Zum Inhalt springen

How I Met Your Mother

Vun Wikipedia
Daten vun de Reeg
Plattdüütsche Titel: —
Düütsche Titel: How I Met Your Mother
Originaltitel: How I Met Your Mother
Produkschoonsland: USA
Produkschoonsjohr(en): 2005-2014
Produzent(en):

20th Century Fox Television,
Bays Thomas Productions

Episodenläng: ~22 Minuuten
Episodentall: 208 in 9 Staffeln
Originalspraak:

Engelsch

Musik:

John Swihart

Titelleed:

The Solids – Hey Beautiful

Idee:

Carter Bays,
Craig Thomas

Genre:

Kummedie, Sitcom

Eerst Sennen: 19. September 2005
op CBS
Eerst Sennen (D): 13. September 2008
op ProSieben
Dorsteller

Dorstellers: kiek Afsnitt in’n Artikel

How I Met Your Mother (op platt so veel as: „Woans ik joon Mudder drapen heff“) is en US-amerikaansche Sitcom-Reeg, de för den Senner CBS produzeert worrn is. De Reeg weer vun 2005 bit 2014 produzeert un ümfaat 208 Folgen in negen Staffeln. In Düütschland is de Reeg op ProSieben toeerst sennt worrn. De Geschicht speelt Anfang vun de 2000er Johren un warrt ut de Sicht vun Ted Mosby vertellt, de sien Kinner in’t Johr 2030 vertellt, woans sien Leven as jungen Architekt op de Söök na en duersome Leev in New York City verlopen is un welke Begeevnissen dorto föhrt hebbt, dat he opletzt jemehr Mudder drapen hett. De Sitcom weer spoodriek all de Johren un is mehrfack mit Feernsehpriesen uttekent worrn.

Inholt

[ännern | Bornkood ännern]

Vertellrahmen

[ännern | Bornkood ännern]

De Rahmen vun How I Met Your Mother is, dat Ted Mosby in’t Johr 2030 sien beiden Kinner Penny un Luke vertellen will, woans he jemehr Mudder drapen hett. Dorför holt he bannig wiet ut.

Sien Vertellsel geiht in’t Johr 2005 los, as he mit dormols 27 Johren in New York City leevt. He hett jüst sien Studium vun de Architektuur fardig un hett Arbeit in en Büro, wiel sien besten Fründ Marshall Eriksen kort dorför steiht, sien Jura-Studium aftosluten. De beiden deelt sik en Wahnung. Marshall is to disse Tiet al negen Johr lang mit de Kinnergoornersche Lily Aldrin tohopen. All dree sünd se mit Barney Stinson befrünnt. Wat Barney nipp un nau arbeiten deit blifft bit kort vör’t Enn vun de Reeg apen, man he is vun sik bannig övertüügt, driggt jümmer en Antogg un löpt jümmerto de Fronslüüd na. Barney versöcht Ted bitobringen, woans een – na sien egen Ansicht – leven deit, un snackt mit em regelmatig Fornslüüd an. Op disse Oort un Wies dröpt Ted Robin Scherbatsky, en junge Fro, de goot utsütt, ut Kanada kummt un anfangs as Reportersche för en öörtlichen Feernsehsenner arbeit. Ted verkiekt sik foorts in Robin un vertellt ehr dat ok gliek bi’t eerste Rendezvous. Man, dat is Robin to vell, vunwegen dat se gor keen faste Binnen ingahn will. Liekers möögt sik de beiden un besluut Frünnen to blieven. So warrt Robin Deel vun de Grupp.

De wieteren Folgen vun de Reeg dreiht sik üm dat Leven vun de fief Frünnen, woneem in’n Achtergrund jümmer de Fraag steiht, wanneer Ted de Mudder vun sien Kinner dröpt un wokeen dat wesen mag. In’n Verloop vun de Episoden warrt jümmer wedder Henwiesen un Andüden maakt, man to sehn kriggt man de Fro eerst in de letzten Staffel.

Verloop

[ännern | Bornkood ännern]

Eerste Staffel

[ännern | Bornkood ännern]
Josh Radnor speelt den jungen Architekt Ted Mosby

In’n Verloop vun de eersten Staffel warrt vele Begeevnissen wiest, in de Ted möögliche Droomfronslüüd dröpt. Man he fangt mit keen dorvun wat an, vunwegen dat he jümmer wedder blots Ogen för Robin hett. In de twölften Episood dröpt he op en Hochtiet Victoria, mit de he en schönen Avend tobringt. He verkiekt sik in ehr un wohrhaftig kamt de beidne tosamen. Man, Victoria geiht na Düütschland, woneem se studeren will. Un so geiht dat mit jem gau wedder vörbi, as Ted doch wedder wat för Robin föhlen deit un mit ehr wat anfangen will. An’t Enn vun de letzten Folg warrt Robin un Ted opletzt en Poor. Ted sien besten Fründ Marshall maakt dorgegen sien Bruut Lily in de eersten Folg en Heiraatsandrag, den se ok annehmen deit. De Hochtiet köst aver veel Geld un so nimmt Marshall en Steed in dat Ünnernehmen an, woneem ok Barney arbeit. Dat Ünnernehmen produzeert Stoffen, de to Lasten vun de Ümwelt gaht, wat nu got nich to Marshall sien Ansichten steiht. Sien Afsicht weer egentlich, Afkaat oder Richter to warrn, üm de Ümwelt to schulen. An’t Enn vun de eersten Staffel is sik Lily op mal nich mehr seker, wat se wohrhaftig Marshall heiraten will. Ehr Droom weer de Maleree, de se blangento as Hobby bedreven hett, aver egentlich jümmer studeren wull. Se geiht dorophen weg vun New York un nimmt en Kunststipendium in San Francisco an.

Tweete Staffel

[ännern | Bornkood ännern]
Jason Segel speelt den Jurist Marshall Eriksen

Wiel Ted un Robin nu en fast Poor sünd, is Marshall böös an’t Lieden, vunwegen dat Lily weggahn is. Se kummt aver wedder torüch na New York, mellt sik eerst aver nich bi Marshall. Korte Tiet later kamt se aver wedder tosamen. Robin un Ted dorgegen hebbt af un an Striet wegen Saken ut verleden Tieten, an de Gedanken an fröhere Partners knütt sünd. Robin gifft dorophen ehr Hunnen weg, de se mit fröhere faste Frünnen tohopen köfft harr. Laterhen plaant de beiden tohopen en Wahnung to nehmen, föhlt sik opletzt aver doch nich in de Laag, de egenen Anwennsels un Freeheiten optogeven.

De Frünnen wunnert sik över Robin ehrn Weddersinn gegen Inkoopszentren un stellt egene Theorien op, woneem dat herkummt. Marshall un Barney sluut över jemehr beiden Theorien en Backswett af, wobi Lily as „Beopdragte för de Backswett“ insett warrt. Marshall glöövt, dat Robin inst in Kanada in en Shoppingmall heiraat hett, wiel Barney glöövt, dat se mol in en Pronofilm mitspeelt hett, de in en Mall dreiht weer. As sik Marshall sien Theorie as verkehrt rutstellt, kriggt he en Backs vun Barney. Man denn warrt se wies, dat Robin in de 1990er Johren mit dat Leed Let’s Go To The Mall en kanaadschen Teeniestar weer. Marshall winnt dorophen fief Backsen, de he över de hele Reeg an Barney verdeelt.

