Innozenz VIII.

Innocenz VIII.

Innozenz VIII. (* 1432 in Genua; † 25. Juli 1492 in Rom), oorsprünglich Giovanni Battista Cibo, weer Paapst van’n 29. August 1484 bit to sien Dood. De Paapstnaam betreckt sück up Innozenz IV., de ok ut Genua stammen dee.

Leven

Cibo hett um 1460 för Kardinal Filippo Calandrini arbeit. 1467 wurr he Bischop vun Savona un 1472 Bischop vun Molfetta. He wurr an’n 7. Mai 1473 vun Paapst Sixtus IV. to’n Kardinal mit de Titelkark Santa Balbina all’Aventino nömmt. 1474 wurr Santa Cecilia in Trastevere sien Titelkark.

Sien Wahl to’n Paapst an‘n 29. August 1484 weer wietgahnd vun Simonie bestimmt. De päpstliche Politik wurr wesentlich vun Giuliano della Rovere mitbestimmt. Disse Neffe van den Paapstvörgänger Sixtus IV. wurr later sülvst Paapst un hett sück de Naam Julius II. geven.

Bekannt wurr Innozenz VIII. vör allen dör de Förderung vun Inquisitschoon un Hexenverfolgung mit de Bulle Summis desiderantes affectibus ut fat Johr 1484. De führ, vör allen in Düütschland, to en stark Tonahm vun Hexenperzessen, noch verstärkt dör den 1487 vun Heinrich Institoris ünner angevlich Mitwarken vun Jakob Sprenger herutbrocht Hexenhammer.

Innozenz weer en swaak un unsülvstständiger Paapst, wat nich blots up sien anslahn Gesundheit torüchführt wurr. Wegen anhollen finanzielle Probleme weer he deelwies sogor dwungen, Mitra un Tiara as ok Deelen vun den päpstlichen Kronschatt as Pand to geven.

He hett good Betrecken to de Hooch Poort ünnerhollen, de aber hööftsächlich dat Teel harrn, de Finanzlaag to verbetern. In Gegenleistung för jedes Johr to betallen Tribute un Geschenke, dorünner ok en hillig Lanze, wurr för Sultan Bayezid II. de sien Bröer Cem fangen hollen.

Politisch weer de Amtstiet vun Innozenz ok dör den Striet mit König Ferrante von Neapel präägt, de hüm den Lehnszins verwiegert harr, militärisch aber övermächtig weer. Todem keem de franzöösch König Karl VIII. nich as afsnackt den Paapst to Hülp. So muss Innozenz in‘n August 1486 mit Ferrante Freeden sluuten, den de aber ok weer breeken dee. Eerst dör de Düppelhochtiet van sien 35 Johr olt Söhn Franceschetto Cibo (den he in dat Öller van 16 Johren mit en eenfack Deern tüügt harr) mit en Medici, de 14-johrig Maddalena, Dochter vun Lorenzo il Magnifico (1449–1492), as ok to glieker Tiet van sien Enkelin mit en Unkel vun Ferrante kunn de weer utbraaken Krieg 1492 sluutend bileggt wurrn.

Dood, Achterlaatenschap, Graffmal

Denkmal för Papst Innozenz VIII. in Davensberg (1995)

Innozenz VIII. is an‘ 25. Juli 1492 in Rom storven. De Chronist Stefano Infessura bericht, dat sück dree jung Mannlüüd dormit inverstahn verklort harr, för den in’n Starven liggen Paapst Bloot to spennen un harrn dorför en Dukat kreegen. Wat de aber nich wussen: Se sullen vullends utblööt wurrn, damit den kranken Paapst hör vull Levenskraft överdragen wurrn. Dat To Ader laaten broch den dree de Dood. De Hillig Vader is, kört nahdem he dat noch warm Blood van de Spennern drunken harr, storven.

De Tatsaak, dat sien Starvensdatum vun Girolamo Savonarola korrekt vörherseggt wurrn weer, führ dorto, dat disse charismatische Bußprediger, de de Missstände van den Karkenstatt düchtig beklagen dee, en noch grötteren Toloop kreeg.

Innozenz hett völ Kinner achterlaaten (Octo nocens pueros genuit, totidemque puellas; hunc merito poterit dicere Roma patrem – „Acht Buben zeugte er unnütz, genauso viele Mädchen; ihn wird Rom mit Recht Vater nennen können“) un sien Nepotismus to deren Gunsten weer so verschwenderisch as schamlos. Sien Nahfahren wurrn Hartöög vun Massa un Carrara.

Innozenz VIII. wurr in en monumentalen Bronzegraffmal in Alt-St. Peter bisett, dat Antonio Pollaiuolo 1498 fardigstellt harr. Dat besteiht ut en Sarkophag mit den dorup liggend Dooden un en doröver befindlichen thronenden Figur. Im 17. Johrhunnert hett man dat Wandgraffmal in den neen Petersdom överführt. Dat is dat eenzige Graffmal, dat ut den Bestand vun Alt-St. Peter in de nee Kark överführt wurr.

Denkmal

An‘n 24. Februar 1995 wurr up Anregen vun den Heimatvereen Davensberg neben de Kark en Denkmal för Paapst Innozenz VIII. inweeht, woll dat eenzige Denkmal för sien Person in Düüutschland. De Skulptur wiest, wu he in sien Hannen en Oorkunn för de Genehmigung vun de Errichtung vun de St. Anna-Kark in Davensberg hollt.

Literatur

• Marco Pellegrini: Innocenzo VIII In: Massimo Bray (Hrsg.): Enciclopedia dei Papi, Istituto della Enciclopedia Italiana, Band 3 (Innocenzo VIII, Giovanni Paolo II), Rom 2000, OCLC 313581724
• Marco Pellegrini: Innocenzo VIII, papa. In: Mario Caravale (Hrsg.): Dizionario Biografico degli Italiani (DBI). Band 62: Iacobiti–Labriola. Istituto della Enciclopedia Italiana, Rom 2004 (Text överarbeit, mehr umfangrieker Borns- un Literaturangaven).

Weblinks

Innozenz VIII.. Mehr Biller, Videos oder Audiodateien to’t Thema gifft dat bi Wikimedia Commons.

• CIBO, Giovanni Battista In: Salvador Miranda: The Cardinals of the Holy Roman Church. fiu.edu, Website vun de Florida International University; afropen an’n 5. März 2019.
• Indrag in de Catholic Encyclopedia, Robert Appleton Company, New York 1913.

Enkeld Nahwiesen

Vörgänger	Amt	Nafolger
Sixtus IV.	Paapst 1484 - 1492	Alexander VI.