeidt un weer Sekretär in de Ämter Rodenborg un Veern.[1] An’n 9. September 1689 is he Amtmann von dat Amt Otterbarg worrn.[1] Dat is he bleven, bet 1712 de Dänen dat Rebeed von Bremen-Veern innahmen hebbt.[1]
Na disse Tied hett he denn keen Verwaltungsposten mehr hatt. He hett denn bet to sien Dood 1720 as Kanoniker in Ramßel leevt, wat he toeerst al 1702 worrn is.[1][2]
Blangenbi hett Kelp en Reeg Schriften opsett över de Geschicht von de Lannen Bremen, Veern un Heien, aver ok över Lümborg un Hamborg. To siene Leevtieden is nix von de Schriften druckt worrn. Wat von siene Schriften nableven is, is in dat Archiv in Hannover kamen.[3]
Kelp hett 1682 in Lümborg Anna Dorothea Düsterhop († 1700) freet.[3] Nadem siene eerste Fro doodbleven is, hett he an’n 10. Januar 1704 in Lümborg ehr Süster Elisabeth Dorothea Düsterhop freet.[3][2]
Footnoten
[ännern | Bornkood ännern]- ↑ a b c d e f g h i Heinrich Wilhelm Rotermund: Das gelehrte Hannover. Schünemann, Bremen 1823, Band 2, Sied 509ff
- ↑ a b Indrag to Kelp bi Die Maus
- ↑ a b c Kelp, Justus Johannes in de Allgemene Düütsche Biographie