Barney is nu wegen Ted sien Verbanneln mit Robin nich länger sien ‚Wingman‘. Dorüm laadt he sien homosexuellen Broder James för en poor Daag na New York in. Jüst as Barney weer ok James fröher blots an One-Night-Stands intresseert. Dorüm is Barney bannig daalslahn, as James em vertellt, dat he nu en faste Verbinnen ingahn hett un ok bald heiraden will. Dat Poor hett sogor vör en Kind to adopteren, worophen sik Barney mit den Gedanken anfrünnen deit un opletzt ok James sien Trotüüg warrt.

De Staffel geiht dormit to Enn, dat Marshall un Lily heiraden doot. Intwüschen sünd Robin un Ted wedder ut’neengahn vunwegen dat jemehr Ansichten över de Tokumst to verscheden weern. Man, se hebbt dat nümms vertellt, üm de Hochtiet nich mit disse Informatschoon to stören. Later in de veersten Staffel gifft Lily to, dat se naholpen hett, dat Poor ut’nennanner to bringen.

Drüdde Staffel

[ännern | Bornkood ännern]
Cobie Smulders speelt de Reportsche Robin Scherbatsky

Robin kummt torüch vun en Reis na Argentinien, woneem se ehrn ne’en Fründ Gaël drapen hett. Se blifft mit em aver nich lang tohopen. Marshall un Lily hebbt den Plaan ut de gemeensome Wahnung mit Ted uttotehn, nu wo se verheiraat sünd. Dorbi kummt rut, dat Lily wegen en Koopsucht ’n Barg Schullen hett, liekers köpt se sik en Wahnung, de aver scheef is un dordör noch mehr köst. Dorüm künnt se in de drüdden Staffel noch nich ümtehn. Ted verkiekt sik in de Dermatoloogsche Stella Zinman, bi de he in de Praxis is, üm sik en Tätoweren wegmaken to laten, de he sik in’n dunen Kopp steken laten hett. Stella hett en Dochter, Lucy, de Ted in’n Verloop vun de Staffel drapen deit.

Robin is twüschendör wedder mi ehrn Fründ ut de Jöögd tosamen, warrt vun em aver gau wedder sitten laten. Bi den Versöök ehr Trost to spennen, speelt Barney ehr dat tweete Leed vun ehr fröhrere Loopbahn vör (‚Sandcastles in the Sand‘), wat dorto föhrt, dat de beiden tohopen in’t Bett lannt. Üm de Fründschop mit Ted nich to belasten, vertellt se nix dorvun un versöökt den Vörfall to vergeten. Liekers vertellt Robin Ted dorvun, un as Barney em an sien 30. Geboortsdag ok dorvun vertellen will, beent Ted de Fründschop. An’t Enn vun Staffel dree sünd Ted un Barney beide wegen Unfäll in’t Krankenhuus, woneem se jemehr Fründschop nee maken doot. Nadem sik Stella in’t Krankenhuus vun Ted splitt harr, söcht Ted ehr in en Speelhalle op un maakt ehr en Heiraatsandrag.

Veerte Staffel

[ännern | Bornkood ännern]
Neil Patrick Harris speelt Barney Stinson

Barney föhlt wohrhaftig wat för Robin und Stella nimmt den Andrag vun Ted an. Man twüschen Stella und Ted gifft dat bald Striet, vunwegen dat Stelle nich mit ehr Dochter in Ted sien Wahnung intehn will. Ted dorgegen kann Stella ehrn Wahnoort New Jersey nich lieden. Man, opletzt seggt Ted to, dat he na de Hochtiet na New Jersey ümtehn will. Stella ehr Süster geiht kort vör ehr egen Hochtiet mit ehrn Brüüdgaam ut’nanner, so dat Ted un Stella den fre’en Termin övernehmen doot. Jemehr Hochtiet finnt denn aver doch nich statt, vunwegen dat Stella kort för’t Troen utneiht un wedder mit den Vadder vun ehr Dochter tosamenkummt.

Robin arbeit to Anfang vun de Staffel as Narichtensprekersche in Japan. De Arbeit is aver anners, as se sik dat dacht harr, un so brickt se dat gau af. Se tütt bi Ted in, vunwegen dat se keen Wahnung mehr hett in New York. Mit de Hülp vun Barney finnt se kort dorna en ne’e Arbeit bi’t Fröhstücksfeernsehn. Robin un Ted kriegt sik faken in de Wull in jemehr WG un fangt an, jemehrn Striet jeedmol mit Sex bitoleggen. Dat funkschoneert ok good bit to den Dag as Ted markt, dat Barney wat för Robin föhlt. Ut den Grund höört he dormit op.

Ted sien Loopbahn geiht bargop, as he den Opdrag kriggt de ne’e Hööftverwaltung vun de Goliath National Bank uttoklamüstern. Man, al na en poor Folgen warrt de Opdrag wedder torüchtogen un Ted steiht ahn Arbeit dor. He versöcht dorophen sik mit en egen Büro sülvststännig to maken, wat aver nich recht ingang kummt. In de letzten Episood gifft he den Plaan op. Stella ehr Ehmann Tony, de wegen Ted en slecht Geweten hett, vermiddelt em en Steed an de Universität. Bito kamt sik Barney un Robin langsom neger.

Föffte Staffel

[ännern | Bornkood ännern]
Alyson Hannigan speelt de Kinnergoornsche Lily Aldrin

Barney un Robin fangt an to jemehr Geföhlen to stahn un warrt en Poor. Aver ok disse Verbinnen överduert nich de Tiet, wobi ok ditmol wedder Lily nahülpen deit. Barney finnt dorna gau wedder to sien ollen Levenswannel torüch, wiel Robin sik swoor dormit deit, de Situatschoon to överwinnen. Ofschoonst se sik nu vull op ehr Loopbahn as Reportsche kunzentreern will verkiekt se sik in ehrn Kollegen Don Frank. Barney warrt gewohr, dat he Robin mit sien Verhollen na’t Splitten wehdoon hett un sett sik nu dorför in, dat se un Don tosamen kamt. An’t Enn vun de Staffel kriggt Robin en Arbeitssteed in Chicago anboden, dat se na veel Nadenken wegen Don aflehnt. Se vertellt Don nix dorvun, de aver kriggt dorophen dat glieke Anbott un nimmt dat an. Dormit ennt jemehr Verbinnen un Robin is wedder alleen.

Ted geiht sien Steed as Professer an de Universität an un hett dor en teemlich slechten Anfang. Mit de Tiet finnt he sik aver in sien ne’e Rull torecht un dröpt sik mit een Studentin. Later stellt sik rut, dat se de Mitbewahnersche vun sien tokamen Fro is. As sien Mudder to’n tweeten mol heiraden deit, neiht he heemlich vun de Hochtietsfier ut un köfft sik en Huus. Dat Huus wiest sik as teemlich rünnerkamen, liekers hollt Ted doran fast un entwickelt Infäll, woans he dat utboen will. Dat is wohrhaftig dat Huus, woans in’t Johr 2030 de hele Geschicht vertellt warrt. Marshall versöcht in de Twpschentiet Lily ieversüchtig to maken, üm jemehr Mit’nanner wedder ne’en Pep to geven. Man, doröver kriegt se Striet, den se aver wedder bileggt. An’t Enn vun de Staffel besluut se tosamen, dat se en Kind hebben wöölt.

