Indikatschoon (Medizin)

De Begreep Indikatschoon (vun lat. indicare „anwiesen“) bedüüt in de Medizin, dat bi en sünner’t Krankheitsbild en sünnere Vörgahnswies anbröcht – also anwiest – is. Dorbi is dat Krankheitsbild nich gliek to setten mit de Diagnoos, man meent den Samttostand vun den Patienten. In disse grundleggen Bedüden speelt finanzielle, juristische, verwaltenstechnische, Glovens- oder annere nich-medizinsche Grünnen keen Rull.

Ünnerscheden

In’n klinischen Alldag hebbt sik verschedene Stopen vun Indikatschonen entwickelt, de aver nich jümmer kloor vun’nanner afgrenzt sünd.

• Nootfallindikatschoon: hier liggt en akut Krankheitsbild vör, dat nu foorts en redden Hanneln anwiest, as to’n Bispeel Nootoperatschonen na swore Sehren mit groten Bloodverlust – bedüüt: Ahn Ingriepen vun’n Dokter is en gauen Dood to vermoden
• Vitale Indikatschoon: dormit is en Krankheitsbild meent, dat gau en redden Hanneln anwiest, as to’n Bispeel en Operatschoon bi Organdefekten – bedüüt: Ahn Ingriepen vun’n Dokter is keen Överleven mööglich, vunwegen dat dat Krankheitsbild na höchstens eenige Maanden to’n Dood föhrt
• Afsluute Indikatschoon: dat Krankheitsbild wiest en Therapie an, üm den Schaden för de Gesundheit vun den Patienten so lütt as mööglich to holen, as to’n Bispeel en Crossektomie un Exhairees vun de V. saphena magna bi V. saphena magna Insuffizienz IV° na Hach – bedüüt: Dat Leven un de Gööd vun’t Leven vun’n Patienten sünd dör’t Vörangahn vun de Krankheit in Gefohr
• Relative Indikatschoon: en sünner’t Behanneln bringt bi dat Krankheitsbild en Vördeel för den Patienten, is aver nich dwingen nödig, as to’n Bispeel dat Wegopereeren vun en Sehenschedenhygrom – bedüüt: De Krankheit maakt Lasten un kann slechter warrn un minnert villicht de Levensgööd vun’n Patienten
• Keen Indikatschoon: en Behanneln is bi dat Krankheitsbild nich anwiest, vunwegen dat se för den Patient keen Vördeel hett, as to’n Bispeel en siet doseerten Betablocker bi’n Infekschoon vun de Harnweeg – bedüüt: Bi disse besünnere Therapie is keen Verbetern vun’t Krankheitsbild to vermoden
• Kontraindikatschoon: en Behanneln is bi dat Krankheitsbild nich anwiest, vunwegen dat se för den Patienten Nadelen bargt, to’n Bispeel de Gaav vun en Betablocker bi en lopen Verapamiltherapie – bedüüt: Disse sünnere Behanneln kann den Patient schaden
• Oorsakenindikatschoon: en Behanneln is nödig gegen de Oorsaak vun en Krankheitsbild, as to’n Bispeel dat Behanneln vun en Abszess bi en Sepsis – bedüüt: Dat Krankheitsbild sülvst is de Naklapp vun en anner’t Krankheitsbild
• Symptombetogen Indikatschoon: en Vörgahn is wegen dat Symptom vun en Krankheitsbild anwiest, as to’n Bispeel en Analgesie bi en osteoporootsch Warvelkörperkompressionsfraktur – bedüüt: De Therapie helpt nich gegen de Grundkrankheit sülvst, minnert aver Symptomen, de för den Patient swoor uttoholen sünd
• Diagnoosbetogen Indikatschoon: en Vörgahn is wegen en enkelten Diagnoos in’n Rahmen uvn en Krankheitsbild anwiest, as to’n Bispeel en Vitamin B12-Sprütt wegen hyperchromoe, makrozytäre Anämie bi Alkoholkrankheit – bedüüt: De Therapie kann villicht en Krankheit minnern, de as Naklapp vun de Grundkrankheit entstahn is