Joseph Kony

Vun Wikipedia

Joseph Rao Kony (* üm un bi 1961 in Odek) is de Baas von Den Herrn sien Wedderstandsarmee.

De Idee vun de Grupp is, en fundamentalchristlichen Gottsstaat op Basis vun de teihn Botten in Uganda optorichten.

Kony höört to dat Volk von de Acholi un is üm un bi 1961 as Kind von en arme Familie von Buurlüüd in Odek, in de Ümgegend von Gulu in’n Noorden von Uganda, boren. Nadem Alice Auma ehr Holy Spirit Movement uteneenfullen weer, weer Den Herrn sien Wedderstandsarmee een von de Splintergruppen, de sik ut de nableven Anhängers billt hett. Kony seggt, dat de Hillige Geist em 1986 Order geven hett, de Wedderstandsarmee to grünnen. An’n 1. April 1987 is he mit ölven Lüüd ut sien Heimatoort uttrocken un in’n Busch gahn. In’t sülve Johr hett sik ok Vincent Otti Kony sien Grupp anslaten. Siet disse Tied versteckt sik Kony un de Wedderstandsarmee in dat Rebeed von Uganda, von’n Sudan (vondaag Süüdsudan) un in de Demokraatsche Republiek Kongo. Se rekruteert Kinnersoldaten un maakt Anslääg op dat Militär von Uganda. Dör dissen Terrorkrieg is de ganze Noorden von Uganda instabil un bet to twee Millionen Minschen sünd so ut jemehr Heimaat verdreven worrn. Alltohoop schall de Wedderstandsarmee so 66.000 Lüüd as Kinnersuldaten bruukt hebben.

In’n Dezember 2003 hebbt se Kony un de Wedderstandsarmee denn wegen Verbreken gegen de Minschlichkeit vör’n Internatschonalen Straafgerichtshoff in Den Haag anklaagt. 2009 hett de US-Kongress dat Lord’s Resistance Disarmament and Northern Uganda Recovery Act of 2009 beslaten, in dat instünn, dat de USA Uganda bi de Jagd na Kony helpen wullen.

2012 hett de Organisatschoon Invisible Children de Kampagne Kony 2012 in Gang bröcht, de helpen schull, de Welt bewusst to maken, wat Kony för Verbreken begahn hett, dat de Politik mehr Druck kriggt, wat gegen Kony to doon.