James Francis Reilly

Offiziell NASA-Photo

James Francis Reilly II (* 18. März 1954 up de Mountain Home Air Force Base, Idaho, USA) is en ehmalger US-amerikaansch Astronaut.

Reilly is woll in Idaho boren, upwussen is he aber in Mesquite (Texas), en Vöroort vun dat 20 km weg liggen Dallas. Nah sien Abitur 1972 hett he an de University of Texas Geowetenschapen as Hööftfack studeert un dor 1977 sien Bachelor-Afsluss maakt. Dornah weer he Forschenswetenschapler bi en geologisch Expeditschoon, de för twee Johr in dat Marie-Byrd-Land in de Westantarktis forschen dee.

1979 wurr Reilly vun de Firma Santa Fe Minerals in Dallas as Geoloog beschäftigt, bevör he een Johr later to Enserch Exploration wesseln dee. Dor wurr he gau to'n leitenden Geologen un hett dorbi Erfohrungen in dat Upsluuten vun Eerdöölvörkommen in dat In- (sünners de Golf vun Mexiko) un Utland sammelt. In' Rahmen vun sien Tätigkeit bi Enserch hett he tosommen rund dree Week in Deepduukfohrtüüg verbrocht.

Sien Anstellung führ dorto, dat he ok sien Geologiestudium wieder maken kunn. 1987 hett he sien n Master in Geowetenschapen an der University of Texas maakt un 1995 sien Doktertitel. Sien Dissertation behannel de geologisch Kontrollen bi dat Verdeelen vun chemosynthetisch Gemeenschapen in' Golf vun Mexiko.

Astronautentätigkeit

Reilly harr sück teihn Johr lang ahn Spood bi dat Johnson Space Center (JSC) as Astronaut bewurben. Eerst bi sien fievten Anloop wurr he in' Dezember 1994 tosammen mit 18 wiedere Bewerbern vun de NASA annommen. Hüm wurr de Computerafdeelen vun dat Astronautenbüro todeelt, nahdem he 1996 dat eenjohrig Basistraining afslooten harr.

In' März 1997 wurr Reilly för sien eersten Space-Shuttle-Floog up STS-89 as Missionsspezialist indeelt. De Endeavour ünner Kommandant Terrence Wilcutt is dorbi to de russisch Ruumstatschoon Mir flagen un de achte Kopplung vun en US-Orbiter dörführt. Neben Pilot Joe Edwards un de anner Missionsspezialisten Bonnie Dunbar, Michael Anderson un Salischan Scharipow weer ok noch Andy Thomas an Bord, de nah de Mission an Bord vun de Orbitalstatschoon bleev. Statt hüm weer up de Rückfloog David Wolf an Bord, der veer Maand up de Mir arbeit harr. De Mission weer Deel vun dat Shuttle-Mir-Programm un düer vun 23. bis 31. Januar 1998.

2001 weer sien nächst Mission. Kommandant vun de STS-104-Mannschap mit de Ruumfähr Atlantis weer Steve Lindsay un Pilot weer Charles Hobaugh. Neben Reilly weern ok noch de Missionsspezialisten Mike Gernhardt un Janet Lynn Kavandi an Bord. Hööftupgaav vun disse Crew weer dat anleefern vun de Luftslüüs Quest to de Internatschonale Ruumstatschoon (ISS). Reilly un Gernhardt hemm dorbi dree Extra-vehicular ActivityWeltruumutstiegen ünnernommen, um Quest to installeeren. De Mission düer van 12. Juli bis 25. Juli 2001

Siet Harvst 2002 hörr Reilly as Missionsspezialist to de Crew vun STS-117. Disse twee Week düern Floog to de Internatschonale Ruumstatschoon ünner Kommandant Frederick Sturckow un Pilot Lee Archambault düer van 8. Juni bit 22. Juni 2007. Hööftbruuklast vun de Atlantis weer dat S3/S4-Element. Tosommen mit Danny Olivas führ he twee vun de veer Butenbordinsätze dör. Dorbi wurrn dat S3/S4-Baudeel an de Statschoon monteert, de Solarpaneele ut – un de tweet Flögel vun dat Solarmodul P6 infohren. De anner Arbeiten un Utstiegen wurrn vun Patrick Forrester un Steven Swanson utführt.Buterdem weer an Bord ok noch Clay Anderson, de Sunita Williams up de ISS aflööst hett. Se weer denn up den Rückfloog mit an Bord.

Privates

Reilly, de 2001 to'n Ehrenmarshal nömmt wurr, un sien Fru Jo Ann hemm twee Söhns un een Dochter.

Nah de NASA

In' Mai 2008 wurr bekannt, dat Reilly de NASA verlaaten deiht un as Viezpräsident för Forschung un Entwicklung to Photo Stencil wesselt.

Weblenken

James F. Reilly. Mehr Biller, Videos oder Audiodateien to’t Thema gifft dat bi Wikimedia Commons.

• NASA: Biografie (engelsch)
• spacefacts.de: Körtbiografie