Sösste Staffel

[ännern | Bornkood ännern]
Sarah Chalke speelt Ted sien Binah-Fro Stella

De Wunsch na Kinner blifft för Lily un Marshall toeerst apen, wat jem beide unseker maken deit. Se gaht dorophen na en Fackmann, Dr. Stangel, de jüst so utsütt as Barney.

Ted kriggt nu doch sien ollen Opdrag torüch, den ne’en Hööftsitt vun de Goliath National Bank uttogestalten. Vörsehn is dorför en Boplatz, woneem dat Arcadian Hotel steiht, wat dorför afreten warrn schall. Dorgegen sett sik de Aktivistsche Zoey in, mit de Ted grote Lasten kriggt. Liekers finnt de beiden tohopen, wobi se versöökt, den Striet üm dat Arcadian uttoblennen. Robin kummt in de Twüschentiet langsom över dat Splitten vun Don weg un blifft nu eerstmol alleen. De Staffel verraat bito vele Saken över Barney sien Kindheit. So finnt toeerst sien Halfbroder James sien Vadder un opletzt ok Barney sien egenen.

In de Mitt vun de Staffel blifft Marshall sien Vadder doot, wat em bannig daalsleiht. Er geiht torüch na Huus un leevt en poor Weken as’n Teenager bi sien Mudder. As he torüchkummt, beslutt he sik endlich üm sien Wunsch to sorgen un sik för de Ümwelt intosetten. He künnigt dorüm sien Arbeit bi de GNB un versöcht as Afkaat bi en Naturschuulorganisatschoon ünnertokamen. Zoey un Ted künnt an’t Enn vun de Staffel den Striet üm dat Arcadian Hotel nich mehr länger verdrängen un gaht opletzt wedder ut’nanner. Dat Hotel warrt afreten un de Sitt vun de GNB kann boet warrn. Lily finnt rut, dat se en Kind kriggt, un bi en Vörblenn warrt wiest, dat Barney inst heiraden deit. Wokeen blifft aver apen.

Sövente Staffel

[ännern | Bornkood ännern]
Becki Newton speelt Barney sien Bruut Quinn

Marshall un Lily warrt gewohr, dat se en Jungen kriegen warrt. Lila ehr Grootöllern hebbt en Huus op Long Island, dat se Lily schenken doot. Na’n beten hen un her besluut se dor intotehn, dat jemehr Jung nich midden in de Stadt groot warrt. Marshall kriggt en Steed bi en Kanzlei för Ümweltrecht. Robin besöcht en Psychiater, de ehr hülpen schall ehr Lasten mit ehr Partnerschoppen to minnern. De beiden kamt mit de Tiet tosamen. Barney verkiekt sik in de anstännige Nora, mit de he tohopen kummt. Liekers dat beide wedder in faste Hannen sünd, verleevt Barney un Robin en Nacht tosamen. Barney beennt dorophen sien Verbinnen mit Nora, as he hapt dat he wedder mit Robin tosamen kummt. Man Robin blifft bi ehrn fröheren Psychiater Kevin. As he ehr en Heiraatsandrag maken deit, vertellt Robin em, dat se keen Kinner kriegen kann. Opletzt geiht dat mit jemehr Leev nich goot un ok se splitt sik wedder.

As Robin wedder alleen is, vertellt Ted ehr eenmol mehr, dat he ehr ehr jümmer noch geern hett. Robin hett em woll ok geern, man as Fründ un nich as Leevsten. Se tütt dorophen in en egene Wahnung, de se nu betahlen kann, vunwegen dat se en betere Arbeit hett. Üm mit de verleden Tiet aftosluten, söcht sik ok Ted en ne’e Wahnung. He överlett de fröhere WG Marshal un Lily, de mit dat Leven op Long Islang nich tofreden sünd un kuum noch Tiet hebbt för jemehr Frünnen. Barney slutt mit mit Robin af un fangt wat mit de Strippersche Quinn, de al gau bi em intehn deit. Ted övernimmt dorophen ehr Wahnung. As Quinn för Barney mit dat Strippen ophöört, maakt he ehr en Heiraatsandrag. Ted löpt sien fröhere Bruut Victoria wedder över’n Weg un fangt wedder an üm ehr to warven. Opletzt kummt Marshall un Lily jemehr Söhn Marvin op de Welt. An’t Enn warrt in en Vörschau wiest, dat Barney inst Robin heiraten deit.

Achte Staffel

[ännern | Bornkood ännern]
Kyle MacLachlan speelt den rieken Captain

Anfang vun de Staffel kamt Ted un Victoria wedder tohopen, man Victoria foddert vun Ted, dat he sien Fründschop to Robin opgeven deit. Dat will Ted nicht doon un so geiht dat mit jem gau wedder vörbi. Later dröpt he en junge Deern, de sik as Barney sien Halfsüster Carly rustellt. Barney will vun en Verbinnen nich recht wat weten, und kort later gifft Ted ehr wedder op. Dorna dröpt he Jeanette, mit de he wat anfangt, ofschoonst sien Frünnen em dorvun afraat. As sik ruttell, hett se Ted al en Tiet lang nastellt. Se gaht wedder ut’nanner, as Jeanette dat „Playbook“ finnt, dat Barney sien Machen bargt, Fronslüüd rümtokriegen. Barney hett so doon, as harr he dat för Robin tonichten maakt. Jeanette verwööst Ted sien hele Wahnung, vunwegen dat se dacht, em höört dat to.

Barney versöcht Quinn gegenöver geheem to hollen, dat he mit Robin tosamen weer. Ut Versehn warrt dat aver von Lily un Marshall vertellt. Barney sett nu vör jem en Ehverdrag op, den Quinn aver nich annimmt. Se maakt dorför en egenen, den Barney aver nich akzepteert. Se kriegt sik in de Wull doröver, wat opletzt dortö föhrt, dat se ut’neen gaht. Barney hülpt kort later Robin un ehrn ne’en Fründ Nick ut’nanner to bringen. He sülvst fangt denn wat mit Robin ehr Arbeitskolleegsche Patrice an un plannt ehr en Andrag to maken, wovun Robin nu wedder gor nicht andahn is. Man, dat höört allens to en Plaan vun Barney, den he utklamüsert hett üm Robin torüch to kriegen. Also maakt he ehr den Andrag un Robin nimmt em an. Se tütt bi Barney in, ofschoonst se em toeerst dorto bringen wull, sien Wahnung to verköpen.

Lily un Marshall versöökt för jemehrn Söhn en Oppassersche to finnen, wat nich so licht is. Opletzt maakt Lily ehr Vadder Mickey de Arbeit, ofschoonst de beiden dat eerst nich wullen. As sik rutstell, maakt he sien Saak goot. Unvermodens kriggt Lily en Anbott vun Zoey ehrn Ex-Mann, den „Captain“, de en Beradersche för Kunstwarken bruukt. Dordör hett se jümmer weniger Tiet för Marshall. De dorgegen vermiddelt en ollen Studienfründ en Vörstellen bi sien Arbeitssteed, dat aver nich goot löpt. Opletzt stellt sik rut, dat de dordör blots an Informatschonen kamen wull, to den Fall, den Marshall vertreden deit. Vör Gericht drapt se sik wedder.

