James Last

James Last (1970)

Hans (James) Last (* 17. April 1929 in Bremen; † 9. Juni 2015 in Palm Beach Gardens, Florida) weer en düütschen Jazzbassisten, Komponisten un Bandleader. Bekannt wurrn is he dör sien „Happy Party Sound“, de to den Easy-Listening-Stil tohören deit.. He hett bi 200 gollen un 17 platin Schallplaten kregen.

Leven un sien Weg as Musikus

Last is in de Helmholtzstraten in Bremen-Segelsbrugge as dat jungste Kind vun Martha un Louis Last boren wurrn. Sien Vadder weer eerst to See föhrt un hett later as Beamten bi de Bremer Stadtwerke arbeit. Mit Bernhard, Fred un Minna harr Louis dree Kinner vun siene eerste Fro mit in de Eh brocht. De weer jung storven. Mit Martha hett he denn Robert, Werner un Hans harrt. Sien Vadder speel in siene free Tied veel un geern Musik. In de Tied vun’n Tweeden Weltkrieg hett he an de Militärakademie in Bückeborg Musik lehrt. Na den Krieg hett he Kontrabass speelt un fung mit siene Bröer Robert un Werner bi dat nee Orchester vun Radio Bremen an. 1950, 1951 un 1952 is he to’n besten Bassbassisten vun Düütschland verklaart wurrn. 1955 is he na Hamborg umtrocken un hett dor as Arrangeur un Komponist for grote Orchesters, Instrumentalisten un Singers arbeit‘. He hett Waltraud Wiese freet un een Söhn un een Dochter mit ehr kregen.

1963 hett he bi Polydor en Exklusivverdrag unnertekent un in’n Mai 1965 is siene eerste LP as James Last rutkamen: "Non Stop Dancing 65". Sunner, dat he dor um fraagt wurrn weer, harr de Platenfirma sien Vörnaam ännert (man 1966 keem noch en LP rut unner den Naam Hans Last: Ännchen von Tharau bittet zum Tanz). Man de Happy Party Sound vun James Last weer nu bekannt un sien Erfolg hett sik nich mehr upholen laten. Last hett 190 Originalplaten in jedet möögliche Genre ruutbrocht. As Komponisten hett he en poor Hunnert Melodien schreven, dormank Evergreens un Welthits as Games that Lovers play, The Lonely Shepherd , Lingerin' On, Happy Heart, When the Snow is on the Roses un Fool.

Vun 1969 af an gung dat James-Last-Orchester up Tour, mit Weltreisen un ok lüttjere Rundtörns dör Europa. Allemol weer utverkofft. De Show is mit de Johren utwussen to en groot Spektakel. Last hett siene gollen un platin Platen dor for kregen, datt he in 150 Länner bi 80 Millionen Albums verkofft hett.

Na en Eh vun 42 Johren hett he in’n Dezember 1997 siene Fro Waltraud verlaren. Se is an Krebs storven. In’n Juni 1999 hett he Christine Grundner ut München heiraat. Se weer 30 Johre jünger, as he. De beiden wohnden mol in West Palm Beach in Florida un mol in Hamborg. In Langenhoorn hett he hefft een Huus. Last hett vun siene Dochter twee Enkelsöhns un vun sien Söhn een Enkelsöhn un eene Enkeldochter harrt.

Ofschoonst he oold weer, is Last bit tolest aktiv ween. 2013 weer he in Europa unnerwegens mit "The Last Tour 2013 - Einmal noch". Vun März 2015 af an stunn en Tournee dör Düütschland, Öösterriek, Däänmark un dat Vereenigte Königriek up dat Programm. Sien lestet Kunzert hett he an’n 26. April 2015 in Köln geven.

Weblenken

James Last. Mehr Biller, Videos oder Audiodateien to’t Thema gifft dat bi Wikimedia Commons.