Jan Oeltjen

Vun Wikipedia

Jan Oeltjen (* 15. August 1880 in Jaderbarg; † 13. Februar 1968 in Ptuji) weer en düütsch Maler un Grafiker.

He hett de Böverrealschool in Ollnborg besöcht un ansluutend Maleree in Berlin (bi Franz Lippisch) un München studeert. In eerste Ehe weer he mit de Lippisch-Schölerin Johanna Feuereisen verheiraadt, mit de he een Dochter harr. He hett tallriek Reisen ünnernommen un dorbi 1910 up de Insel Ischia de Malerin un Bildhauerin Elsa Kasimir kennen lehrt, de he nah sien Scheeden vun Johanna 1914 heiraadt hett. Mit hör harr he ok een Dochter. Nah de Heiraadt hemm se eerst in Wien leevt, tüschen 1920 und 1930 aber överweegend in Jaderbarg. 1931 sünd se endgültig in de Heimat vun sien Frau, Else Oeltjen-Kasimir (1887 – 1944), nah Ptuji, dat dormalige Pettau, in dat hüüdig Slowenien trucken.

Sien Biller un Grafiken in dat Landsmuseum Ollnborg un de Landsgalerie Hannover wurrn 1937 vun de Nazis ünner Beslagg nommen. Oeltjen weer in Ptuji as Restaurator beschäftigt. 1959 reis he to’n letzten Mal nah Düütschland. In Slowenien gellt he hüüd as Begrünner vun de Landschapsmaleree dor. In sien letzt Johren verlor he sien Sehkraft tonehmends.

Born[ännern | Bornkood ännern]

Weblenken[ännern | Bornkood ännern]