Lily kriggt vun’n „Captain“ den Opdrag mit em vör een Johr na Rom to tehn un dör för em to arbeiden. Dat lehnt se eerst af, üm Marshall nich sien Loopbahn to vermasseln. Man, Marshall steiht achtern ehrn Droom un fraagt den „Captain“, wat he sien Anboot nich noch mol maken wüll. Eerst in’n drüdden Anloop nimmt Lily de Opgaav an. An’t Enn boet sik heemlich Striet op: Marshall kriggt en Anbott, in New York as Richter to arbeiten. He hett nich veel Tiet to’n Överleggen un nimmt de Steed an ahn vörher mit Lily to snacken, woll in dat Weten, dat se denn nich na rom tehn künnt. Ted plaant en Steed in Chicago antonehmen, üm tokamen Arger un besehrte Geföhlen ut’n Weg to gahn, vunwegen dat he anners nich mit Robin afsluten kann. Opletzt warrt endlich wiest, wokeen de Mudder vun Ted sien Kinner is.

Neegte Staffel

[ännern | Bornkood ännern]
Cristin Milioti speelt de Mudder, de Ted negen lang Staffeln söcht

De letzte Staffel speelt meist vullstännig an dat Wekenenn, as Barney un Robin jemehr Hochtiet stattfinnt un bargt en Reeg vun Torüchblennen. Dorbi warrt wiest, woans all vun Ted sien Frünnen na un na de Mudder drapen hebbt, noch vördem Ted ehr dröpt: Se snackt Barney goot to, sik mit Robin to verlaven, slutt in de Bahn na den Hochtietsoort Fründschop mit Lily, nimmt Marshall in ehrn Bus mit na de Hochtiet un rüümt opletzt ok Robin ehr Twievel an de Hochtiet ut.

As Robin en Keed, de se vör Johren mol in’n Central Park vergraavt hett, nich wedder finnen kann, twievelt se an de Hochtiet. Ted markt, wo wichtig ehr dat is de Keed torüchtokriegen un maakt sett allns in, üm ehr to finnen. Dat is sien Weg, över Robin wegtokamen. Lily is intwüschen över Telefon gewohr worrn, dat Marshall en Steed as Richter annahmen hett. Se is bannig gallig doröver, dat se vörher nicht fraagt worrn is un kriggt sik mit Marshall düchtig in de Hoor. De beiden versöhnt sik aver wedder un Lily vertellt Marshall, dat se wedder in Kind kriggt. Butendem warrt de Grupp wies, dat Ted plannt, direkt na de Hochtiet na Chicago to gahn. He lett sien Plaan fallen, as he an’n Bahnhoff vun Farhampton Tracy drapen deit – de tokamen Mudder vun sien Kinner.

In korte Form warrt dorvun vertellt, woans sik dat Leven wieter entwickeln deit: Tracy un Ted heiraat fief Johren later. Tracy ehr eerste grote Leev is an ehrn 21. Geboortsdag doodbleven, wat de glieke Dag weer, as Ted dat eerste mol Robin drapen hett un Marshall un Lily sik verlaavt harrn. Marshall lehnt de Steed as richter af und geiht mit Lily vör en Tiet na Italien, woneem se sik ehrn Droom wohr maakt. Later kriggt he noch mol de Mööglichkeit richter to warrn un nimmt de Steed denn an. Wieter in de Tokumst kannedeert he för en Steed an’n State Supreme Court un kriggt de Steed ok. Se teht in en gröttere Wahnung, as se op jemehr drütt Kind töven doot.

Ted un Tracy jemehr Hochtiet finnt in Kreis vun de Frünnen statt. Blots Robin hett vun de Grupp Afstand nahmen, vunwegen dat ehr eh mit Barney na dree Johren tweigahn is. Se harr mit ehr Loopbahn as spoodrieke Feernsehreportersche to veel to dooon un weer to veel op Reisen. Barney fangt dorna wedder sien ool Leven an un schrifft en nee Playbook. Een Dag passeert dat, dat he bi sien sexuellen Aktivitäten en Fro en Kind maakt. Eerst twievelt he dull an sien ne’e Rull as Vadder, warrt aver vullstännig vun sien Geföhlen överlopen, as he sien lütte Dochter dat eerste mol in sien Arms nimmt.

Tracy warrt aver krank un blifft 2024 an en Krankheit dood, de nich wieter betekent warrt. Söss Johren later, as Ted mit sien Vertellen to Enn is, meent sien Kinner to em, dat jemehr Mudder in de hele Geschicht teemlich wenig vörkamen deit. Dorüm vermoodt se, dat Ted jem egentlich nich vun jemehr Mudder vertelln wull, man veel mehr achtern rüm rutfinnen wull, wat sien Kinner woll dormit kloor kamen deen, wenn he versöken de wedder mit Robin tosamen to kamen. Nadem de beiden Kinner em Moot maken doot, na de Johren allen noch mol sien Glück to versöken, steiht he an’t Enn mit dat blaue Hoorn ünner Robin ehr Finster, dat he ehr all bi jemehr eerst Drapen mitbröcht harr. Se lacht sik gegensietig an.


Figuren un Dorstellers

[ännern | Bornkood ännern]

Hööftfiguren

[ännern | Bornkood ännern]

Ted Mosby

[ännern | Bornkood ännern]

Theodore „Ted“ Evelyn Mosby is de Hööftfigur un Ik-Verteller vun de Reeg. He is vun Beroop Architekt, de in’n Verloop vun de Geschicht sien Arbeit verlütt, en egen Büro grünnt un later denn as Professer an de Columbia University arbeit. He sütt sik as de intellektuelle Deel vun de Frünnen, mag Literatur, Wien, Architektuur un schottischen Whisky. Butendem is he en Romantiker. He ziteert geern Bertolt Brecht un Pablo Neruda, warrt dorbi aver jümmer wedder vun sien Frünnen ünnerbroken. Ted un sien Süster Heather stammt ut Shaker Heights in de Neeg vun Cleveland in Ohio. Studeert hett he an de Wesleyan University in Connecticut, woneem he Marshall un Lily drapen hett. Mit jem tohopen is he na New York tagen.

He söcht na sien Droomfro, de sien Intressen deelt, heiraden un twee Kinner hebben will. Sien Söök is aver nich eenfack. In de drüdden Staffel dröpt he Stella, de sien Heiraatsandrag anehmen deit, em denn aver vör’n Troaltar stahn lett, as se wedder mit ehrn Ex-Mann tohopen kummt. Sien latere Ehfro Tracy warrt eerst in de letzten Staffel vörstellt.

Marshall Eriksen

[ännern | Bornkood ännern]

Marshall kummt ut St. Cloud in Minnesota, woneem he mit twee öllere Bröder opwossen is. Sien Öllern sünd Marvn Sr. un Judy. Siet sien Tiet op’t College is he mit Lily Aldrin tohopen. de he in’n Verloop vun de Reeg heiraden deit. An’t Enn hebbt de beiden dree Kinner. Ted is sien besten Fründ, den he ok op’t College drapen hett. Se deelt sik to Anfang en Wahnung in New York. Egentlich wull Marshall Afkaat warrn, üm gegen grote Kunzernen un för den Ümweltschuul to strieden. Üm Geld to verdenen nimmt he aver na sien Studium nimmt he en Steed bi de Goliath National Bank, de Barney för em kloor maakt. Af de sössten Staffel wesselt he denn eerst na de Ümweltorganisatschoon NRDC, later in en Kanzlei, de sik för Ümweltfragen insett. An’t Enn vun de Reeg warrt he Richter in hoge Steed.

