Jochen Mähl

Vun Wikipedia

Jochen Mähl (* 15. September 1827 in Niendörp; † 4. Juli 1909 in Kiel) weer en plattdüütschen Schriever.

Mähl is as Söhn vun en Buurn in Niendörp in Holsteen boren worrn un wull Paster warrn. Sien Vader weer en Buur, de ok en Melkhannel na Hamborg hen bedreev. Sien Dichtergaav harr he vun sien Moder af, de de Dochter vun’n Lehrer un Organisten in dat Dörp weer. Doch nadem sien Vader fröh dood bleven is, schull dat nix mehr warrn mit em as Paster. Mähl weer vun 1845 bet 1848 na’t Lehrerseminar in Sebarg wesen. 1848 weer he as Freeschärler un Dragoner in’n Sleswig-Holsteenschen Krieg dorbi. Sien Broder Chrischan is in de Slacht bi Idstedt doodbleven. Siene Breven an siene Bruut (de Dochter vun’n Kanter Delfs in Sebarg, ehr Broder weer de Maler Moritz Delfs) ut disse Tiet sünd uns nableven. Disse Tiet prääg em un vele vun siene Warken speelt in disse Tiet. 1851 warrt he Lehrer in Sebarg un 1854 Schoolmeester in Reinfeld. In Reinfeld bleev he ok bet to sien Penschoon 1889.

Al jümmer harr he sien Leev för de plattdüütsche Spraak pleegt un Predigten för’n Paster Paulsen ut Kropp schreven. Ok de Bibel wull he översetten. Generalsuperintendent Jensen ut Kiel hett em jümmer wedder opmuntert, dissen Plan wieder to verfolgen. Veel harr he översett, doch fardig worrn is se nich. Dor weer eenfach nich noog Afsatz aftosehn.

Een poor vun siene Böker sünd sogor in annere Spraken översett worrn, to’n Bispeel in’t Nedderlandsche.

Warken[ännern | Bornkood ännern]

  • Stückschen ut de Mus’kist: 1. Tater-Marikn : Ein Bild aus dem Volksleben. Mentzel, Altno 1868.
    • Stückschen ut de Mus’kist: 1. Tater-Mariken. Ein Bild aus dem Volksleben. 2. Uplage, Mentzel, Altona 1869. (Google)
  • Stückschen ut de Mus’kist: 2. Jean. Lütj Denkmal. Mentzel, Altno 1869. (Google)
  • Stückschen ut de Mus’kist: 3. Fanny, oder: Wat sik hebben schall, dat kriggt sik doch. Mentzel, Altno 1869. (Google)
  • Stückschen ut de Mus’kist: 4. Lütj Anna oder En Stückschen von Em un Ehr. Meißner, Hamborg 1871. (Google)
  • Reineke Voss : Ut frier Hand. Mit en Vörwoort vun R. von Liliencron. Cotta, Stuttgart 1878.
  • Holsteinisches Bauernleben. Teknungen vun Carl Schildt, Text vun Joachim Mähl. Meißner, Hamborg 1894.
  • Geschichten frisch ut Leben un deep ut Hart. Meißner, Hamborg 1896.
  • Don Quixote : En plattdüütsch Volksbook. översett vun Jochen Mähl na Don Quijote vun Cervantes, Rutgeven vun Fritz Wischer. Lühr & Dircks, Garn 1909.
  • De lebennige Dodenkopp un annere Vertelln. Lühr & Dircks, Garn 1919.
  • Klaskreih un ander vertellen. Bearbeidt vun Hermann Boßdorf. Hermes, Hamborg 1919.

Literatur[ännern | Bornkood ännern]

  • Ludwig Schröder: Joachim Mähl. in: De Eekbom. Berlin, 1902, Johrgang 20, Nr. 4.
  • Albert Schwarz: To Jochen Mähl sinen 80. Geburtsdag. in: De Eekbom. Berlin, 1907, 137-138.
  • Johann Hinnerk Fehrs: Joachim Mähl. in: Niedersachsen, 1909, 14, 425.
  • Irmgard Spiering: Joachim Mähl, ein niederdeutscher Erzähler. Bechstein, Wertheim an’n Main 1930.
  • Wilfried Burkhardt: Joachim Mähl : Ein Reinfelder Schulmann und bedeutender niederdeutscher Dichter. Sülvstverlag, Reinfeld 1989.

Weblenken[ännern | Bornkood ännern]