Index-Kataloog
De Index-Kataloog (afkört IC, na dat engelsche Index Catalogue) is en Kataloog vun galaktische Nevels, Steernhopens un Galaxien.
Dat geev toeerst twee Katalogen, neemlich den eersten Index-Kataloog (IC I) un ’n beten later den tweten Index-Kataloog (IC II). Vundaag warrt se beid ünner den Begreep Index-Katalog (IC) tohopenfaat.
De beiden Index-Katalogen weern Anhäng vun’n NGC, de so as ok de vun Johan Ludvig Emil Dreyer tosamenstellt weern. De IC I is 1985 publizeert worrn un ümfaat astronoomsche Objekten, de eerst na de Publikatschoon vun den NGC 1888–1895 opdeckt worrn sünd. De IC II is 1908 rutkamen un faat de Objekten tosamen, de twüschen 1895 un 1908 opdeckt weern. De hele Index-Katalog list ruchweg 5.000 Objekten, to de ok en poor Objekten ut den Messier-Kataloog tellt, de in’n NGC nich opföhrt weern.
Jüst so as de NGC bargt ok de IC Fehlers. An en Verbetern arbeit dat NGC/IC-Projekt. As deelwies verbeterte Faten vun de NGC/IC-Kombinatschoon gellt de NGC 2000.0-Kataloog un de Revised NGC/IC-Kataloog. Man, de sünd nich to verwesseln mit de korrigeerten Faten vun’n NGC-Kataloog, de as RNGC betekent warrt.
Richtige Nafolgers vun disse Katalogen gifft dat nich. Siet dat fröhe 20. Johrhunnert weern Katalogen sünners för enkelte Objektklassen tohopenstellt. Vör allen gifft dat den een oder annern Galaxienkataloog.
Utwahl vun Objekten ut den Index-Kataloog
[ännern | Bornkood ännern]
- IC 10 (1889 opdeckte Galaxie in’t Steernbild Kassiopeia)
- IC 405 (diffuser Nevel)
- IC 418 (Spirograaf-Nevel) in’t Steernbild Haas
- IC 434 (Emisschoonsnevel in’t Steernbild Orion)
- IC 1396 (apenen Steernhopen in’t Steernbild Kepheus)
- IC 1613 (Galaxie in’t Steernbild Waal)
- IC 1805 (Hartnevel, en Emisschoonsnevel in’t Steernbild Kassiopeia)
- IC 1848 (Seelennevel en Emisschoonsnevel in’t Steernbild Kassiopeia)
- IC 4191 (planetaarsch Nevel in’t Steernbild Fleeg)
- IC 4406 (Retina-Nevel) in’t Steernbild Wulf)
- IC 4592/IC 4601 (en Reflekschoonsnevel in’t Steernbild Skorpion)
- IC 4593, en planetaarschen Nevel in’t Steernbild Herkules
- IC 4895 (irreguläre Galaxie vun de Lokalen Grupp)