Marshall is fründlich, weet üm sien Verantwoorden un blifft jümmer optimistisch. He is Fan vun de Football-Mannschaft Minnesota Vikings un vun’t Baseball-Team New York Mets. He is goot bi Brettspelen un fangt dat Freten an, wenn he suer is.

Robin Scherbatsky

[ännern | Bornkood ännern]

Robin Charles Scherbatsky Jr. kummt ut Kanada. Se is kort vör Anfang vun de Geschicht na New York tagen, woneem se eerst as Narichtenspekersche för den öörtlichen Senner „Metro News 1“ arbeit. Later modereert se en Talkshow fröh morgens un warrt den in’n Verloop vun de Reeg bekannt. Se övernimmt en Arbeit as Butenreportersche un Narichtensprekersche för World Wide News (WWN). In ehr Jöögd weer Robin in Kanada en Kinner-Popstar ünner den Naam Robin Sparkles. Ehr Naam höört sik mehr na’n Jungen an. Dat kummt vun ehrn Vadder, de egentlich lever en Söhn hebben wull un sien Dochter dorüm ok bit in de Pubertät as Jungen behannelt hett. Se hett sorüm den Ümgang mit Wapen lehrt, mag Ieshockey un Scotch Whisky, hett dorgegen aver nich veel för Kinner un Romantik över.

Se is över de Tiet vun de Geschicht eerst mit Ted un later mit Barney tohopen, den se 2013 heiraden deit. De Eh geiht aver in de Brüch na dree Johren, vunwegen dat Robin wegen ehr Arbeit veel reisen deit un kuum Tiet för Barney hett. So tütt se sik ok vun de annern Frünnen torüch. 2030, söss Johren na’n Doot vun sien Fro Tracy, versöcht Ted noch mol sien Glück mit ehr, nadem sien Kinner em goot tosnackt hebbt.

Barney Stinson

[ännern | Bornkood ännern]

Barney jachtert jümmerto de Fronslüüd achteran, liekers is he keen Minsch, de lang bi jem blieven mügg. He överleggt sik jümmers ne’e Tricks, mit de he Fronslüüd rümkriegen deit, un hett jem al daal schreven in sien „Playbook“. De Kneipe besöcht he blots, üm dor ne’e Fronslüüd för en One-Night-Stand to drapen, wat ok faken klappt. Sien Kennteken is, dat he jümmer Antog na Maat drägen deit, man ok sonst hett he bannig veel Talente. He leegt veel Weert op Fründschop – vör allen to sien männliche Frünnen. He hett sogors en Book, woneem he Regeln för den Ümgang fastleggt hett, den so nöömten „Bro-Kodex“, de he aver sülvst ok breken deit, as he mit Robin in’t Bett lannt. Mit Robin is he längere Tiet tohopen, later ok mit Nora un mit de Strippersche Quinn. Robin heiraat he opletzt, ofschoonst de Eh blots dree Johren holen deit. 2010 hett Barney en „perfekte Week“, wat für em bedüüt, dat he jeden Dag mit en annere Fro in’t Bett weer. 2019, nadem sien Eh mit Robin wedder scheedt is, maakt he den perfekten Maand. Man dorbi maakt he een vun de Fronslüüd en Kind, de em later sien Dochter to Welt bringt.

Barney is de Söhn vun Loretta Stinson, de fröher ok veel mit verschedene Mannslüüd wat harr. He hett en swarten Halfbroder, de homosexuell is, heiraten deit un Kinner adopteert hett. Se sünd beide ahn Vadder opwossen, finnt jem aver in’n Verloop vun de Reeg. Barney hett en nich nau defineerte Arbeit bi de Muddersellschop vun de Goliath National Bank, woneem he veel Geld verdeent. Dordör kann he sik vele Saken leisten. Ok Barney drinkt geern schottischen Whisky. En vun sine gröttsten Hobbys na de Fronslüüd is Laser Tag.

Lily Aldrin

[ännern | Bornkood ännern]

Lily hett Marshall in jemehr College-Wahnheim drapen un is gau mit em tosamen kamen. To Anfang vun de eersten Staffel sünbd se al negen Johr en Poor. Vörher harr se en anneren Fründ, de Scooter nöömt warrt. An’t Enn vun Staffel Een neiht Lily aver ut na San Francisco, woneem se en Kunststipendium opnehmen deit. De Maleree hett ehr al jümmer an’t Hart legen, man se kummt wedder Marshall torüch un heiraat em later denn ok. Von Beroop is se Kinnergoornsche, bito maalt se aver wieter un gifft den Droom nich op, inst vun de Maleree leven to künnen. In de achten Staffel warrt se Kunst-Beradersche vun’n Captain, för den se later ok för en Tiet na Italien tütt.

In’n Verloop vun de Geschicht warrt Lily de beste Fründin vun Robin. Bedüdene Egenoorden vun ehr sünd ehr Koopsucht un dat se keen Geheemnissen för sik behollen kann. Vun ehr Kindheit her hett se Lasten dormit, ehrn Vadder eernst to nehmen, man dat warrt mit de Tiet beter. Ok mit de Leevwies vun Marshall sien Familie kummt se nich jümmer goot torecht. Mit Marshall kriggt se in’n Verloop vun de Reeg en Kind – ehrn Söhn Marvin W. Jr. –, doröver rut kamt noch twee wietere Kinner.

Nevenfiguren

[ännern | Bornkood ännern]

Tracy McConnell

[ännern | Bornkood ännern]

Tracy warrt eerst in de letzten Dubbelfolg vun de Reeg vörstellt. Vörher warrt blots jümmer vun „De Mudder“ snackt. En en fröhere Episood seggt Ted sien Kinner mit en Smustern, dat jemehr Mudder en Strippersche is, de Tracy hett. Dorut is al vörher to sluten, dat de Mudder Tracy heet. Tyypsche Egenorden oder Teken vun ehr sünd ehr gele Regenschirm un dat se Bassgitarr in en Musikgrupp speelt. Se harr en Fründ, de an ehrn eenuntwintigsten Geboortsdag dood bleven is. Se lehnt dorüm ok den Andrag vun ehrn aktuellen Fründ af un verlett em, kort vördem se Ted drapen deit. Lily, Robin, Marshall un Barney drapt ehr all al vör Ted, man ahn dat gegensietig to weten. Jeeden vun jem hülpt se in en sünnere Situatschoon. Ted sülvst dröpt se bewusst eerst na de Hochtietsfier vun Barney un Robin, op de se mit ehr Grupp Musik maakt hett, as beide op’n Bahnhoff Farhampton op’n Tog töövt. Wegen ehr lett Ted sien plaante Steed in Chicago susen un blifft in New York. Se verloovt sik, kriegt twee Kinner un heiraat opletzt. An’t Enn vun de Folg stellt sik aver rut, dat se in’t Johr 2024 an en swore Krnakheit dood bleven is.

Penny Mosby

[ännern | Bornkood ännern]
Lyndsy Fonseca speelt Ted sien Dochter Penny

Penny is de Dochter vun Ted Mosby un Tracy McConnell. Se warrt ruchweg 2015 boren. Ehr Rull speelt in de Rahmengeschicht, in de sik de Kinner anhöört, woans Ted jemehr Mudder darpen hett. 2030 is se de Hööftgrund, dat Ted noch mol versöcht, üm Robin to warven.

