Huus Lancaster

Vun Wikipedia
Wesseln na: Navigatschoon, Söök
De rode Roos vun Lancaster, dat Teken vun dat Huus Lancaster

Dat Huus Lancaster is en Twieg vun dat Huus Plantagenet un en Familie vun Königen vun England in dat Middelöller.

John of Gaunt hett düssen Twieg grünnt. He weer en Söhn vun König Edward III. vun England. 1399 keem de eerste Lancaster up den Throon. Dat weer Hinrich IV.. He harr vördem Richard II. afsett. As he König weer, möss he tosehn, dat he mit de Lords vun de mächtigen Hüser vun den Adel goot torecht keem. De versöchen in düsse Johren, över dat Parlament dat Seggen to hebben in England.

Hinrich sien Söhn Hinrich V. folg em 1413 up'n Throon. He keem goot vöran in den Hunnertjöhrigen Krieg mit Frankriek un kreeg dat hen, dat sien Söhn Hinrich VI. as Throonfolger up den franzööschen Throon ankeken wurrn is. Man dor is denn doch nix vun wurrn, vunwegen dat de Englänner jem ehre Länner in Frankriek gau wedder verloren hefft.

As Hinrich V. 1422 storven is, weer den sien Söhn noch to lüttsch to'n Regeern. Hinrich siene Bröder övernehmen eerst mol dat Regeern, man se hefft sik de Macht vun de Adeligen ut'e Hannen nehmen laten. Dor is dat denn to'n Börgerkrieg kamen, dat weeern de Rosenkriegen twuschen dat Huus Lancaster un dat Huus York. Mol weer de een Partei baven, mol de annere, man amenne steeg Hinrich VII. ut dat Huus Tudor up den Throon un bleev dor ok. He stamm vun siene Mudder her ut dat Huus Beaufort, wat ok vun John of Gaunt herstammen dö.