Inini (Stroom)

Vun Wikipedia
Inini
Laag Franzöösch-Guayana
Inini
Laag vun Inini in Franzöösch-Guayana
Stroomsystem Maroni
Läng 215 km
Münn bi Maripasoula in’n Lawa (op 96 m över de See)
Koordinaten Münn:
Koordinaten:3° 39′ N, 54° 0′ W
3° 39′ N, 54° 0′ W
rechte Blangenströöm Crique Alicorne, Crique Palofini, Petit Inini

De Inini is en 214,6 km langen Stroom in de Gemeen Maripasoula in Franzöösch-Guayana, de in’n Lawa münnt. De kumplette Stroomloop liggt in’n Oorwoold von dat Bargland von Guayana un föhrt dat Water ut de Montagnes Inini-Camopi af. En groten Deel von dat Rebeed is as Deel von’n Amazonaspark von Guayana schuult.

De Inini besteiht ut’n groten un lütten Inini (Grand Inini un Petit Inini). De Born von’n Grand Inini liggt in’n Süden von Saül. De böverste Loop heet hier Crique Limonade. De Crique Limonade flütt eerst en ganze Tied na Süden un drippt denn op’n Crique Saï (op en Höögd von 152 Meter över de See). Düsse beiden Beken billt denn tohoop den Grand Inini, de nu na Westen flütt. Op dat rechte Över liggt dor de Bellevue de l’Inini, wat de höögste Barg in Franzöösch-Guayana is. Von Noorden her münnt de Crique Alicorne un de Crique Palofini in’n Grand Inini.

Eerst knapp 40 Kilometer vör de Münn nimmt de Grand Inini denn von rechts den Petit Inini op. De Petit Inini hett sien Born in’n Noordoosten von’n Bellevue de l’Inini un flütt von dor na Noorden un denn na Westen. De eenzige Oort an’n Petit Inini is dat lierlütte Dorlin.

De Inini münnt toletzt bi’n Oort Maripasoula in’n Lawa. De Lawa wedder flütt later in’n Maroni un de Maroni toletzt in’n Atlantik.

Historie[ännern | Bornkood ännern]

Von 1930 bet 1946 weer dat Binnenland von Franzöösch-Guayana nich mehr Deel von dat Departément un egenstännig. Dat Rebeed hett in düsse Tied dat Territorium Inini billt.