Luke Mosby

[ännern | Bornkood ännern]

Luke is de Söhn vun Ted un Tracy un dormit de jüngere Broder vun Penny. Luke is na Luke Skywalker ut dat Star-Wars-Universum utsöcht. Ok Luke snackt sien Vadder goot to, dat he dat noch mol mit Robin versöken schall.

Marvin W. Eriksen

[ännern | Bornkood ännern]

Marvin is dat eerste Kind vun Lily un Marshall, dat an’t Enn vun de sövten Staffel boren warrt. Dat Marshall noch rechtietig to de Geboort bi Lily wesen kann, hett he Barney to verdanken, de dorüm den Tweetnaam bestimmten dröff. He wählt den Utdruck „Waitforit“ (in de hoochdüütsche Faten „Warte noch“), wat Barney sien leevsten Spröök is.

Victoria

[ännern | Bornkood ännern]

Victoria is en Konditersche, de in de Reeg tweemol mit Ted tohopen is. Ehr Nanaam warrt nich vertellt. Se drapt sik dat eerste mol op en Hochtiet, woneem se de Torten maakt hett. As se mit Ted tosamen is, kriggt se en Stipendium för en Studium in Düütschland, dat se annehmen deit. Eerst blievt se topohen, man dat is gau to Enn as Ted mit Robin in’t Bett lannt. Se fangt dorophen wat mit Klaus an, den se in Düütschland drapen hett. Se mellt sik fief Johr lang nich bi Ted, kriggt en Andrag vun Klaus un will em heiraden. Dör en Tofall dröpt se Ted wedder un geiht binah mit em frömd, ofschoonst se al verloovt is. Se heiraat Klaus denn doch nich un kummt wedder mit Ted tohopen. De maakt ehr ok en Andrag, man Victoria will em blots heiraden, wenn he sien Fründschop mit Robin opgeven deit. Se is bang, dat Ted wedder Geföhlen för Robin kriegen deit un ehr sitten lett. Dorop mag sik Ted aver nich inlaten, un so gaht se wedder ut’neen.

Stella Zinman

[ännern | Bornkood ännern]

Stella Zinman is en Dermatoloogsche,l de Ted drapen deit as he sik en Tattoo wegmaken laten will. Se leevt scheedt vun ehrn Ehmann Tony un hett en Dochter, Lucy, mit de se in New Jersey wahnt. Ted finnt ehr intressant un fraagt, wat se sik mit em drapen will. Se seggt em foorts af, vunwegen dat se blangen ehr Arbeit un ehr Dochter keen Tiet hett. Ted lett nich aver locker un arrangeert en Twee-Minuten-Date, üm ehr to wiesen, dat he dat eernst mit eher meent. Dorophen lett se sik op em in. De beiden sünd ’n Tiet lang tohopen, as Ted ehr en Andrag maken deit, den se annimmt. Man, an’n Dag vun de Hochtiet lett he em doch sitten, vunwegen dat se wedder mit ehrn Ex-Mann tohopen kummt.

Zoey Pierson

[ännern | Bornkood ännern]
Jennifer Morrison speelt Ted sien Bruut Zoey

Zoey is en Aktivistin, de sik för’t Wohren vun en oolt Hotel insetten deit, dat afreten warrn schall. De Grund is de Neebo vun den Firmensitt vun de Goliath National Bank, mit den Ted beopdraagt is. He finnt Zoey attraktiv, un se em woll ok, ofschoonst de de Fro vun „den Captain“ is. Ofschoonst se sik in jemehrn Striet över den GNB-Neebo nich eenig warrn künnt, lett se ehrn Mann sitten un fangt wat mit Ted an. Se frünnt sik dorpohen ok mit den Rest vun de Grupp an un kummt mit Ted tohopen. Disse Verbinnen geiht opletzt aver doch in de Brüch, as Ted sik bi en offiziell Anhören vör den Neebo insetten deit, wiel Zoey üm jeedeen Pries dat Hotel schulen will.

Quinn Garvey

[ännern | Bornkood ännern]

Quinn Garvey is en Strippersche, de in’t Lusty Leopard arbeiten deit. Se kummt to de Frünnen, as se för ehr Fründin un Barney för ted mitkummt. Quinn vertellt Ted aver, dat Barney bi ehr nich lannen kann. Eerst later markt Barney, dat se as Strippersche in sien Stammlokal arbeit. AS Barney dat gewohr warrt, verkiekt he sik in ehr un söcht ehr Opmarksomkeit. Se nütt se Gelegenheit un nimmt em dorför veel Geld af. As se sik later in en Café weddersehn doot, stellt Quinn fast, dat se ok wat för Barney över hett un dat ehr Verhollen nich recht weer. Se warrt en Poor, teht tosamen un verlööft sik ok. Man bi’t Opsetten vun en Ehverdrag stellt se fast, dat se keen Vertroen to’nanner hebbt un gaht wedder ut’nanner. Se duukt later noch mal bi Barney sien Junggesellenafscheed op.

Nora

[ännern | Bornkood ännern]

Nora is en Kolleegsche vun Robin bi „World Wide News“, de Barney över ehr kennen lehrt. Nora hett en klore Ansicht, wat se vun en Kerl will: se söcht en ehrliche, faste Verbinnen. Barney versöcht eerst, so as jümmer mit ehr to spelen, hett denn aver doch wohre Geföhlen för ehr. He vertellt ehr vun sien Afsichten, üm ehr de Wohrheit to seggen, wat ehr teemlich tosetten deit. Later markt Barney aver, dat he ehr jümmer noch geern hett un röpt ehr an. He vertellt ehr, dat em dat leed deit un dat he dat nu eernst mit ehr meent. He deit allens, üm ehr torüch to winnen, man jümmer Verbinnen hollt nich lang, vunwegen dat Barney an sik doch wat för Robin föhlt.

Ranjit Singh

[ännern | Bornkood ännern]

Ranjit is en Taxifohrer ut Bangladesch, de Ted, Lilly, Marshall, Robin un Barney faken dör de Stadt fohren deit, wenn se op’n Swutsch gaht. Mit de Tiet warrt Ranjit jümmer mehr jemehr Chauffeur. An’t Enn vun de Reeg kann he sik dör go’en Aktienhannel en egene Limosienfirma leisten.

Dorstellers un Synchronisatschoon

[ännern | Bornkood ännern]

De düütsche Synchronisatschoon is dör de Synchroonfirma Scalamedia GmbH in München ünner de Dialoogregie vun Norbert Steinke entstahn.

