Judäa
Judäa (latiensch Iudaea, vun hebrääsch יהודה) is de Naam vun en Landschop in den Orient. De wichtigste Stadt in Judäa is Jerusalem. Jöödsche Schrievers snackt vun en „Judäa up düsse Siet vun’n Jordan“ un en „Judäa güntsied vun’n Jordan“. Mit Judäa güntsied vun’n Jordan meent se nich de Peräa.
Judäa, ümfaat in’n Groten un Ganzen de Gemarken vun dat vörmolige israelitische Königriek Juda to de Tieden vun dat Ole Testament. Vun dat Johr 6 n. Chr. af an sünd düsse Länner unner de Hand vun dat Röömsche Riek kamen. Vördem harr Kaiser Augustus den Etnarchen Archelaos afsett, vunwegen dat Joden un Samaritaners sik beklaagt harrn över em. Archelaos is en Söhn vun Herodes den Groten un Malthake, sien samaritaansche Fro, ween. De Verwaltung is denn vun en röömschen Präfekt utöövt wurrn. Ehren Sitt hett se in de Stadt Caesarea Maritima an de Middellannsche See harrt. In de Johren vun 6 bit 66 n. Chr. stünn de Präfekt unner den Legaten vun de röömsche Provinz Syria. En vun de bekanntesten Präfekten is Pontius Pilatus ween. In de korte Twuschentied vun 41-44 n. Chr. hett Judäa to Herodes Agrippa I. sien Land tohöört. He is en Enkelsöhn vun Herodes den Groten ween.