Internatschonale Astronoomsche Union

De Internatschonale Astronoomsche Union, afkört IAU, is en weltwiete Vereenigen vun Astronomen, de 1919 grünnt worrn is un ehrn Sitt in Paris hett. Ehr Teel is dat Föddern vun de Astronomie dör internatschonale Tosamenarbeid. So as annere lieke Organisatschonen för annere Wetenschopstwiegen is ok de IAU Liddmaat vun dat International Council of Scientific Unions (ICSU), dat sien Sitt ok in Paris hett. To de IAU hebbt in’n August 2006 8858 enkelte Liddmaten ut 85 verscheden Länner tellt un ok 62 astronoomsche Sellschoppen un natschonale Akademien. Düütschland warrt dor binnen dör’n Raat vun de düütschen Steernwachten vertreden.

Historie

As oorsprüngliche Organisatschoon vun de IAU kann man de Komisschoon vun’t Projekt Carte du Ciel sehn, de vun 1887 an ehr Intresse vun’t Utmeten vun Steerns ok op annere Rebeten vun de Astronomie utwiet hett.

1992 hett de IAU in Rom de hüütigen 88 Steernbiller fastleggt. De belgsche Astronom Eugène Delporte kreeg 1925 vun de IAU den Opdrag, de Grenzen vun de Sternbiller nipp un nau to tehn. De Grenzen weern dree Johr later in Leiden genehmigt.

Op de Generalversammeln 2006 in Prag weer de neeste Besluss mit grote apentliche Acht dörföhrt. Dor gung dat dorüm, dat Sünnsystem nee fasttoleggen un de Planeten nee to defineeren. As Folg dorvun is Pluto vundaag keen richtigen Planet mehr.

Organisatschoon

De Organisatschoon maakt siet 1922 mehr oder weniger all dree Johr sien Generalversammeln, de jümmers in en anneret Land stattfindt. Op de Versammeln warrt över niege Opdecken un notwennig Tohopenarbeid snackt un Standards fastleggt. Dorto höört t. B. dat Fastleggen vun Naams för Steerns, Planeten oder Asteroiden oder ok Dingers op de Bavenflachen as Kraters oder Bargen.

För de ünnerscheedlich Saakrebeten gifft dat ungefäähr 37 Komissionen, de för Planen und Dörföhren vun Programmen to’n Forschen op internatschonale Even tostännig sünd. Bito gifft dat verscheeden Arbeidsgruppen, de sik mit dat Nöömen vun planetarschen Systemen befaat.

De IAU hett aver ok de Schirmherrschop över bannig veele internatschonale astronoomsche Drapens as Symposien un Kolloquien, wie ok över dat Minor Planet Center, dat för de Asteroiden tostäänig is, un dat Zentralbüro för astronoomsch Telegrammen an’t Smithsonian Astrophysical Observatory in Cambridge, Massachusetts, dat den zentralen Narichtendeenst wohrnimmt. Bito föddert de IAU ok de Astronomie in de armen Länner.