Rullennaam Schauspeler(sche) Episoden Synchroonstimm
Ool Ted Mosby (Verteller) Bob Saget 1.01-9.24 Christian Tramitz
Theodore „Ted“ Evelyn Mosby Josh Radnor 1.01-9.24 Martin Halm
Marshall Eriksen Jason Segel 1.01-9.24 Hubertus von Lerchenfeld
Robin Charles Scherbatsky Jr. Cobie Smulders 1.01-9.24 Christine Stichler
Barney Stinson Neil Patrick Harris 1.01-9.24 Philipp Moog
Lily Aldrin Alyson Hannigan 1.01-9.24 Angela Wiederhut
Tracy McConnell (de Mudder) Cristin Milioti 8.24-9.24 Annina Braunmiller
Penny, Ted sien Dochter Lyndsy Fonseca 1.01-9.24 Farina Brock
Luke, Ted sien Söhn David Henrie 1.01-9.24 Tim Schwarzmaier
Ranjit (Chaufför) Marshall Manesh 1.01-9.22 Claus Brockmeyer
Carl (Weert in’n Pub) Joe Nieves 1.01-2.14; 4.13-9.21 Patrick Schröder
Judy Eriksen (Marshall sien Mudder) Suzie Plakson 1.09–9.20 Christina Hoeltel (Staffel 1-5)
Marion Hartmann (Staffel 6-9)
Marvin Eriksen Sr. (Marshall sien Vadder) Bill Fagerbakke 1.09; 4.19-8.02; 9.17 Ekkehardt Belle
Victoria Ashley Williams 1.12-1.18; 7.02-8.05; 9.17 Stefanie von Lerchenfeld
Sandy Rivers (Journalist) Alexis Denisof 1.18-1.22; 6.13-8.11; 9.21 Matthias Klie
James Stinson (Barney sien Broder) Wayne Brady 2.10; 3.10; 6.02-7.11; 9.01-9.22 Stefan Günther
Stella Zinman Sarah Chalke 3.13-4.23; 9.17 Tatjana Pokorny
Robin Charles Scherbatsky Sr. (Robin ehr Vadder) Eric Braeden (4.06)
Ray Wise		 4.06
6.14; 7.06; 8.13; 8.23; 9.18; 9.22		 Reinhard Brock (Staffel 4-8)
Christoph Jablonka (Staffel 9)
Loretta Stinson (Barney sien Mudder) Frances Conroy 4.15; 6.02-9.22 Marion Hartmann
Cindy Rachel Bilson 5.12; 6.01; 8.13; 9.16 Marieke Oeffinger
Zoey Pierson Jennifer Morrison 6.05-6.24; 9.21 Kathrin Gaube
De „Kaptein“ Kyle MacLachlan 6.08-6.17; 8.17-8.23; 9.20 Pierre Peters-Arnolds
Nora Nazanin Boniadi 6.16-7.10; 9.14 Laura Maire
Jerome „Jerry“ Whitaker (Barney sien Vadder) John Lithgow 6.19; 6.21; 9.10; 9.22 Reinhard Brock (Staffel 6)
Leon Rainer (Staffel 9)
Quinn Garvey Becki Newton 7.16-8.22 Shandra Schadt
Patrice Ellen D. Williams 7.04-8.12; 9.04; 9.18; 9.22 Andrea Wick
Wendy (Bedenen in’n Pub) Charlene Amoia 1.04-6.17 Andrea Wick
Mickey Aldrin (Lily ehr Vadder) Chris Elliott 5.09; 6.14; 7.07-7.23; 8.03; 8.12; 9.20 Gudo Hoegel
Linus (Barmann Farhampton Inn) Robert Belushi 9.02-9.20 Simon Pearce
Kevin (Psychiater) Kal Penn 7.04-7.16; 9.21 Pascal Breuer

Vele Rullen sünd mit Schauspelers besett worrn, de vörher in Regen vun Joss Whedon (Utfinner vun Buffy the Vampire Slayer) speelt hebbt. Craig Thomas meen dorto, dat he un ok Carter Bays grote Buffy-Fans sünd[1]. Dorto tellt Alyson Hannigan as ok ehr Ehmann Alexis Denisof un wieter to’n Bispeel Tom Lenk, Amy Acker, Harry Groener, Seth Green oder Morena Baccarin.Annere Gastrullen weern mit Schauspelers besett, de tosamen mit Jason Segel in de Reeg Freaks and Geeks to sehn weern. Dorto tellt Martin Starr, Busy Philipps un Samm Levine.

In de Reeg weern vele bekannte Gaststars to sehn. Dat weern ünner annern Models as Heidi Klum un Adriana Lima, Moderaters as Bob Barker, Maury Povich, Jim Nantz un Regis Philbin, Schauspelers as Jane Seymour, Katie Holmes, Kyle MacLachlan, Jorge Garcia, Lindsay Price un William Zabka oder Singers as Enrique Iglesias, Britney Spears, Jennifer Lopez, Katy Perry un Nicole Scherzinger oder Sportlers so as Mike Tyson. De beiden Dreihbookschrievers Carter Bays un Craig Thomas sünd in Episood 1.21 as Nootfallsanitäters to sehn.

Produkschoon

[ännern | Bornkood ännern]

Den Infall för de Reeg How I Met Your Mother keem vun de beiden Dreihbookschrievers Craig Thomas un Carter Bays, de al beide för David Letterman un American Dad arbeit harrn. De Reeg besteiht ut negen Staffeln, de all bit März 2014 utstrahlt worrn sünd. De beiden eersten Staffeln harrn tweeuntwintig Folgen, de drüdde blots twintig. Dat hüng dormit tohopen, dat de drüdde Staffel na ölven Folgen ünnerbroken worrn is vunwegen den Streik vun de Schrievers. In’n März 2008 sünd na en Poos vun dree Maanden, wietere negen Folgen dreiht worrn. De annern Staffeln dorna harrn jeedeen veeruntwintig Folgen.

Bi den gröttsten Deel vun de Episoden weer Pamela Fryman Speelbaassche, de vörher al an Regen as Two and a Half Men un Frasier bedeeligt weer. How I Met Your Mother is in de Studios vun de 20th Century Fox in Los Angeles dreiht worrn. De Geschicht sülvst speelt gröttstendeels in New York City.

Anners as bi tyypsche Sitcoms is How I Met Your Mother nich vör Tokiekers dreiht worrn. De Dreihtiet för een Folg hett hier ok üm un bi dree Daag duert, wiel normalerwies ruchweg dree Stünnen för een Episood ansett warrt. Dat kummt vun de velen Torüchblennen un ünnerscheedliche Öörd, woneem de Geschicht spelen deit. Dat weer vör Publikum veel to opwännig wesen. Man, meist jede fardige snedene Folg is denn vör Tokiekers weist worrn. Dat Lachen weer opnahmen un in de Toonspoor rinsneden, so dat ok in de Originalfaten Lacher to hören sünd.[2]

De beiden Hööftdorstellersches Alyson Hannigan un Cobie Smulders hebbt beide in’n Verloop vun de veersten Staffel en Kind kregen. Dat weer bi beide nich in’t Dreihbook schreven, so dat de Kinnerbuuk dör Kledaasch, Saken oder Opnahmen vun dicht bi, versteken weer. Hannigan künn dorüm ok de letzten Folgen vun de veerten Staffel nich mehr mitspelen. För disse Tiet weer ehr Rull ut dat Dreihbook rutschreven. Dat Enn vun de Staffel is aver al fröher afdreiht worrn, so dat Lily dorbi wesen künn. Hannigan hett wiel de sövten Staffel noch mol en Kind kregen, ditmol weer dat ok as Deel vun de Geschicht in’t Dreihbook schreven.[3]

De Feernsehreeg is in de USA to’n eersten mol an’n 19. September 2005 op CBS sennt worrn. In de USA harr de Reeg in’n Dörsnitt twüschen 8,2 un 10,5 Millionen Tokiekers. In Düütschland is de Reeg op ProSieben toeerst utstrahlt worrn. Dat weer an’n 13. September 2008. Hier legen de Tokiekertallen in’n Dörsnitt twüschen en halve Million bi de eersten dree Staffeln un annerthalf Millionen bi de Staffeln dorna.

As Titelmusik is dat Leed „Hey Beautiful“ vun de Grupp The Solids bruukt worrn, bi de de Schrievers Carter Bays un Craig Thomas Liddmaten sünd.

Kritik

[ännern | Bornkood ännern]
  • In’n Branchendeenst Variety weer de Feernsehreeg utermatig good besnackt. Dorbi weer sünners Neil Patrick Harris in de Rull vun Barney loovt un dat Kunzept as klook opboet rutstellt.[4]
  • De evangelikale Mediendeenst vun Focus on the Family stör sik doran, dat sik de Inholt vun de Reeg to dull üm Sex un Alkohol dreiht.
  • Der Spiegel schreev to’n Start in Düütschland, dat de Reeg de schönsten Egenschoppen vun de beiden modernen Sitcom-Klassikers Friends un Seinfeld tohopenbringen de.[5]

Dat Enn vun de Reeg is ünner de Fans man ok in de Fackpresse op grote Kritik stött, vunwege dat Ted denn sien Fro finnt, de aver en ppor Johren later doot blifft[6][7][8]. Liekers geev dat aver ok Loov[9]. Wat vör allen kritiseert weer, weer dat de hele Reeg dorvun vertellt, woans Ted sien tokamen Fro drapen deit, een denn aver blots dör en lütte Informatschoon blangento wies warrt, dat jüst disse Fro al siet söss Johren doot is. Wgen disse Kritik beslöten de Produzenten op DVD an alternatiev Enn to maken, bi dat de Mudder nich doot bleven is[10].

Utteken

[ännern | Bornkood ännern]

De Feernsehreeg is so spoodriek wesen, dat se för wiet mehr as hunnert Film- un Feernsehpriesen nomineert worrn is, dorünner ok twee mol för den Golden Globe (beide mol Neil Patrick Harris as Best Nevendorsteller). Uttekent weer die Reeg mit fiefuntwintig Priesen, dorünner:

Spin-off

[ännern | Bornkood ännern]

In’n Oktober 2013 keem to’n eersten mol de Infall op, en Aflegger to de Reeg to maken mit den Titel How I Met Your Dad. En Maand later geev de Senner CBS bekannt, dat en Pilotfolg in Opdrag geven worrn weer. Disse Spin-off schüll de Geschicht vun en annere Grupp vun Frünnen in New York ut de Sicht vun en Fro vertellen, de op de Söök na en Ehmann un Vadder vun ehr Kinner is[11]. In’n Mai 2014 weer vun CBS to höörn, dat keen wietere Folgen för How I Met Your Dad bestellt warrn schülln. Wohrschienlich wegen Bedenken to den Inholt vun de Pilotfolg[12].

In’n Dezember 2016 weer künnig maakt, dat Isaac Aptaker un Elizabeth Berger as Dreihbookschrievers an de Reeg How I Met Your Father arbeiten doot un ok as Exekutiv-Produzenten insett sünd. Carter Bays, Craig Thomas un Emily Spivey hülpen jem dorbi[13]. Ok disse Plann is aver wedder instellt worrn.

De drüdde Versöök för en Spin-off weer an’n 8. August 2017 ankünnigt. Dorna schall Alison Bennett den Opdrag to hebben, de Reeg to schrieven mit Bays un Thomas as Executive-Produzenten[14].

Anners wat

[ännern | Bornkood ännern]
  • In de Episood Blitzgiving in Staffel söss schall Steve oder „De Blitz“ mehrere Tallen na sien Wahl seggen. He wählt 4, 8, 15, 16, 23 un 42 ut. Speelt warrt de Rull vun Jorge Garcia, de in de Feernsehreeg Lost as Hugo „Hurley“ Reyes to sehn is un dor jümmer wedder mit de glieken Tallenreeg in Verbinnen bröcht warrt.
  • De letzte Szeen, in de de Kinner jemehrn Vadder kloor maken doot, dat sik sien Vertellen de hele Tiet üm sien Leev to Robin dreiht hett, is al acht Johren vörher wiel de tweeten Staffel opnahmen worrn. De Grund weer, dat de beiden Dorstellers vun de Kinner an’t Enn vun de Reeg al to oolt utsehn harrn[15]
  • För de Reeg weern toeerst blots acht Staffeln plaant. Wegen de hogen Inschalttallen is de neegte dorto kamen. De Verdrääg vun de Schrievers un Schauspelers löpen dorüm egentlich al 2013 ut, un de Geschicht weer an sik ok blots för dissen Duer utleggt[16].

Borns

[ännern | Bornkood ännern]
  1. ↑ William S. Paley TV Fest: How I Met Your Mother op IGN.com (Webarchiv), afropen an’n 14. Mai 2018
  2. ↑ http://featuresblogs.chicagotribune.com/entertainment_tv/2007/01/how_i_met_your_.html
  3. ↑ Alyson Hannigan perfekt schwanger, op gala.de; afropen an’n 15. Mai 2018.
  4. ↑ Brian Lowry: How I Met Your Mother op Variety.com vun’n 18. Mai 2005 (Webarchiv); afropen an’n 15. Mai 2018
  5. ↑ Christian Buß: Meister des miesen Timings, Spiegel, 12. September 2008 (afropen an’n 16. Februar 2012)
  6. ↑ „How I met your mother“-Finale? So enttäuschend!. In: focus.de. 28. August 2014, afropen an’n 29. August 2014
  7. ↑ Sarah Stendel:Liebe HIMYM-Macher, war das euer Ernst?. In: stern.de. 28. August 2014, afropen an’n 29. August 2014
  8. ↑ Christina Kühnel: Ach, Ted – ich hätte dir ein anderes Ende gegönnt!. In: t-online.de. 29. August 2014, afropen an’n 29. August 2014
  9. ↑ Jürgen Schmieder: Zeit für die Richtige. In: sueddeutsche.de. 1. April 2014, afropen an’n 29. August 2014
  10. ↑ Bernd Michael Krannich: How I Met Your Mother: Alternatives Serienende auf DVD. In: serienjunkies.de. 5. April 2014, afropen an’n 29. August 2014
  11. ↑ Nellie Andreeva: ‘How I Met Your Mother’ Spinoff Officially A Go At CBS With Pilot Order op Deadline.com vun’n 15. November 2013; afropen an’n 16. November 2013
  12. ↑ Matthias Kohlmaier: Dad wird nicht gesucht, Sueddeutsche.de, 14. Mai 2014; afropen an’n 4. Juni 2014
  13. ↑ Deadline: New ‘How I Met Your Mother’ Dad Spinoff In Works With ‘This Is Us’ Writing Duo vun’n 14. Dezember 2016; afropen an’n 15. Mai 2018
  14. ↑ Nellie Andreeva: ‘How I Met Your Father’: Alison Bennett Tapped To Write New ‘HIMYM’ Spinoff vun’n 11. August 2017; afropen an’n 15. Mai 2018
  15. ↑ Kinder wären sonst zu alt: "How I Met Your Mother"-Ende schon vor Jahren gedreht op rp-online.de vun’n 20. Januar 2014; afropen an’n 15. Mai 2018
  16. ↑ How I Met Your Mother: CBS verhandelt um 9. Staffel Christian Junklewitz op serienjunkies.de vun’n 16. Juli 2012; afropen an’n 15. Mai 2018

Weblenken

[ännern | Bornkood ännern]
How I Met Your Mother. Mehr Biller, Videos oder Audiodateien to’t Thema gifft dat bi Wikimedia Commons.
Vun „https://nds.wikipedia.org/w/index.php?title=How_I_Met_Your_Mother&oldid=1017530“